أول حاجة شايفة إنك لازم تعملها إنك تلجأ لمتخصص نفسي يساعدك أما رأيي الشخصي انت راجل بمعنى الكلمة، ربيت نفسك وعلمت نفسك وشغّلت نفسك وخطبت كمان رغم إنك طول عمرك وحيد بل وبتتعرض للتعذيب كمان اللي انت وصلت له فيه ناس كتير عايشين حياة طبيعية في حضن بابا وماما ما حققوش ربعه فانت لازم تكون فخور بنفسك وما تضيعش كل تعبك دا ع الفاضي نصيحتي اللي متأكدة إن تنفيذها صعب بس شايفة إنها هتحسن نفسيتك إنك تساعد والدك حتى لو بتكرهه، وحاسة كمان إنك ممكن تكون رغم كل دا مش بتكرهه بدليل إنك أول ما شفت حالته صعبة حياتك وقفت رغم إنها كان ماشية رغم كل اللي عديت بيه، هو دا المشهد الوحيد اللي كسر جواك حاجة يمكن عشان لسا ليه في قلبك أي ذكرى كويسة ولو بسيطة أو عشان هو بس أبوك عارفة إن الكلام سهل والفعل صعب بس انت عديت بالأصعب وتجاوزته ووصلت للي غيرك في ظروف طبيعية ما حققهوش فأكيد هتقدر تعدي المحنة دي كمان بس استعين بالله ربنا يعينك ويرفع عنك البلاء والإدمان ويرزقك حياة سعيدة تعوضك عن اللي عشته وتاني لازم متخصص نفسي لأنك اتعرضت لصدمة قوية
ربنا يآنس قلبك ويعوضك خير ويرزقك من حيث لا تحتسب بأسرة جميلة وناس صادقة تكون سند ليك
تم النشر الأحد، ١٤ يونيو ٢٠٢٦
كلامك مفهوش اي غلط حضرتك بتشجعيني بس انا عايز اوصلك أن اللي زي بيعيش ويموت لوحده طب انتي عارفه من كتر م انا لوحدي خيف اموت ومحدش يحس بيا وبنسبالي الحشيش بيخليني مفكرش وعايز اقولك في اخر سنتين شكلي كبر جدا بس انا مش عارف اخد قرار ونا دايما زعلان علي نفسي أن انا بقيت بشرب بس اللي بيهون عليا أن انا ابقا مبسوط
تم النشر الأحد، ١٤ يونيو ٢٠٢٦
@السائل فهمت قصدك، انت شايل هموم وصدمات سنين طويلة، واللي بتمر بيه أكبر من إن يتحمله شخص لوحده مهما كان. أتمنى تحاول تتواصل مع متخصص يساعدك، لأن اللي مريت بيه محتاج دعم حقيقي ومش طبيعي تشيل كل دا لوحدك. ولو أي كلمة مني ضايقتك أو حسستك إني مش فاهمة اللي بتمر بيه أو بقلل منه فأنا بعتذر، وبتمنى لك الخير وصلاح الحال.
تم النشر الأحد، ١٤ يونيو ٢٠٢٦
هحكيلك جزء صغير جدا انا فعلا بمر بفتره صعبه جدا بس عايز اقولك أن انا طول عمري بحاسب علي شغل مش بتاعي طفل كان حلمو يعيش وسط أهل ولما ملقاش ده واتمرمط في الشارع فهم أن الدنيا ليها رأي تاني في حياتي وفضلت ثابت بس كل يوم كونت بقعد اسأل نفسي واقول انا عملت اي وكونت دايما بقول الحمدلله بس عارفه انا زعلان عشان مليش حظ أو مليش نصيب تكمل ف اي حاجه عمتا ولا أهل ولا حب ولا ليا اي حاجه في الدنيا خلاص بردو انا جبل أن انا استحملت كل ده خلاص انا بتفرج علي حياتي وحالف بالله زي متبجي انا مش هصلح طب عارفه خطيبتي نفسها بعد مسبتها بأسبوع عرفت واحد تاني طب انا مش فاهم هوا انا قلبي طيب لي ده انا زعلان علي نفسي أن انا مكونتش وحش وعايز اقولك انا صحبي في الرحله دلوقتي هوا الحشيش فعلا بقا بيخليني أبقا أوسخ رد فعل ليهم واللي عملوا فيا وفي عز زعلي علي نفسي والرحله بقت فرديه وكلها ضغوط انا قاعد بتفرج وفي صمت الحشيش هوا اللي بقا بيخليني أقدر أعدي اليوم فهمتي حاجه؟؟؟
تم النشر الأحد، ١٤ يونيو ٢٠٢٦
@السائل انت لو اقتنعت بالهزيمة ما كنتش هتيجي هنا وتسأل ازاي تتجاوز، ممكن تكون بتمر بفترة ضعف زي أي إنسان بس دي مش طبيعتك، ممكن تكون محتاج حد تتسند عليه زي صاحب قريب أو خطيبتك لو فيه مجال تشرح لها اللي حصل وتحاولوا ترجعوا تاني. المهم يعني انت خسارة في الإدمان، ربنا يقويك ويقدرك تخرج من اللي انت فيه💪🏻
تم النشر الأحد، ١٤ يونيو ٢٠٢٦
مفيش حاجه معملتهاش والعزيمه لما تبقا موجوده بنفذ بس خلاص المره دي انا اقتنعت تماما بالهزيمه
تم النشر الأحد، ١٤ يونيو ٢٠٢٦
لعرض الإجابة في فدني اضغط هنا