على فكرة، مش بعيد لو جينا نبص من زوايته وطلبنا إنه هو يحكي هتكوني انتِ غلطانة ومش بتقدري مثلا ظروفه أو بتكبري المواضيع وهتلاقي نظرته للتفاصيل اللي انتِ حكيتيها مختلفة تمامًا. تفكير الشباب وردود أفعالهم مختلفة عننا عمومًا. أنتِ محتاجة تقعدي معه في وقت زيارته لبيتكم ويكون هادي معندوش مشاكل في الشغل مثلا أو مضغوط عشان مش هتقدري تتفاهمي معه ساعتها. حاولي وقتها تتكلمي معه بهدوء ومن غير انفعالات أو إنك تحسسيه قد إيه هو مقصر وكذا وكذا... أعتقد أي كلام سلبي في حقه هيخليه يصد محاولاتك. وبالمناسبة، الكلام والعتاب في التليفون وفي الشات أكبر غلط. مش بتبقي شايفة وش اللي قُدامك وتعابيره وغالبا كلام الشات بيتفهم غلط والكلام في الموبايل مش أفضل وسيلة للتواصل في وقت المشاكل. لازم تكونوا وجهًا لوجه وتتكلموا بهدوء... تعرفيه إيه مضايقك وتعرفي منه إن كان فيه حاجة مضايقاه أو إيه اللي مخلي فيه مشكلة في التواصل بينكم. حاولي كمان ميكونش هو محور تركيزك واهتمامك وإنك تكوني دايما المبادرة في الاتصال به والسؤال عنه. البعد أحيانا بيحسس الطرف الآخر بأهميتنا وإننا مش شيء مسّلم في حياته، اما تواجدك باستمرار وتعلقك به ولومك له على إهماله كل ده هيحسسوه إنه ضمنك ومفيش خوف من إنك تحاولي تبعدي.
المفروض تعرفي اهلك خصوصا بعد م نصحتيه وعاتبتيه اول مرة او حد من اهله
تم النشر الخميس، ٦ فبراير ٢٠٢٥
ربِّ يزيدك دكـتورة مي، جميل كلامك حقيقي
تم النشر الخميس، ٦ فبراير ٢٠٢٥
لعرض الإجابة في فدني اضغط هنا