Mai M.

وعليكم السلام ورحمة الله، سيبك تمامًا من كلام أهلك السلبي لأنه أحد الأسباب في شعورك بالضغط وعدم التركيز في المذاكرة. عدم التركيز والتشتت والسرحان ده نوع من التهرب بيعمله عقلك عشان يتخلص من مسؤولية المذاكرة والضغط اللي حاسس به. فانتي المفروض تهدأي وتنسي خالص أي كلام سلبي سمعتِه وتركزي مع نفسك. نامي كويس ورتبي وقتك ونظمي مكان دراستك ويُستحسن يكون بعيد عن السرير، لو مش عندك مكتب خصصي مكان محدد وجهزيه للمذاكرة بحيث عقلك يعرف إن ده للمذاكرة بس مش للنوم ولا الأكل ولا الراحة وإنه أول ما نقعد في المكان ده هنركز طول الفترة اللي هنقعدها. قسمي الوقت والدروس لأجزاء صغيرة، وبكده تخدعي عقلك عشان ميحسش بالضغط وإنه قُدام مهمة تقيلة... يعني قولي له هنذاكر بس النصف ساعة دي ونرتاح بعدها... تركزي في النص ساعة دي وترتاحي بعدها خمس دقائق، اتحركي فيهم واعملي كم تمرين تفكي تشنجك عضلاتك ومفاصلك. كافئي نفسك بحاجة بتحبيها، العقل بيحب المكافآت لكن بيحب المكافآت القريبة فعشان كده بيخلينا نضيع وقت على السوشيال ميديا لأنه بيحس بالسعادة ودي مكافأة بالنسبة له فانتي محتاجة تستخدمي نفس الطريقة معه... المكافأة مع كل إنجاز هيحمسك أكتر. الصلاة والأذكار وقراءة القرآن دي كلها علاج لازم تستخدميه صح... هل صلاتك فيها خشوع واستحضار لوقوفك بين إيدين ربنا؟ هل بتقرأي الأذكار وقلبك حاضر ولا مجرد ترديد؟ هل توكلك على ربنا واستعانتك به مجرد كلام باللسان لكن القلب مش مستيقن التوكل ده فعلا؟ كل دي عوامل بتفرق. متحاوليش تعتمدي على الشغف عشان تذاكري، المطلوب منك تنمية حس المسؤولية والانضباط الذاتي والاستمرار على الخطوات الصغيرة كل يوم. لا تقلقي بخصوص الامتحانات وخلي تركيزك تتعلمي كل يوم حاجة جديدة وتنمي عقلك وشخصيتك أكتر. بالتوفيق إن شاء الله.

هي الفكرة كلها إن الدنيا متقلبة ومحدش عارف بكرة فيه إيه. انتي دلوقتي بتقولي إنك في بيئة ووضع مادي كويس وماما بتعمل لك كل حاجة. حتى لو مش معاك شهادة كلية فانتي محتاجة تعليم ومحتاجة يكون في إيدك مهارة أو علم تقدري تستخدميه في مستقبلك ووقت تحتاجي وظيفة واستقلال مادي. محدش ضامن الظروف. انتي ممكن الكلية اللي دخلتيها مش حاباها وممكن عقلك احتاج يرتاح من الضغط اللي كان عليه في المدرسة. بالمختصر ممكن انتي وصلتِ لحالة احتراق نفسي ووظيفي وعقلك احتاج يفصل. اقعدي مع نفسك ورتبي أفكارك واعرفي إن ربنا خلقك لهدف... ربنا خلقك لعبادته لكن العبادة مش معناها الصلاة والصوم والدعاء بس. العبادة معناها تعيشي حياتك صح وتتعلمي وتبري والدتك وتعملي الواجب اللي عليكِ تجاهها وتجاه نفسك وتتفوقي عشان متكونيش عالة على حد بعد كده. تتعلمي حاجة تنتفعي بها وتقدري يكون في إيدك فلوس تتصدقي بها وتساعدي غيرك من المحتاجين. يكون معك شهادة أو وظيفة تنفعك لو لا قدر الله تقلبت الدنيا والأحوال. والدتك أكيد كل ما مسؤوليات الحياة بتكبر عليها وكل ما الظروف الاقتصادية بتصعب علينا هي أكيد بتتأثر حتى لو مش بتشاركك همومها وأكيد هتحتاج لك بعد كده. فيه جملة انتي قلتيها (كلها يومين وهنموت فنعيش وننبسط) والحقيقة إن ديننا مش بيقول كده، أيوه مش بيقول نعيش في نكد لكن فيه توازن... فيه سعي... فيه عمل عشان الدنيا باختصار مزرعة الآخرة. انتي في الدنيا عشان تزرعي لآخرتك وتحجزي مكانك في الجنة بطاعة ربنا ونجاحك في الاختبار. الرسول قال (إذا قامت الساعة وفي يد أحدكم فسيلة فليغرسها) معنى كده إن لآخر لحظة مطلوب مننا السعي والعمل... يعني خلاص القيامة هتقوم والشخص ده مش هيشوف أصلا ثمرة الغرسة اللي هيغرسها لكن المطلوب يعمل ويسعى وربنا بيجازي على السعي في النهاية. ربنا يوفقك لما يحب ويرضى وينفع بك ويديم عليكِ نعمه. بالتوفيق.

مليش خبرة في زراعة النباتات والزهور لكن مهم تعرفي إن الموضوع هيحتاج منك اهتمام ومتابعة علشان النبات يكمل معك ويعيش. حاولي تنضمي لجروبات الزراعة ومحبي النباتات على الفيسبوك عشان تلاقي نصائح لكيفية العناية بالنبات اللي هتختاري زراعته لأن كل نبات بيختلف في مواعيد الزراعة والإزهار وامتى ترويه وكل قد إيه ووع السماد واحيانا ممكن تحتاجي أدوية أو رش لبعض الآفات والعناكب وغيرها. فكل نبات له تفاصيل رعاية مختلفة فيه جروبات كتير على الفيسبوك ممكن تبحثي وتنضمي لهم. ممكن أقترح عليكِ فيه أنواع من الصبار والعصاريات بتطلع أزهار ولها منظر جمالي وكمان الياسمين والورد البلدي والنعناع والريخان حلوين للزراعة في البلكونات ومداخل البيت من ناحية تعطي منظر جمالي ومن ناحية تعطر الجو.