السلام عليكم، أولًا الدخول في علاقات مش حل للفراغ العاطفي والمشاكل من وراه هتكون أكبر بكثير من شعورك الحالي. ثم ليه معتبر عدم قدرتك على الكلام مع بنت عشان تدخل في علاقة معها دي حاجة وحشة، بالعكس أنا شايفة ربنا بيحميك من الحرام فبلاش تستمر في الإصرار على فتح الباب ده بكل مشاكله. ثانيا، أنت نفسك قلت إنك طالب وحالتك المادية تعبانة، يعني مفيش أصلا إمكانية حالية للزواج... فإيه الفائدة من دخول علاقة غير رسمية مع بنت؟ غير إنها أصلا هتكون حرام... هتعملوا إيه؟ سد فجوة زي ما قلت؟ هتفضلوا تحبوا في بعض مشاعريا وتعيشوا حلاوة البدايات والكلام ده؟ وبعدين؟ لو الشيطان أصلا متدخلش وحرفكم عن الطريق ووقعكم في غلط أكبر، تفتكر الباقي صح؟ بعد كده تفترقوا بعد ما حد منكم قلبه انكسر أو خسر أحلى مشاعره مع شخص مش مكتوب له ويرتبط بعد كده بشريك حياة ميقدرش يعطيه اللي سبق وعاشه مع حد تاني وتبقى حياتهم سوا ناقصة؟ معتقدش حاجة من دي كويسة. ** أخيرا، كل ما نفسك توسوس لك ترتبط ببنت، فكر في أختك أو لو مش عندك أخت... فكر في قريبة لها عندك نفس مكانة الأخت اللي بتغار عليها ومستحيل تسمح لولد يبص لها ولو بنظرة عابرة، تفتكر هتبقى مبسوط لما ولد ياخدها سد فجوة يملأ بها فراغه العاطفي وبعد كده يتركها لأي سبب. أعتقد لا ترضاه أبدا. يبقى نفس الكلام لا ترضاه لبنات الناس... هم كمان بنات وأخوات لرجال زيك. ** شوف طرق عملية أصلح لملأ يومك بحاجات نافعة ووقتها هيقل جدا شعورك بالفراغ العاطفي واشتغل على مستقبلك عشان تبقى جاهز في أقرب وقت للارتباط الرسمي ووقتها تقدر إن شاء الله تختار شريكة الحياة الصح وتبدأ معها حياتك في الحلال. بالتوفيق.
لعرض الإجابة في فدني اضغط هنا