السلام عليكم، أولا ألف سلامة عليكِ. بصي الأول بلاش تحطي في دماغك إن اللي بيحصل ده بسبب حسد أو عمل معمول لك أو كده لأن تصديقك لفكرة معينة بيرسخها ومش هتقدري تتخلصي منها بسهولة، خاصة إنك قلتِ أصلا إن المشكلة كانت عندك من قبل بس زادت، بلاش تحطي في بالك ده. يعني حتى لو فيه احتمال بلاش تتمسكي به وتصدقي إن اللي قاصد يؤذيك قادر فعلا على أذيتك وأقوى من حفظ ربنا لك. فداومي على الرقية عادي، لو فيه حاجات من دي فالرقية الشرعية وسورة البقرة بتمشي عليهم لمدة ومش بتوقفي لو مش لقيتِ نتيجة بسرعة. اقرئي أذكار الصباح والمساء وسورة البقرة كل يوم وتيقني إن ربنا الحافظ وأقوى من أي شخص يريد لك الأذى وقادر يشفيك من أي شيء بإذن الله. *** ثانيا، لازم تكشفي جلدية تاني، متسيبيش نفسك كده. حتى لو الكشف الأول والعلاج مجابش نتيجة روحي لدكتورة تانية، بس حاولي قبلها تشوفي آراء الناس اللي راحت لها، يعني ممكن تشوفي على موقع فيزيتا وتبحثي عن أطباء الجلدية اللي في مدينتك أو محافظتك والطبيبة اللي تختاريها هتلاقي التقييمات بتاعتها وآراء الناس مكتوبة. وتابعي العلاج لفترة وارجعي لها في الاستشارة والتزمي بالتعليمات كويس وربنا يسهل ويشفيكِ شفاء لا يغادر سقمًا. ألف سلامة مرة تانية.💚💚
لعرض الإجابة في فدني اضغط هنا