السلام عليكم، الحل إنك تحبي نفسك. مينفعش أبدًا تكون نفسك هينة وقليلة قوي عندك لدرجة إنك كان ممكن تنتحري وتخسري دنياك وآخرتك وتدخلي النار عشان مجرد ولد. مهما كانت مشاعرك ومهما كانت مكانة الشخص عندك مينفعش أبدًا أبدًا تخلي نفسك درجة تانية وهو الأولوية والمركز اللي بتلفي حواليه ولو بِعد أو تركك حياتك كلها تنهار. محتاجة تقعدي مع نفسك وتعالجي الخلل اللي جواكِ ومخليكِ مستقلية بنفسك وبتدوري على قيمتك في نظرات ورأي شخص تاني وتسمحي له يجرحك ويهينك. وعلى فكرة اللي انتِ فيه ده مش حب أبدًا... ده تعلق مرضي محتاج يتعالج. ** انتِ بنت، أنتِ الغالية اللي ينطلب رضاها مش هي اللي تتوسل وتعترف بالحب وتجري ورا شخص رافضها. ممكن تكوني صغيرة لكن إن شاء الله لما تفوقي من الوهم اللي انتِ فيه وتكبري وتنضجي هتبصي في يوم على اللي كنتِ فيه دلوقتي وتقولي إيه الهبل اللي كنت فيه ده؟ إزاي هانت عليّ نفسي كده؟ إزاي في يوم فكرت أقتل نفسي وأخسر كل حاجة عشان واحد؟ فوقي حبيبتي من اللي انتِ فيه وركزي في حياتك، ** إهمال أهلك أو الجفاف العاطفي اللي في محيطك العائلي مش مبرر أبدًا تمشي في طريق غلط وتدوري على فتات المشاعر عند أي حد وهو يقرر ييتسلى بك ويرمي لك شوية فتات أو يرفضك وميهموش جرحك ولا كرامتك. افتكري إنك أغلى من كده. ربنا يهديكِ ويوفقك للخير دايمًا.
لعرض الإجابة في فدني اضغط هنا