في موضوع غريب جدا معايا مش عارفة هو في اي. موضوع أني مش متشافة. او مش معروفة حرفيا. وسط قرايبي اللي هما من بعيد مش بيشوفونا غير في المناسبات مثلا يعرفو أخواتي لكن ميعرفونيش. او ميعرفوش أني موجودة أصلا.
جيراني والناس اللي حوليا وحتى وسط صحابي. المجموعة كلها بتبقى معروفة الا انا. ديما اتسأل انا مين؟ ميعروفنيش ك أسمي. لازم اقولهم انا بنت مين او صاحبة مين او تبع مين. ويتفاجئوا اني موجودة اصلا.
يعني مثلا في يوم في صديقة ليا جت مدرستي زيارة وهي من مدرسة تانية. في الفسحة كنت ماشية انا وهي وصحبتي التانية من مدرستي عادي. المهم عدي من جمبنا استاذ ووقف للحظة وبصلنا ولقيته بيكلمني ويقولي انتي منين؟ اول مرة اشوفك هنا. قلتله لا مش انا دي صحبتي اللي مش من هنا. بصلها بعدين بصلي وقالي لا. انتي اللي غريبة عليا واول مرة اشوفك.
موضوع كان غريب ورخم وصحابي ضحكوا ع الموقف وحاولوا يفهموه انها من المدرسة وان دي هي اللي ضيفة مقتنعش. رغم ان دي مدرستي وفيها علطول. المهم نفس البنتين بقا وبرا المدرسة. البنت اللي كانت ضيفة في مدرستي برضو ضيفة في قريتي. يعني باختصار هي صحبتنا بس من منطقة تانية وصاحبنها مؤخرا وجت مدرستي بعدين قريبتي اخدتها انا صاحبتي وماشيين في شوارع القرية وكنا واقفين عند تجمع نسائي كدة.
جت وحده من وسطهم وقالتلي يابنت! انتي منين؟ اول مرة اشوفك هنا. وشي احمر. لعلمي هي مين وكمان انها مستغربتش صحبتي اللي مش من هنا واستغربتني انا. والمشكلة الاكبر انها من عيلتي. قلتلها بنت فلان اتفاجئت قالتلي يلاهوي. ده انتي بنت عمي. والله ما عرفتك (والدها وبابا ولاد عم)
المهم برضو كنا بنشتري انا وصحبتي اللي من نفس منطقتي من محل وحدة جارتي في الشارع اللي جمبي.قالتلي انتي مين قلتلها بنت فلان قالتلي انتي فلانه؟ قلتلها لا دي اختي الكبيرة. قالتلي لا مش فكراكي او مش واخدة بالي منك؟
المهم كثير من المواقف الكتيييير اللي بتحسسني حرفيا اني غير مرئية غير موجودة. زي ما يكون مكتوب عليا اني ابقا كأني غير موجودة. كل المواقف دي بتحصل قدام صحبتي اللي من قريتي. لحد ما بقت بتقول باستهزاء. انتي محدش يعرفك. انتي مش موجودة.
انا بقرية. يعني الكل يعرف الكل. مفيش موضوع ان كل واحد في نفسه. او من حقهم انهم مش يعرفوني. لا. بيبقوا عارفين كل صحابي رغم عدم وحود علاقات بينهم. او حتى مش بيستغربوهم زي ما استغربوني انا ومستغربوش الضيفة اللي اول مرة تيجي
أنا آسفة إنك بتحسي بالإحساس ده، ده فعلاً موقف محبط ومربك، خاصة لما يتكرر كتير قدام ناس قريبين منك. الشعور إنك "غير مرئية" بيأثر على الثقة بالنفس، وده طبيعي. ممكن يكون السبب في طريقة تفاعلك مع الناس (زي إنك هادية أو مش بتدخلي في الحديث بقوة)، أو حتى في ملامحك اللي مش بتلفت الانتباه بسهولة. لكن الأهم دلوقتي إنك تعرفي إن وجودك مش مرتبط برأي الآخرين. جربي تكوني أكثر مبادرة: قدمي نفسك بنفسك في المناسبات، شاركي في الحديث أو الأنشطة، وخلي صوتك يبان. ده هيساعد الناس يلاحظوك أكتر مع الوقت. لو الموضوع بيأثر عليكِ نفسيًا بشدة، ممكن تشوفي استشارة مع متخصص على فدني من خلال صفحة الخبراء: https://www.fedni.net/experts ابحثي كمان عن أسئلة مشابهة على فدني عشان تلاقي تجارب تانية. أنتِ موجودة ومهمة، وده مش هيتغير بسبب موقف.
تم النشر الاثنين، ٨ يونيو ٢٠٢٦
زيي في الأول كنت بتضايق وبحس ان مليش قيمه او كدا وكانو بيتريقو كمان ويقولو ان اناوانا صغيره كانو شاكين اني مش بتكلم بسبب هدوءي ويقولو ان حجمي كان زي الصرصار وشكلي وحش بس لما كبرت احلويت، كنت بتضايق في الاول وارد عليهم لكن دلوقتي بقيت ماشيه بمبدأ ملكش فيه طول ما انا واثقه في نفسي وعارفه قيمتي بمعني، انتي فوووق خالص فاهماني، تلاتلاف واحد يتمني رقمك وتلاتلاف واحد يتمني بس انك تعبريه، امشي بالمبدأ دا ودا مش تكبر، دي ثقه وكل يوم ثقتك هتزيد بنفسك. قولي لنفسك ان شا الله ما عنهم كلموني هما الخسرانين بس مش الدنيا الحياه مش واقفه علي ناس مش حاسه بيكي يعني
تم النشر الأربعاء، ١٠ يونيو ٢٠٢٦
مش فارق معايا يعرفوني أو لا اكتر ما مستغربة الموقف. مواقف غريبة. عموما. انا من النوع اللي مش بختلط بالناس. لكن انهم يستغربوا وجودي أنا وميستغربوش وجود صحبتي الضيفة. والمواقف دي حصلت بوجودها
تم النشر الثلاثاء، ٩ يونيو ٢٠٢٦
ده الأفضل ، احمدي ربنا لإن كتر الاختلاط بالناس = كتر حوارات . عادي يعني لما تكوني معروفه إيه اللي هيحصل ...؟! اهم حاجه علاقتك بربنا
تم النشر الثلاثاء، ٩ يونيو ٢٠٢٦
لعرض السؤال في فدني اضغط هنا