Nada Mohamed

اقرأى قرآن وصلى واهتمي بالاذكار وان شاء الله الأفكار الكتير دي تهدى ،انا زيك بفكر كتير اوي برضوا بس مفيش حاجه بتهديني الا كدا ،وبرضوا قللي كافيين لو بتشربي قهوة كتير أو كدا ،واشغلي نفسك دايما بأي حاجه،كل ما تيجي تفكري قومي اعملي حاجه

الحل ف التقبل ،تقبلى الفكرة وان انتى مش شخص وحش انتى بس عندك مشكلة ،تقبلى فكرة انك مريضة بوسواس لاكن انتى شخص كويس وزى الفل وربنا عالم بحالك وعارف انك كويسة ، انتى مشكلتك انك داخلة فى صراع مع المرض ومش قادرة تتقبلى الأفكار وشايفه نفسك وحشة وان دى افكارك انتى ،دى مش افكارك ولا دى انتى دا مجرد مرض ،صدقيني جربى تتقبلى كدا ومتدخليش فى صراع مع نفسك وهتلاحظى انك هديتى

ببساطه هو شخص مش ناضج ،الشخض الناضج مبيعملش الحركات دى

مش شرط عشان صحاب تبقوا علطول بتكلموا بعض أو علطول سوا ،خلى عندك جوانب تانيه فى حياتك تملى وقتك بيها بحيث انك متبقيش محتاجه أن يبقي دايما فى ناس جمبك أو كدا ، وعلفكرة حتى لو انتوا ف فترة كنتوا دايما بتتكلموا كل يوم هتيجى فترة كل واحد هيبقى مشغول بحاجه وهتتكلموا كل فين وفين ودا مش معناه انكوا مش صحاب لا عادى كل واحد لى حياته ،دا غير بقا بعدين لما تشتغلى أو لما تتجوزى كل واحده هتبقى ف حياتها ومشغوله مع عيالها وبيتها ،ودا ميمنعش انكوا تتوصلوا كل فترة ،بس تفكير أن صحابى لازم يكلمونى علطول وكدا دا غلط وهتتعبى لو فضلتى تفكرى كدا ،خليكى وسط تعاملى بالمعقول عشان حتى مينفروش منك ويقدروكى

وانتى اي ضمنك انك لما تموتى هيبقى اريحلك ما يمكن الى جاى هيبقى اصعب من الدنيا ( دا ف حالة انك قررتى تنهى حياتك وإزهاق الروح دى حاجه عند ربنا كبيرة ) طب هل انتى جاهزة فعلا انك تتسألى عن أعمالك ؟ ،انتى بتقولى أن فيه ناس حواليكى بتعمل معاصى وربنا سايبهم ،انتى حاسبه أن دى حاجه حلوة ؟! ابدا والله دى حاجه تخوف ( إن الله إذا غضب على عبد من عباده تركه لنفسه فهى كفيلة أن تهلكه ) عشان كدا كان النبى صلى الله عليه وسلم كان بيدعى ويقول لا تكلنى إلى نفسى طرفة عين ،تخيلى تفضلى تعملى فى ذنوب طول حياتك وتفضلى مغيبه لحد ما تموتى وبعد كدا تتفاجئ بأعمالك ،المفروض الى بيعمل ذنوب دا وحياته ماشيه عادى دا يبقى خايف ،قال الله تعالى : (نسوا الله فنسيهم ) ودا اسموا استدراج ربنا يسببه كدا لحد ما ييجى يتفاجئ بقا يوم الحساب ،برضوا فيه آية بتقول (فذرهم فى غمرتهم حتى حين ، أيحسبون أنما نمدهم به من مال وبنين نسارع لهم في الخيرات بل لا يشعرون ) أى أيظنون أن زيادتنا إياهم بالأموال والأولاد، دليل على أنهم من أهل الخير والسعادة، وأن لهم خير الدنيا والآخرة؟ وهذا مقدم لهم، ليس الأمر كذلك. { بَل لَا يَشْعُرُونَ } أنما نملي لهم ونمهلهم ونمدهم بالنعم، ليزدادوا إثما، وليتوفر عقابهم في الآخرة، وليغتبطوا بما أوتوا { حَتَّى إِذَا فَرِحُوا بِمَا أُوتُوا أَخَذْنَاهُمْ بَغْتَةً } ،دا انتى المفروض تكونى مبسوطة انك لما بتعملى ذنب ربنا بيبعتلك العقوبات فى وقتها عشان تفوقى من الغفلة وترجع تتوبى تانى وترجعيله ربنا مش عاوزك تبقى ماشيه فى ضلال ،كل دى افكار من الشيطان اوعى تسيبي نفسك ليها وبالنسبة للمشاكل الى عندك حاولى انك تلاقى طرق وكلمى اهلك عادى أو حوشى فلوس وروحى لدكتورة نفسية كويسة بس اسألى كويس قبل ما تروحى من غير ما تقولى لحد بس قرار الانتحار دا ابعدى عنوا تماما ،ربنا يطمن قلبك ويصلح حالك يا رب ❤️

بصي الشكل محدش بيتفق عليه ف الاغلب الا ناس قليلة جدا يعنى هتقابلي ناس تقولك انك حلوة وناس تانيه هتبقى العكس ،طب لى بنتأثر عشان اهالينا مزرعوش فينا اننا نحب نفسنا زى ما هي وللاسف بيقيسوا شكلنا على معايير المجتمع ،دا غير أن البنت حطينها ف قالب اسموا الشكل فبقت كل حكمها على نفسها بشكلها ،دى مشكلة مجتمع مش مشكلتك انتى لوحدك وكتير بنات اتعرضوا لنفس الى انتى بتقوليه دا ،بس تعالى بقا نشوف ربنا بيشوفنا ازاى ❤️ قالَ رسولُ اللهِ "صـلى اللهُ عليهِ و سلـم " : ( لا فرق بين عربي و لا أعجمي و لا أبيض ولا أسود إلا بالتقوى ) ربنا بيتعامل معانا بالى جوانا بقلوبنا والله دا يكفى أنك تبقى قلبك نضيف فربنا يحبك وطالما ربنا حبك هيحبب فيكى خلقه ،وخليكى مقتنعه أن الشكل رزق زى اى رزق وبيتفاوت من شخص للتانى لحكمة ما ،فيه ناس شكلها جميل جدا وفيه ناس شكلها عادى وهكذا بس مش لازم نبقى كلنا شكلنا حلو اوى ولا مثلا شرط عشان تتحبى انك تبقى ملكة جمال ،ولا كلوا الى اتحبوا كانوا حلوين اوى ، الواحد يرضى بشكلوا ويحمد ربنا عادى ،وانك توصلى لدرجة التصالح مع النفس وانك راضيه بيها دا اجمل شعور ساعتها مش هتهزك كلمة ،هتلاقى الى يحبك ويشوفك اجمل واحده بالنسباله ،لان الإنسان شكل وقلب وعقل وحاجات كتير بتبين ملامحه ،الانسان ارقى من انو نتعامل معاه كشكل خارجى بس والى بيفكر ف كدا ف هو انسان سطحى ،انا فاهمه شعورك اوى وانك متأذيه منهم وكلامهم جارحك ،بس خليكي مقتنعه انك جميلة ومش لازم تكونى جميلة بمعاييرهم هم يمكن انتى جميلة بمعايير ناس تانيه ،مش كل الناس ليهم نفس النظرة ،كمان دورى على حاجات تملى روحك زى انك تسمعى فيديوهات كويسة تفيدك تقرأي كتب مفيده تملى عقلك ،تقرأى قرآن وتقربى من ربنا وربنا هيغنيكي عنهم ،تتعلمى مهارات جديدة وبرامج مثلا كدا يعنى ساعتها هتشوفي اي حاجه تانيه تافهه ومش هيهمك التفكير السطحي

بصى هو لما ساب الاولانية كان متعلق بيها وعشان كدا دور على حد شبها عشان يخلص من التعلق الى جواه لانها مكنتش متاحه قدامه ساعتها فعشان يسكن التعلق الى جواه راح للى شبها شكلا الى هو انتى يعنى ،وتصرفه طبعا مؤذى وغلط لانو لو انسان واعى وعاقل مكنش هيظلم شخص تانى معاه ويعلقوا بيه لمجرد انو بيحاول يتجاوز علاقة قديمة المفروض كان يستنى لحد ما يتشافى من الشخص القديم وينساه بعدين يقرر يدخل حد حياته لو انسان واعى هيفكر كدا ،فمتزعليش يا حبيبتى الموضوع كلوا مشكلة عند الشخص نفسوا وحاجات نفسية عندوا ،وانتى مفكيش حاجه وحشة ولا غلط واحمدى ربنا انو بعدو عنك اصلا

انا معاك فعلا ان الاغلب كدا ،بس فيه برضوا إلى بترضى عادى ،بس يعني لما تيجي تختار متروحش لواحدة مثلا عايشه عيشه مرفهه على الاخر ،يعني اختار واحدة قريبة من مستواك المادى وبرضوا لو واحدة عندها دين بتبقى تتطلعاتها المادية والدنيوية بتبقى أقل من واحدة معندهاش دين وكل همها الدنيا بس ،عامة هو رزق ادعى ربنا يرزقك بواحدة عاقلة وراضيه ،بس من ناحية موجودين ف هما موجودين عادى

ولي يحس نفسه مظلوم ما دا دوره انو يوفر لاهل بيته احتياجاتهم ودى فى فطرة الرجل اصلا دا معروف يعني اى راجل اول حاجه بيفكر فيها هى حماية أهل بيته ماديا ومعنويا ،انا بقول الست بتحس انها مظلومة عشان بتشيل دورين ، وانت طالما معاك مبلغ تقدر تفتح بيه بيت وتبدأ حياة حتي لو مش هتبقى أعلى حاجه دلوقتي فتمام وهى برضوا المفروض تسهلها عليك ومتطلبش حاجات مش أساسية مثلا وتحاول توفر معاك وبعد كدا ربنا هيرزقك مع الوقت بإذن الله طالما بتسعى يعنى

هو مش المفروض الى بيتجوز يبقى معاه قدر من المال يخليه يقدر يفتح بيت (من استطاع منكم الباءة فليتزوج )،فعادى ابدأ حياتك بكدا واختار واحدة راضيه مبتفضلش تقارن مثلا وتتطلب منك اكتر من استطاعتك ، وربنا بعد كدا هيرزقك ،لاكن بصراحه اغلب الي بشوفهم ماشيين بالمبدأ الى بتقول عليه والنظام دا بيتهم مبيبقاش سعيد ولا عيالهم بيبقوا مبسوطين وبيبقى فيه مشاكل كتير والست بعد فترة بتحس انها مظلومة من كتر الضغط الي محطوطه فيه وبالتالي مش هتعرف تسعدك ولا تسعد بيتها

يعنى حضرتك عاوزها تشيل مسؤوليتين مع بعض عشان متبقاش بالنسبالك استغلاليه،يعني عاوزها تعمل دور الست وتهتم ببيتها وبأطفالها ،وتعمل دور الراجل كمان وتجيب فلوس وتشتغل ،طب ما لما الراجل يفكر كدا يبقى هو الاستغلالى! اعتقد أن دا العدل ،انت تقوم بدورك وهى تقوم بدورها ،ساعتها البيت هيكون متزن

ممكن تكون فيه حاجه معينه مش قادر تتخطاها فمش مخلياك عارف تتبسط مثلا؟

عشان اغلب الاهالى مربيين عيالهم ومتعودين على قدر معين من الدين فبالنسبالهم اى حاجه زايده عن كدا تبقى غريبة ،شايفين أن الزيادة فى الدين هيتعارض مع الدنيا زى انك لو اتنقبتى مش هيجيلك عرسان مثلا (دا اغلب تفكير المجتمع) او مثلا الشاب لو ركز فى الدين هيقصر على دراسته وشغله ،اغلب الأهالى تركيزها الأكتر على الدنيا ومش متعودين أن الدين ياخد حيز كبير من حياة الإنسان للاسف يعنى

اتقدم لواحده بنفس درجة تدينك وهى هتقبل غير كدا صعب تلاقى حد يقبل

العفو ،الله يهدى بالك ويطمنك ❤️

ربنا فاتح باب التوبة ف اى وقت ولأى حد مهما بلغت ذنوبه لعل ربنا يريدك تقربى منوا فأتحطيطى فى الابتلاءات دى فى حياتك عشان تفهمى مدى وحاشة الدنيا والإنسان بعيد عن ربنا وبعيد عن ما يأمره ،توبى وخلى عندك إرداة قوية ومتضعفيش وحتى لو ضعفتى حاولى كتير لحد ما تتوبى واهم حاجه الدعاء وربنا مش هيسيبك طالما شايف جواكى الإصرار على التوبة ،الله يهديكى إلى طريقه ويرزقك التوبة النصوح يا رب ❤️

فكرة انك حاسه بالذنب دا يدل انك شخص كويس ،الوحش مبيحسش بوحاشته ،انتى فعلا الظروف الى خلتك كدا بس برضوا متخليش الظروف تتحكم فيكى الشيطان اصلا مستغل الى حصلك وعاوزك تعيشى طول حياتك فى كرب وحزن وفى ضلال ،والله فعلا كلها افكار من الشيطان عاوز يضلك خليكى واعيه ،قربى من ربنا دى الحاجه الوحيدة إلى هتحميكى ، ( ومن لم يجعل الله له نورا فما له من نور ) الحياة بالقرب من ربنا نور فعلا إسعى لكدا

كل ما تعملى كدا افتكرى أن عيالك هيعيشوا طول حياتهم عندهم أمراض نفسية اكيد انتى متحبيش عيالك يبقوا كدا اتقى الله فيهم دول هبة من عند ربنا ونعمة وهتتسألى عنهم حافظى على نفسيتهم عشان لما يكبروا يدعولك ،النفسية اهم حاجه عند البنى ادم ، والله الإنسان لما بيكبر وطفولته وحشة بيعانى طول حياته فحاولى تغيرى من نفسك ،

فيه واحد على اليوتيوب بيتكلم عن الأمراض النفسية وكدا كويس جدا اسمعله بجانب محاولاتك يعنى ،هو اسمه هانى عرفه

انت قولت اهو بعيد عن ربنا ،البعد عن ربنا بيخلى الواحد متلخبط وتايه وكاره نفسه ،انا لما كنت بعيده عن ربنا كانت نفسيتي مدمرة وكل شوية بعيط وكارهه نفسى وبفكر ف الماضى كتير ومش راضية عن حالى والله ما فيه حاجه خليتني احسن الا القرب من ربنا ،حاول كتير بكل الطرق وربنا هيساعدك ،وروح لمعالج نفسى بيربط الدين بالعلم بجانب محاولتك للقرب من ربنا

التسويق الالكتروني مجال كبير ومحتاج تركيز علفكرة ف عشان كدا بقولك ركز ف مجال واحد عشان تقدر تنجح فيه

الكورسات الي بشهادة عندك كورسيرا ،وعندك يوديمى برضوا

التسويق الالكتروني حاجه وتصميم الصور والحاجات دى حاجه تانيه تصميم الصور والحاجات دى دا اسموا جرافيك ديزاين أما التسويق دا انك تقدر توصل المنتج بتاعك للناس وكدا ،ف ركز ف مجال واحد واتعلمه عشان متتلخبطتش وبعدين ابقى اتعلم مجال تاني لو حبيت

صحيح الشهادة ممكن تكون مهمه عادي لاكن انت لو اجتهدت والcv بتاعك كان كويس وشغلك نضيف وحلو هيشغلوك عادى ،ف اجتهد اوي لحد ما توصل لمرحلة أن شغلك يبقي حلو ونضيف ساعتها هيبقى سهل تلاقى شغل

انا ليا صحاب هيتخرجوا السنادى من حاسبات ومعلومات وشاطرين دراسيا كدرجات وكدا بس لسا مش جاهزين لسوق العمل ولسا بياخدوا كورسات برا الكلية تعلمهم البرمجة ،فحتى الى بيدخلوا كلية دا مش كافى أنهم يبقوا جاهزين يشتغلوا دول بياخدوا كورسات برا اصلا لان ف الكلية محدش بيعلم حد حاجه ،الموضوع كلوا شهادة لا اكثر ،وفيه ناس زمايلهم مش شاطرين دراسيا لاكن اتعلموا مع نفسهم وفيه الي اتعلم ع اليوتيوب مع انو ف كلية حاسبات ومعلومات وبيشتغلوا من وهما ف الكلية والله ،الموضوع كلوا اجتهاد شخصى

فيه مجال تاني برضوا ناس كتير بتتعمله ولي شغل ، وهو التصميم الداخلى وفيه كورسات كتير على النت ،محتاج تتعلم برنامج 3D max وأساسيات التصميم

والله انا اعرف ناس كتير كملوا تعليمهم عادى واتعلموا مجالات مش تبع كليتهم اصلا ونجحوا فيها واشتغلوا ،الموضوع معتمد على اجتهادك انت ،وطالما مش هيبقى فيه كلية هيبقي عندك وقت اكتر انك تتعلم ،انا علفكرة ف كلية اهو وقربت اتخرج بس مش عاوزه اشتغل تبع الكلية ويتعلم مجال تانى اصلا ،هقولك أمثلة لمجالات ممكن تاخد فيها كورسات أو ممكن تتعلمها من على اليوتيوب ،البرمجة طالما انت كويس فيها كمل ،فيه مجال كدا اسموا front end developer دا عبارة عن ان Ui designer بيديك التصميم الي عمله للابلكيشن أو الويب وانت بتحوله لأكواد عشان توظفه وممكن تتعلم Ui/UX design دا عبارة عن تصميم وجهات المواقع والابلكيشن من غير اكواد

لما ميهتمش بيها وميقدرهاش وميعاملهاش بإحترام ولا يقولها اى كلمة حلوة

على أي يا حبيتي ،ربنا يكتبلك الخير يا رب ❤️

لا بلاش تبعتى لانوا هيقولك نفس الكلام فملهاش لازمه

خلاص بلاش كلام معاه لو من نصيبك هيجيلك بعدين لو عاوزك فعلا يعنى زما بيقول

ممكن فعلا يكون مش عاوز يعلقك بيه ويعلق نفسوا بيكي لو هو لساله كتير وظروفه مش مناسبه دلوقتى لخطوبة أو كدا لو هو شخص محترم وكويس يعنى ،بس عامة لو عاوزك فعلا بعدين هيرجع تانى يقولك اخطبك بس احسنلك فعلا لو مش جاهز بلاش تتكلموا وتعلقوا بعض ، وفيه احتمال تانى ،انو فيه نوعية كدا من الرجالة بتحب المطارده واول ما توقع البنت ويلاقيها متعلقه يمشى ،الي هو شعور انوا عرف يخليكي تتعلقى بيه رغم انك كنتي ف الاول رافضه خالص وهو مثلا من النوع الى الرفض بيعلقه اكتر وبيخلي عندوا تحدي انو لازم يوصلك برضوا ،ولما وقعتى خلاص بقا هو وصل للشعور الى عاوزه ،الله اعلم برضوا كلوا ع حسب شخصية الواحد يعنى

ومسألتهوش لي

طبعا هى حاجه صعبه جدا عليه اعذريه لاكن متسبهوش ابدا حتى لو بيقولك روحى هو ميقصدش لاكن الحالة النفسية الى هو فيها مخلياه كدا وانو مش قادر يتعامل ،خليكي معاه واستحملى الفترة دى وحاولى تهونى عليه واديله برضوا مساحة انو ياخد وقته فى الزعل وبعد فترة هيرجع يفوق تانى إن شاء الله

بصي ممكن اكتب اكونت الفيس بتاعي هنا ابعتيلي رسالة وانا هبعتلك رقمي هناك ،بس انا يعنى هكتبه هنا وامسحه بسرعه

المشكلة ان مفيش هنا رسائل خاص 😂😂💔

حبيبتى تسلميلى مبسوطة انك اقتنعتى❤️،لا مش دكتورة نفسية بس انا مريت بحاجات شبه كدا يعنى تجارب بس وربنا بيفهمنى منها حاجات كتير ❤️ اكيد معنديش مانع خالص 🤍🤍🤍

ابقى ادخلى اتكلمى انتى عادى كل فترة ،وبما انك داخله تالته ثانوى فخليكى جاهزة أن كل واحده فعلا بعدين هتبقى مركزه ف دراستها اكتر متستنيش انهم هيبقوا معاكى علطول وانتى كمان خليكى كدا وركزى فى دراستك اكتر عشان متديش لحد اهتمام كبير وترجعى تتصدمى ف الاخر ، بلاش فكرة اننا لازم نتكلم علطول ونبقى مع بعض علطول عشان متعطلوش بعض ،اتعاملى بس وسط دا احسنلك

حبيبتي على اي بس ❤️❤️ حلى الموضوع بينك وبين نفسك الاول لو حلتيه وعالجتيه جواكى مش هيفرق معاكى تثبتلهم حاجه وكلامهم مش هيبقى مهم اصلا بالنسبالك ❤️ اى حاجه ف الدنيا ممكن تتصلح والانسان فطر على انو يحب شكله ويتقبلها ويقدرها بس بسبب الى بيتعرضلوا إحساسه لذاته بيتغير فإذن ممكن يرجع تانى يحبها ويتقبلها الموضوع مش مستحيل 🤍 ،جزانا وإياكم يا رب ❤️❤️

تلقائية وعاقلة ف نفس الوقت عارفه اى الى يتقال واى الى ميتقالش

هو ممكن يتطور بعد كدا ويبقي وسواس قهري لو سبتى نفسك لي ، الوسواس القهري بيبدأ بحاجات بسيطة وينتهى بمرحلة صعبة ودا بيعتمد على تعاملك معاه ،كل ما تسيبي نفسك للأفكار دى وتمشى وراها كل ما تزيد عليكي ،الموضوع عاوز إرادة لما تجيلك الأفكار حاولى بكل الطرق انك متسمعلهاش وعارفه أنها مش حاجه سهلة بس دا حل الوسواس انك تحطى حد ومتهاودهوش

بتبقى انتكاسه وبالنسبة للأفكار ف الأفكار دى بتيجي لناس كتير حتى أكثر الناس إيمانا بتجيلهم وايام الرسول صلى الله عليه وسلم كان فيه ناس بتشتكى أن بيجيلها الأفكار دى حتى فيه حديث بيقول (يأتي الشيطان أحدكم فيقول: من خلق كذا؟ من خلق كذا؟ حتى يقول: من خلق ربك؟فإذا بلغه فليستعذ بالله ولينته))؛ ،كل دى وساوس من الشيطان متسيبيش نفسك ليها كل ما تجيلك قولي اعوذ بالله من الشيطان الرچيم والهى نفسك بحاجه تانيه ،قال الله عز وجل: {إنما النجوى من الشيطان ليحزن الذين آمنوا} ،هو بيخليكي تفكرى ف كدا عشان يدخل الحزن على قلبك ليصدك عن طاعة الله وعن ذكر الله ويكرهك فى الدين ،وبالنسبة انك مش عارفه تقربى ف الحل انك تقومى تشدى نفسك تقرأى قرآن مثلا متفكريش قبل ما تقومى لا روحى علطول افتحى المصحف بدون تفكير ولا تجهيز ،هتلاقيكى ماشية ف الموضوع ،لاكن لو قعدت تفكري اقوم ولا مقومش وتخلى عقلك يقرر هتحسى بفتور ومش هتقومى ، كمان عاوزه اقولك حاجه ،الانسان مش لازم يعرف كل حاجه ،فيه حاجات غيبية عمرنا ما هنعرفها لحكمة ما ، الانسان لازم يعرف قدر عقله انو فيه حاجات فوق مستوى إدراكه مش هيقدر يفهمها دلوقتى ،( والله يعلم وأنتم لا تعلمون ) ربنا الوحيد العالم بيها

هو اصلا لا ينفع يكلمك ولا يكلمها ،ابعدى عن وجع القلب دا والله كلها حاجات مؤذية ومترضيش ربنا ،وهو لو عاوزك فعلا هييجى يتقدملك

هو طبيعي يبقي فيه ضغط وخوف وتوتر قبل نتيجة الثانوية كلنا كنا كدا ،هى فترة تقيلة وصعبه وهتعدى والله وهتتسنى وهتقعدى تضحكي عليها كمان بعد سنين ،مفيش حل تتجاوزي بيها الفترة دى غير انك تحافظي على علاقتك بربنا وتدعى كتير وتقرأى قرآن دى الطريقة الوحيدة الي بتخفف الضغط عن الواحد شوية ،لن يصيبنا إلا ما كتب الله لنا ،كلها اقدار مش بإيدنا وزما ربنا ساعدنا نتجاوز حاجات كتير فى حياتنا هتتجاوزيها هى كمان بكل نتايجها ❤️

اتعرف على ناس اجتماعية ،متبقاش قافل على نفسك عادى اكسر الحاجز بتاع انك مش عاوز تتكلم أو كدا لان اغلب الناس مبتحبش تكون هى الي تبقى المبادرة ،يعنى ممكن تبادر بالتعامل انت ولو شخصيتك حلوة هيحبوك ،اقصد متستناش ان الى قدامك هو الى ييجى يكلمك مرة بمرة هتلاقى بقا عندك معارف

ما الناس مش وظيفتها تفهمنا والله لو ربنا رزقنا بحد فاهمنا فدى حاجه كويسة لو مفيش خلاص مش حاجه أساسية ،المهم انا احاول افهم نفسى ، وعاوزه اقولك أن أغلب الناس بتنفر من كثر الشكوى والشخص الى دايما متضايق وكدا ،لو فيكي الحاجه دى غيريها ،انا كنت فاكره أن انا اول ما دخلت الكلية كنت كارهه الكلية جدا وكنت دايما بشتكى ودايما زعلانه ومكنش فيه حد بيفضل معايا ولا كنت عارفه اكون صحاب بعد فترة مع تأقلمى مع الكلية غيرت من نفسى وبقيت مبشتكيش كتير وكونت علاقات كتير أغلبها او يمكن كلها سطحيه لأن انا كنت حابه انها تبقى كدا اصلا ، ف ايوا كتر الشكوى وكتر التذمر بيبعد الناس عنك وبينفرهم ، وكمان مش لازم يبقي فيه حد قريب منك جدا لو انتى معدتيش بتثقى ف حد فممكن تكونى علاقات بس تكون سطحييه بس ،برضوا العلاقات السطحية بتبقى مريحه ،لو ملقتيش الشخص الى شبهك يبقي اوعى تقربى من حد ،تعاملى عادى بس سطحى ،وركزي ف حياتك اكتر وانك تطورى شخصيتك وتتطورى من نفسك ومرة بمرة هتلاقي ربنا رازقك بناس تفهمك الحاجات دى بتبقى ارزاق برضوا ، ف ادعى برضوا ربنا يرزقك ، ولو مفيش حد الدنيا فيها حاجات كتير تعمليها تغنيكى عن الناس

انا فعلا حسيت بكدا كتير جدا ، اعمليلك انتى حياة ليكى تفرحك ،ودورى على حاجات تبسطك واعمليها ،اتعلمى حاجات نفسك تتعلميها ،املى حياتك ،احفظى قرآن وشوفى فيديوهات تفسير وفيديوهات تفهمك دينك، الإنسان بطبيعته بيحتاج ناس حواليه ،لو مفيش ناس استبدليهم بحاجات تملى وقت فراغك ،وصاحبى ناس جديدة ،ممكن تشتركى مثلا فى جمعيات خيرية زي احلى شباب للبنات بس ،فيه منهم بنات كويسة كتير والله ممكن تتعرفى على ناس منهم وتدخلى حياتك ناس جديدة لو انتى حابه، أغلبنا حس بكدا انتى مش لوحدك ❤️

ركز فى مستقبلك وانجح فيه خلى دا هدفك دلوقتى واملى يومك ،انا عارفه أن الحاجات دى بتأثر ف الواحد بس متسيبش نفسك لدماغك ومتفضلش عايش دايما دور المظلوم ،عادى تقبل أن فى الدنيا هيحصلك صدمات وحاجات كتير تضايق ،خاصة انك بادئ الموضوع فى سن صغير طبيعى ينتهى بفشل لأن الطرف التانى كمان صغير هى كمان مكنتش واعيه للى هى بتعمله ،اصبر على نفسك ومتسعجلش على الارتباط دلوقتى انت قدامك حاجات كتير جدا تعملها ،وخليك صريح مع نفسك ،انت حصلك كدا عشان من البداية مشيت فى طريق لا يرضى الله منتظر اى ،واعتبر الحاجات دى تجارب ليك عشان تبقى شخصية واعية اكتر وفاهمه اكتر متفضلش تفكر انك اتخانت أو انجرحت طول الوقت ،الحاجه دى بدل ما تخليك دايما متضايق ،تخليك بتتقى الله فى حياتك اكتر لانك خلاص فهمت نتيجة الأمور دى اى ، اى ذنب فى الحياة لى عواقبه حتى لو توبت الموضوع مش بينتهى فى يوم وليلة ،عواقب الذنوب بتستمر فترة ،فبعد كدا اتقى الله فى حياتك ( ومن يتق الله يجعل له مخرجا و يرزقه من حيث لا يحتسب ) ،(ومن أعرض عن ذكرى فإن له معيشة ضنكا ) ،وخلى بالك الدين مش صلى وبس يعنى مش انك بتصلى بس يبقى لا محدش يقولى قوى علاقتك بربنا وانا علاقتى زى الفل محدش يكلمنى فى الجانب دا ،الدين حياة ،مش معنى أن الإنسان بيصلى انو خلاص كدا عمل الى عليه ،لا لازم يسعى كل يوم أن أمور حياته كلها تبقى مطابقة للدين