اولا ربنا يرحم والدتك يا رب.. و طالما أنت ناوي تتوب بجد، متخليش الشيطان يشغلك بالندم لدرجة يعطلك عن اللي عليك. ركز دلوقتي إنك تخلص آخر امتحان على خير وابذل اللي تقدر عليه، لأن ده أهم حاجة في الوقت الحالي. وبغض النظر عن أي حاجة، حافظ على الصلاة ومتسبهاش، حتى لو حسيت إنك مقصر. متستناش تبقى كامل عشان تقرب من ربنا، قرب منه وأنت بتحاول. بعد الامتحانات اعمل بداية جديدة زي ما أنت ناوي. فلتر الموبايل، احذف أي حاجة ممكن ترجعك للطريق ده، واعمل الحساب الجديد لو ده هيريحك نفسيا ويساعدك تبدأ صفحة جديدة. والأهم من حذف الحاجات إنك تملأ وقتك بحاجات تنفعك. حاول كمان تثبت لنفسك برنامج بسيط تقدر تلتزم بيه، زي ورد قرآن حتى لو صفحات قليلة، وأنصحك بكتاب الداء والدواء لابن القيم، وشرح علاء حامد له على يوتيوب جميل ومفيد جدا في موضوع التوبة ومجاهدة النفس. وبالنسبة لموضوع ثقة والدك، طبيعي تكون متضايق، لكن الثقة لما بتتأثر بترجع بالأفعال مش بالكلام. متفضلش كل شوية تفكر هو لسه واثق فيا ولا لأ، ركز إنك تستقيم من دلوقتي، ومع الوقت هيشوف ده بنفسه إن شاء الله. ومتكبرش الذنب في دماغك لدرجة يخليك تحس إن مفيش أمل. الذنب كان غلط، لكن واضح إن الشيطان دخل عليك من باب جلد الذات وخلاك تحس إن حياتك انتهت، وده مش صح. طول ما أنت نادم وناوي تسيب الذنب وتبدأ من جديد فدي نعمة كبيرة، فاستعن بالله وكمل، ولو وقعت في يوم قوم تاني ومتستسلمش. ومتخليش غلطة حصلت في فترة صعبة تعرفك أو تخليك شايف نفسك إنك شخص سيئ. ربنا فتح لك باب التوبة، فاشكره على النعمة دي وابدأ من جديد، وسيب الأيام هي اللي ترجع ثقة والدك بيك بالتدريج. ربنا يعينك يا رب و ييسر لك امورك و يوفقك ف امتحاناتك.
اللهم آمين يارب وإياكي
تم النشر الأربعاء، ٨ يوليو ٢٠٢٦
الحمد لله، ده أسعدني والله. وربنا يكتب لك الخير كله، ويجعل التوفيق حليفك في النتيجة وفي اللي بعدها و يثبتك علي طاعته. وأتمنى بعد فترة تبص للي حصل ده وتلاقي إنه كان نقطة رجوع لربنا وبداية أحسن، مش مجرد ذكرى بتوجعك. بالتوفيق ان شاء الله.
تم النشر الأربعاء، ٨ يوليو ٢٠٢٦
يا رب اللهم آمين أنا مش قادر اوفيكي حقك مش عارف اشكرك ازاي بس حقيقي الكلام ده حسسني بالراحة انا فعلا كنت مخطط لكل ده وناوي عليه بس زي ما تقولي كده ان انا كنت عايز حد يحطلي النقط على الحروف لاني تايه جدا. انا الحمد لله دلوقتي خلصت امتحانات النهاردة ودعواتك في النتيجة بقي وربنا يسعدك في الدارين وبتمنالك الصلاح والهداية حقيقي شكرا جدا
تم النشر الأربعاء، ٨ يوليو ٢٠٢٦
لعرض الإجابة في فدني اضغط هنا