طب انتى ليه حاسة إنك عبء على والديكى ؟ إيه الأسباب اللى خليتك تقولى كدا ... انت غالبا أهلك من صغرك كانوا بيقارنوكى كتير والمقارنة أسلوب حياة ف دا نشأ عندك عدم حب لحياتك لأنك بتقارنيها بزميلة ليكى لأنك مهما كانت حياة الشخص حلوة وفيها مميزات كتير وفيها من الجمال ما فيها بيبقى معمى عن دا كله ومش شايفة بمجرد ما يدخل حياته بمقارنة وغالبا ببنشأ شئ من الحقد والحسد اللى انتى بتكررى بنفيه بس للأسف دا واقع بس انتى نيتك صالحة .... المهم دلوقتى بداية علاجك وحبك لحياتك أن تتعلمى الحمد وهو أن تتعلمى كيف نحمد الله لازم تعرفى ان حياتنا ديه كلها ربنا كاتبهالنا سواء شايفينها حلوه بقى وحشة المهم أيا كان الحمد لله وفيه حاجات كتير يوتيوب تقربك وتعلق قلبك بالحتة ديه أى الحمد لله فى السراء والضراء فى الخير والشر، أولا وأخرا حاولى لسانك دايما مربوط بالحمد لله ودا يساعدك جدا فى التعافى من إحساسك دا ....... تانى حاجة المقارنة لازم تمسحى البنت ديه من دماغك بأستيكة لأن المقارنة بتمحى من قدامك الحلو اللى عندك وهتفضلى شايفه نفسك وحشة وقليلة لازم متفكريش فيه ولا فى حياتها لكل منا طريقة الخاص لازم لازم لازم .... تالت حاجة شوفى انتى بتحبى إيه وقادرة تعملي إيه وكافئى نفسك بمعنى يوميا مثلا عندنا خمس صلوات لو مثلا صلتيهم كلهم فى معادهم دون تأخير هتلاقى نفسك تحسى بالإنجاز ودا هيجيب انجاز وهكذا مثلا الكلية اجتهدى فيها وطلعى كل طاقتك فيها واثبتى لنفسك انك كويسة اعملى مثلا خطة معينة تنجزى فيها أشياء بسيطة كل دا هيرفع إحساسك وحبك لذاتك .... أما بقى بتعملى ذنوب ولولا ستر الله عليكى فدا كل البنى آدمين مش انتى بس احنا يا بنتى ماشيين بستر ربنا أصلا محدش خالى من الذنوب...... ربنا يوفقنا ويوفقك 🤍
@السائلة السلام عليكم يا دكتورة عساكى بخير ... كل الأزمة والمشاكل ديه كلها بسبب الفلوس النابعة من دخولك الكلية بس استنى بس محتاج أرد على فكرة لو كنتى دخلتى حكومى كنا زمانا وزمانا أنا ليا واحد صاحبى كانت العربية بتاعتة جاهزة حرفيا لو دخل طب حكومى ولو مدخلش هتتباع وهيخش خاص للأسف موفقش فى الثانوية وطبعا دا نتج انه دخل خاص نفس فكرتك ديه بس هو خدها حافز ليه ودلوقتى فى تالته طب وبسم الله ما شاء الله ماشى كويس جدا فى الكليه رغم الضغوط النفسيه الشبيهه للى انتى بتتعرضيلة ف بسألة ازاى قادر تعمل دا قالى كلام جميل أووى انه واثق فى نفسة وحابب المكان دا وعارف اللى هيتعرضلة دا من بدرى بس هو لازم يثبت لنفسة ولأهلة ويعوضهم عن كل دا ف قالى انه معندوش رفاهية الوقوع لأنه لو وقع هيتجنن وهيتداس عليه من كل الاتجاهات اولهم أهله وطبعا حقهم ف علشان كدا ساعات بحسة انه بايع الدنيا ممكن تعدى شهور وميشوفش الشارع شايف انه فى حرب ومعندوش رفاهية الخسارة ..... نصيحتى ليكى يا دكتور كل حاجة بإيديك انتى لازم انتى لسة فى البداية وقدامك سنين كتير لازم تقعدى مع نفسك وتشوفى وتقررى بس الكلام دا بعد الترم تستحملى أهلك دلوقتى وكأنك قدامك ترم هيتوقف عليه حباتك كأنها فرصة تانية للثانوية وبعد الترم ما يخلص تشوفى وتقررى هل انت قادرة على المكان دا ؟ هل انا حمل الضغطة ديه سواء نفسية أو عصبية وجسدية طول السنين الجاية ديه ؟ هل قادرة أعمل come back على الكلية ديه وأثبت لنفسى ان الترم الأول دا مجرد ترم عابر ؟ كل دا هيتحدد من مقدرتك على انتى هتعملى ايه فى الترم دا ؟ لو كويسة ساعتها هتقدرى تواجهى وتطلبى وتقولى استحملونى وهعوضكم لقيتى نفسك مش كويسة أو مش قادرة ودا مش عيب على فكرة انسحبى بهدوء وابدأى فى مكان تانى من جديد شوفى مجموعك كان جايب ايه طبعا الموضوع هيكون صعب خصوصا أهلك واللى حواليكى بس صدقينى انك تستحملى عواقب سنة وتبدأى من جديد أهون مليون مرا من اللى ممكن يحصل لو قررتى تكملى وانتى مش قادرة بس حاسس انك كويسة وقد المكان دا وتقدرى عليه وهتعملى حاجة كويسة الترم دا إن شاء الله ابعدى انتى بس عن أى ملهيات أو حاجة ممكن تعطلك عن دراستك قربى من ربنا أكتر وحافظى على صلواتك علشان سلامك النفسى وتحافظى على توازنك الإيمان بالله بيدينا آمل وقوة ودافع كبير أووى وبيزيد صبرنا على اللى احنا بنشوفة من معاملة وغيرة حاولى تعذرى أهلك وتلتمسيلهم العذر وتفوتيلهم معلش وفى نفس الوقت حبى نفسك أكتر وثقى فيها واثبتى لها ولكل اللى حواليكى انك دخلتى المكان دا وانتى قده بالتوفيق يا دكتور 🤍
تم النشر الاثنين، ١٣ أبريل ٢٠٢٦
@السائلة بصي، لازم أقولك حاجة واضحة: انتي مش سبب اللي حصل في البيت ولا مسؤولية القرارات الكبيرة اللي اتاخدت زي النقل أو الماديات أو غيره. تحميلك الموضوع بالشكل ده قاسي جدًا على نفسك ومش عادل. موضوع المصاريف والسكن… طبيعي يكون في ضغط، بس ده مش معناه إنك بتستنزفي حد. انتي بالعكس واضح إنك بتحاولي توفري وتهدي الموضوع على قدك، ففكرة إنك عبء دي جاية من إحساس ضغط مش من واقع. بالنسبة للأكل ونزول الوزن والدوخة والتعب… ده مش دلع ولا قلة إرادة. ده جسم مرهق ومضغوط ومحتاج اهتمام . اللي انتي فيه محتاج يتعالج بهدوء مش يتساب لحد ما يزيد. والدراسة والخوف وكتر التفكير… ده طبيعي جدًا مع الضغط الكبير اللي عليكي، ومش معناه إنك أقل أو مش قادرة. ده معناه إن دماغك مش قادرة تفصل من كتر الحمل. إحساسك إنك مش مرحب بيكي أو إنك تقيلة على حد… الإحساس ده مؤلم جدًا، بس مش دليل إنه حقيقة. أوقات الكلام وقت الزعل أو الضغط بيتفهم بطريقة أقسى بكتير من اللي كان مقصود. في الآخر… انتي مش عبء، ولا سبب مشاكل، ولا حد زيادة عن اللزوم. انتي بس تحت ضغط كبير جدًا ومحتاجه تهدّي على نفسك بدل ما تكسريها أكتر.
تم النشر الاثنين، ١٣ أبريل ٢٠٢٦
حاسه اني عبء عشان ماما كانت بتقولي لو جبت بشري حكومي هننقل نقعد في مكان احسن وهنجيب عربيه وكل دا وانا مجبتش بشري حكومي ف دخلتها اهلي ف كانت بتقولي الي احنا فيه دا بسببك وكدا وبابا كان بيقولي انتي بتصرفي ميزانيه بيت عشان انا واخده سكن لان كليتي بعيده وكدا بس والله بحاول اوفر ومشتريش كتير انا كنت مدمنه اني اشتري ودايما بحب اشتري حلويات كتير بقيت بحاول اقلل حتى الاكل نفسه مبقتش اجيب اكل ولا فواكه ولا كدا لحد م خسيت وانا اصلا رفيعه اوي لوحدي ف خسيت ووشي خس وشكلي مبقاش اد كدا وبقيت بدوخ ودماغي بتصدع كتير اوي وبتعب وبنام كتير من قله الاكل ومن الضغط الي عليا عشان عايزه اجيب مجموع واحول نفس الكليه بس جمب اهلي عشان ارحم من المصاريف شويه وبعدين دا كله شيلت 3 مواد في الترم الاول واديني في الترم التاني وخايفه وطلع فيه فرصه اني اعرف احول حتى لو شايله بس المهم اعدي واجيب تقدير جيد في سنه اولي ف انا من كتر خوفي وتفكيري مش بذاكر اوي وبنام كتير انا بحاول اذاكر والله بس لو قعدت على الكتاب 5 ساعات بيبقى 3 مذاكره و 2 تفكير وتضييع وقت وكمان لما بنزلهم اجازه لا حد بيحضني ولا حتى كلمه وحشتيني بسمعها غير من اخواتي الصغيرين ممكن بابا نمشيها لان علاقتي بيه مش كدا بس ماما لا انا بحضن ماما عادي هي مش بتعمل كدا ف بحس ان وجودي زي قلته وانه مش مرحب بيا في البيت دا واني موجوده بس عشان استنزفهم ماليا حتى ماما قبل كدا قالتلي مرتين اني ابتلاء مره كانت بتتكلم بجد ومره كانت بهزار شويه بس انا مخدتهاش بهزار،، بحس اني لو دايقت حد من اخواتي الي هو انتي بتعملي مش كفايه مستحملينك ف بقيت بقعد لوحدي وبحاول لما نخرج مع خالتي او كدا مطلبش طلبات كتير حرفيا بحس اني مش بنتهم وانهم مش اهلي مبقتش بحس بالشعور دا لدرجه ان اوقات بتمني الموت عشان ارحمهم حتى وربنا يريحهم مني
تم النشر الاثنين، ١٣ أبريل ٢٠٢٦
لعرض الإجابة في فدني اضغط هنا