أنا متزوجة من سنة ، مشكلتي هي إني بحكي كل حاجة لأهلي بتحصل بيني وبين جوزي من مشاكل حتي لو كانت مشكلة بسيطة اوي ، بعبر فيها باستياء شديد أوي وبتوصل لدرجة إني ممكن أشتم عليه قدام اهلي وبطلع فيه صفات وحشة كتيرة أوي ، وببالغ فيها كمان ، بالرغم من إني بحبه اوي وهو كمان بيحبني وهو إنسان كويس جدا وبيتقي الله فيا ، أنا بعد ما بحكي بندم أوي إني حكيت واتكلمت عن جوزي بالطريقة دي ، وكمان أهلي بيرجعوا يعايروني بالكلام اللي حكيته عنه ، أنا عايزة ابطل أحكي حاجة لأهلي كل مرة بقول مش هحكي لكن برجع وبحكي ، خايفة اوي أخسر جوزي وخاصة إنه كتير بينبه عليا إني ما أحكيش حاجة لأهلي وكنا هنخسر بعض بسبب الموضوع دا ووصل بينا الحال لطلاق، حاولت كتير اسيطر علي نفسي وما أحكيش حاولت إني أكتب مشاعري في ورقة ودفتر ولكن كلها محاولات فاشلة ، أنا يائسة وندمانة أوي وحزينة علي الحال اللي أنا وصلت له
شكلك من النوع الي لما بيغضب مبيعرفش يسيطر على نفسه بس حاولي لما تحصل مشكلة ابعدي عنك الموبايل خالص لأن لحظة الغضب هى الي متحكمه فيكي وبيبقى ردك سريع ومندفع في انتي شتتي نفسك تماما لحد ما تهدي حتى مثلا انزلي اتمشي ،قومي اعملي اى حاجه تشتتك على انك تروحي تشتكي
تم النشر الاثنين، ١٣ يوليو ٢٠٢٦
السلام عليكم ورحمه الله وبركاته. هنا محتاجين نسالك سؤال مهم جدا بعد ما بتحكي يعني هم يشرفني على حالك ويقولوا علشان ظروف مع بعض. حالها يعني في ازمات رغم الحاجات المميزات الكويسه اللي ممكن يكونوا هم شايفينها وكل الناس شايفينها احساسك ان انت بعد ما بتحكيهم مهم جدا نعرفه هو ايه ان هو ده؟ مش قادره اكيد بتدوري على حاجه وانت؟ بتحكي؟ وتصوري وبوجعها او متعوده عليها بيت اهلك. فكريه كده معايا علشان.
تم النشر الأحد، ١٩ يوليو ٢٠٢٦
حاولى تسيطرى على نفسك شويه مش لازم كل حاجه تحصل تحكيهالهم شوفتى مش كل مرة هيساندوكم هيجوا مرة من غير ما ياخدوا بالهم انهم هيعايروكى خلى بالك عشان الموضوع ممكن ده مش ممكن ده أكيد هيسوء حاولى تتكلمي مع نفسك ده ذكاء مش جنون. ربنا يسترها عليكى وعلينا.
تم النشر الثلاثاء، ١٤ يوليو ٢٠٢٦
وكونك لاحظتي إن في حاجه غلط فده أول خطوه لحل المشكله وبإذن الله هتقدري تحلي مشكلتك دي ،، لإنها لو فضلت موجوده مفيش حد هيتأذي غيرك . وغالبا اللي بيسأل عنك بيسأل من باب الاطمئنان عليكي وعلى حياتك بس دي خصوصيات ومش أي حد يستحق إنها تتقاله
تم النشر الجمعة، ١٧ يوليو ٢٠٢٦
غالبًا في احتمالين، الاحتمال الأول إن اللي قدامك بيسألوكي عن حياتك الزوجيه وعن خصوصيات فإنتي بتحكي علشان ماتحرجيش حد ،،، والاحتمال التاني هو إنك بتحكي لوحدك كده ، بس غالبا المنتشر بيكون الاحتمال الأول ،،، فإنتي لما حد يسألك صدي على طول حتى لو أقرب الناس ليكي ، ردي ردود عامة ما تدخليش في تفاصيل كتير وخليكي مركزه أوي في أي سؤال بتتسأليه هتلاقي إن معظم الاسئله عباره عن تدخلات واسئله مش من حقهم إنهم يسألوها ،،،
تم النشر الجمعة، ١٧ يوليو ٢٠٢٦
فعلا غلط كبير اوي حاولي وقتها تهتدي لو بتقولي كلام يزعل واستغفري كتير اووي وقتها وادعي دايما "اللهم أصلح ذات بيننا وألف بين قلوبنا واهدنا سبل السلام" واتفقوا مع بعض ان وقت الخناق بلاش مكابرة وانكم تتكلموا لحد ما توصلوا لحل وتتفاهموا .
تم النشر الثلاثاء، ١٤ يوليو ٢٠٢٦
انظري يا أختي بارك الله في جوزاك و أدام علي بيتكم السكينة و الاستقرار معني أنك بتحكي لأهلك أسرار بيتك ده غلط و غير كده بتركتبي كبيرة من أكبر الكبائر لما بتغتابي جوزك و ده الظاهر انك عارفاه و ندمانة عليه أسأل الله أن يغفر لك و يتوب عليك الحل بقي إنك تحطي في دماغك إن ده حرام و الإسلام نهي عنه إن أتيت به آثمت يعني مش مجرد غلط اجتماعي انت كل كلمة تقربك من النار أعوذ بالله قال ﷺ «إنَّ العبدَ ليتكلَّمُ بالكلمةِ، لا يرى بها بأسًا، يهوي بها في النَّارِ سبيعنَ خريفًا» طب التوبة أول حاجة بالإستعانة من ربنا تاني حاجة عايزة تفضي اللي جواك فضيه لجوزك نفسه أي حاجة هتقوليها ليه هو أحسن مليون مرة ما تقوليها عليه وراء ظهره و قدام اهلك تخيلي كده مشهد انت قاعدة مع جوزك في عزومة مع أهلك و أهلك عاملين يبصلوه من تحت لتحت شكل جوزك ايه و انت بتقولي متقي الله فيكي الأهل لما بيدخلوا في حياة أبنائهم بيخربوها لأن هما شافين الوضع من ناحية الشخص اللي ليهم فقط تحبي هو كمان يروح يحكي لأهله و يقول اللي انت بتقوليه عليه من وراء ظهرك؟ ساعة ما تفتكري كده هتلجمي لسانك من يقول أي حاجة ممكن توجعك لو اتقالت عليك ربنا يقويك و يصلحلك الحال
تم النشر الاثنين، ١٣ يوليو ٢٠٢٦
لعرض السؤال في فدني اضغط هنا