محتاج نصيحة منكم
سايب الشغل بقالى شهر ومستسلم لفكرة الراحة والقعدة ف البيت انا خريج آداب اسكندرية ومخلص جيش لسة صغير يعتبر 26 سنة
من إعدادى وانا بشتغل حرفيا وبصرف ع نفسى فترة الكلية اتجهت للشغل ف مجال الملابس واشتغلت ف المصانع وكدة آخر مصنع قعدت فيه بتاع خمس سنين
حرفيا خمس سنين كنت شخص ناجح ف شغلى بعمل كل حاجة حرفيا ف المصنع وكنت اصغر واحد هناك رغم كدة كنت بوجه واشغل ناس كتير اكبر منى بكتير بس حرفيا الخمس سنين دول كانوا تعب نفسى وجسدى جابنى الأرض
خمس سنين مفيش مستقبل شغل تحت السلم يعتبر غير أن شغال مع ناس تعليمها ع قدها ف كلوا شايف الشهادة بتاعتى ملهاش لزمة بما انى شغال معاهم بقا فبقيت زيهم وآخر حاجة جملة انقالت من اخت صاحبة المكان ع ابنها وأنها معلمتوش وصرفت عليه كل دا عشان يشتغل ف مصانع وكانت بتبصلى فحرفيا دى كانت نهاية المكان دا بالنسبالى ومن بعد ماسبته معنديش هدف ولا طموح ولا حتى خبرة غير ف المجال. دا اللى بقيت كارهه ونفسيتى مش مخليانى قادر انزل شغل تانى عشان مرجعش لنفس الدائرة
السلام عليكم و رحمة الله و بركاته أنا الحقيقة مش شايفه شخص فاشل بالعكس شايفه شخص ما شاء الله نجح انه يكتسب خبرة في مجال في سن صغير و ده مش كتير بيعمله.. ممكن شخص يبقا معاه شهادة عاليه و لكن خبرته في الشغل صفر ، الشخص ده في الغالب بيجلب مشاكل إن مشتغلش على نفسه بشكل كافي . مش معنى النجاح إنك يكون معاك شهادة عاليه، معنى النجاح بيختلف من شخص لأخر في أشياء مختلفة يعني اقدر اقول مثلا فلان ناجح ، بمجرد إن الشخص ده قدر ينتظم في صلاته ف هو نجح ف ده او شخص بيقدر يتعامل مع الناس بشكل جيد و عنده أسلوب حديث مناسب اقدر اقول أنه في الحاله دي ناجح في التعامل . ف حضرتك ناجح ف مجال غير مجالك بمجرد "الممارسة". يعني مجرب سابق لأهمية الممارسة و نتائجها فلذلك مش محتاجه أقول هي قد ايه مهمه و ذي موصلتك لممارسة مجال مختلف بنجاح هتقدر بيها تكتسب خبرة في مجال آخر. المكان استنزف طاقة و لكن في المقابل نجحت في مجالك و مارست مهنة مختلفة و ده يخليك قادر تعمل ده في مهن أخرى إن حددت هدفك. يعني مثلاً إن كنت عندك خبرة في التعامل مع الناس ف ده يقدر يوصلك لنقطة إنك مثلاً تتعلم لغه و تاخد شهادة معتمدة و تترجم في شركات كبيرة "مجهود أقل و المكسب أكبر" و كله والممارسة و التعب في البدايه بعدها راحه بغض النظر عن إن في كورسات كتيرة تقدر توصلك لأهداف مختلفة ، ف من وجهة نظري اللغة تقدر توصل اي شخص ف حته تانيه. والدي شغال مدير في شركة و بيحكيلنا عن مرتبات الأشخاص اللي بيقدرو يتكلمو صيني و حقيقي بيدوهم مرتبات عالية جداً لمجرد بس إنهم ترجموا محادثة بينهم و بين وفد أو ترجم اللي مكتوب على الآلات. نفس الكلام في الألماني و الإنجليزي ف الكول سنتر بياخد مرتب عالي لمجرد انه معاه لغه . و تقدر تبحث عن مميزات أي كورس ف أي مكان . بس مهم يكون عندك هدف إنك تطور من نفسك ، بغض النظر عن جملة "معنديش هدف ولا طموح" بس أنا مش قادرة أفهم حضرتك إزاي مش مدرك إنك فعلاً حضرتك شخص ناجح قدرت تكتسب خبرة في سن صغير ما شاء الله. مهم تكون مع نفسك لا عليها ، الدُنيا و الناس هيكونوا عليها ف متكونش أنت كمان عليها. ساعد نفسك إنها تتحسن ، وقتها هتقدر توصل لمكان يرضيك إن شاء الله. ووفقك الله و اعانك
تم النشر الأربعاء، ٤ مارس ٢٠٢٦
أنا مؤمن إن دي مش صدفة خالص. يمكن تكون رسالة، ويمكن ربنا حط كلامك قدامي لسبب. أنا زيك وكنت في نفس المجال. اشتغلت في مصنع ملابس سنتين، وبعد ما خلصت المعهد كملت فيه. بس بصراحة، شهادتي ما كانش ليها أي قيمة وسط الموجودين. السنتين دول كانوا من أصعب فترات حياتي… تعامل سيئ، ضغط نفسي يومي، حوارات وقلق مالهمش آخر، وسيرتك على كل لسان حتى لو مالكش ذنب. رغم إني كنت صغير، اتعلمت المهنة في سنة واحدة واشتغلت على أغلب المكن. عملت اللي عليّ وزيادة، لكن في الآخر اكتشفت إن الاجتهاد لوحده مش كفاية لو المكان نفسه بيستنزفك. بقالي شهرين ونص سايب المجال وقاعد في البيت. يمكن الفترة دي فيها غموض، بس على الأقل فيها هدوء. واتعلمت درس مهم: المهنة اللي توصلك لدرجة الاستنزاف دي ما تستاهلش تضحي عشانها بسلامك النفسي. الحياة أقصر من إننا نعيشها كل يوم في حاجة بنرجع منها مكسورين أو مش راضيين. الشغل مهم، والرزق مهم، لكن الأهم إنك تبقى مرتاح من جواك. لأن مفيش نجاح يستاهل تدفع تمنه أعصابك وكرامتك وراحتك. وفي الآخر، أنا سايبها على ربنا… الرزق مكتوب ومقدر، وكل واحد له طريقه، وربنا دايمًا بيعوض اللي صبر وتحمل
تم النشر الثلاثاء، ٣ مارس ٢٠٢٦
أول حاجة أشكرك إنك شاركتني قصتك دي، وأنا فاهمة تماماً الإحباط اللي جواك بعد الـ5 سنين تعب دول، خاصة مع الجملة الأخيرة اللي وجعتك. بس أنت شاب قوي، 26 سنة بس، خريج آداب إسكندرية، ومن إعدادي بتصرف على نفسك ونجحت في شغلك رغم إنك أصغر واحد – ده إنجاز كبير يثبت إن عندك إصرار ومهارات قيادية! الدائرة دي مش هترجع إلا لو سبتها ترجع. خلينا نبدأ خطوات عملية صغيرة عشان ترجع هدفك: حدد هدف يومي صغير: النهارده، حدث CV بتاعك (اكتبه بالعربي والإنجليزي)، ركز على مهاراتك زي الإدارة، التنظيم، والعمل الجماعي في المصنع. شهادتك في الآداب هتفتحلك أبواب في التسويق، المبيعات، أو حتى كتابة محتوى/تدريب. غير المجال شوية: دور على شغل في شركات ملابس كبيرة (مش مصانع صغيرة)، أو مجالات قريبة زي اللوجستيك، المخازن المتقدمة، أو حتى مبيعات أونلاين. حمل تطبيقات زي "وظف" أو "بيت" وابحث يومياً 30 دقيقة. طور نفسك مجاناً: ابدأ دورة أونلاين قصيرة في "إدارة أعمال" أو "تسويق رقمي" على يوتيوب أو منصات زي Coursera (شهادات مجانية). ده هيخليك تخرج من الدائرة. من منظور إسلامي، الله سبحانه قال: "وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ". استغفر ربنا كتير، صلي ركعتين استخارة قبل أي خطوة، وادعي بالرزق الحلال. الصبر مفتاح الفرج، وأنت مش لوحدك. ابحث في فدني عن أسئلة مشابهة زي "كيف أغير المسار المهني؟" هتلاقي إجابات كتير. لو عايز استشارة متخصص، روح على صفحة الخبراء هنا: https://www.fedni.net/experts – في خبراء توظيف وتطوير مهني هيساعدوك. أنت قادر، ابدأ النهارده خطوة صغيرة وهتشوف الفرق.💪❤️
تم النشر الثلاثاء، ٣ مارس ٢٠٢٦
صلي على سيدك النبي 1000 مره باالصلاه الابراهيمية
تم النشر الثلاثاء، ٣ مارس ٢٠٢٦
لعرض السؤال في فدني اضغط هنا