السلام عليكم
انا بنت عندي 24 سنة اتخطبت مرة ومحصلش نصيب ودلوقتي اتخطبت تاني ولكن انا مش قابلة الشخص أبدا ولا مرتاحة بالرغم من وجود فيه صفات كل بنت بتتمناها ولكن مشكلتي هي النفور من ناحيته ووصل الحال إني مش بحب أشوفه ودا بسبب اني وافقت مع اعتقادي ان مع الوقت هتأقلم ولكن للأسف نفوري زاد منه بالإضافة لشخصيته الساذجة والكذب في بعض الأمور وحركات طفولية ، أعمل اي وأمر الفركشة صعب لاني مش صغيرة وعايشة في مجتمع ريفي وأهلي صعبين ولكني كل يوم حالتي النفسية بتسوء 💔
السلام عليكم، المهم في الخطبة والزواج هو قبولك وارتياحك للطرف الآخر وتأكدك من إنه الشخص اللي تقدري تكملي معه حياتك. إذا مش متقبلاه وراغمة نفسك عليه لمجرد خوفك من ضغط أهلك إو كلام الناس فأنتِ بتضحي بسنين عمرك الجاية. متدخليش زواج أنتِ رافضاه نفسيا، تعبك دلوقتي هيبقى مضاعف بعدين. استخيري مرة واتنين وتلاتة... إذا كان فيه خير ربنا هييسره وإذا شر هيبعده عنك. واقعدي مع نفسك ووازني مشاعرك واكتبي مزايا وعيوب الشخص وادرسيه كويس بعيدا عن مشاعرك، وشوفي لفترة كده إذا لسه رافضاه أو نفورك مقلش ناحيته اتكلمي بصراحة مع أهلك، محدش هينفعك أو هيهتم لو عشتِ مش مرتاحة في زواجك مستقبلا. واهدي كده مفيش حاجة تستحق تتعبي نفسيتك عشانها والزواج مش قطر عشان تخافي يفوتك فتقبلي بأي حد. صلي استخارة وربنا يختار لك اللي فيه الخير لك.
تم النشر الأحد، ٣١ مايو ٢٠٢٦
بصي يا بنت الحلال مفيش حاجة اسمها أصل المجتمع ريفي وأصل سني ٢٤ سنة والكلام ده كله جوازة من غير قبول وراحة نفسية بتبقى جنازة مش جواز والنفور اللي إنتي حاسة بيه ده مش هيقل بالعكس ده هيزيد بعد الجواز وهيبقى عذاب ليكي وليه فركشة الخطوبة دلوقتي بأقل الخسائر وكلام الناس يومين وهينسوه ومحدش هيعيش عيشتك ولا هيتحمل نكدك وتعبك النفسي غيرك إنتي اقعدي مع حد عاقل وكبير في العيلة يقنع أهلك وخدوا موقف شجاع واطلعي من الموضوع ده قبل ما تلاقي نفسك في قسيمة جواز وصعب تخلعي منها متظلميش نفسك ولا تظلمي الراجل معاكي عشان خايفة من الناس وصحتك النفسية وراحتك أهم من أي ضغط وبكرة ربنا يعوضك باللي ترتاحيلو بجد ويرتاح معاكي... وبعدين انتي سابه لي اهم حاجه صلاه الاستخاره صلى وشوفي والله تلقيني الموضوع تمام كملى لقيتي لسه مفيش قبول خلاص أنهي الحوار ... وجد والله ربنا يحفظك ويسعدك اعرف ناس عندنا وصلو 26 و27 واكتر من كدا واتزوجو والدنيا تمام معاهم
تم النشر الأحد، ٣١ مايو ٢٠٢٦
لازم المصارحة مع اهلك واصلي استخارة طالما مفيش قبول خلاص انتي بتقولي انك حاليا رافضة الزواج مش بالإكراه ابدي اتكلمي مع مامتك ثم حد من قرايب مامتك باباكي كمان قولي رايك هما هايحوالوا يقولي ليكي كلام انك تكملي اقتنعتي تمام متى اقتنعتي خلاص استخيري الأول
تم النشر الاثنين، ١ يونيو ٢٠٢٦
وعليكم السلام ورحمة الله. أنا ذكية، وأقدر تمامًا شعورك بالنفور والضغط النفسي ده، خاصة في مجتمع ريفي ومع أهل صعبين. الزواج في الإسلام يجب أن يكون على راحة وتوافق، مش مجرد تأقلم قسري، فمشاعرك مش غلط. ركزي على تمكين نفسك: ابدئي بتقييم هادئ للأمور اللي بتزعجك (الكذب والسذاجة) واكتبيها، ثم حاولي مناقشة أهلك بطريقة هادئة ومدعومة بأمثلة عملية عن عدم التوافق، مع التركيز على مستقبلك النفسي. لو الفركشة صعبة دلوقتي، فكري في خطوات تدريجية زي طلب فترة تأجيل أو استشارة شخص موثوق من العائلة للتدخل. صحتك النفسية أولوية، فلو الحالة بتسوء يوميًا، أنصحك بشدة تستشيري متخصص نفسي أو اجتماعي من خبراء فدني عبر https://www.fedni.net/experts لدعم مخصص. كمان ابحثي عن أسئلة مشابهة في فدني لتستفيدي من تجارب أخرى. أنتِ قادرة على اتخاذ قرار يناسبك، وأنا هنا لدعمك.
تم النشر الأحد، ٣١ مايو ٢٠٢٦
مفيش حاجه اسمها فيه مواصفات كل البنات تتمناها،،،، أهم حاجه إنتي تسألي نفسك هل فيه الصفات اللي إنتي بتحبيها وهتقدري تتعايشي معاها ولا لأ ،،،
تم النشر الأحد، ٣١ مايو ٢٠٢٦
صارحيهم صارحيهم صارحيهم ... ولا تتنازلي .. وإن لم يوجد استجابة فحقك محفوظ يوم القيامة ولا يضيع
تم النشر الأحد، ٣١ مايو ٢٠٢٦
طالما مش مناسب اتركيه ، وياريت تكوني *واضحة* يعني بلاش حركات إنك تطفشيه بالطريقة والحاجات دي ، عرفي أهلك إنك مش شايفاه مناسب ومش هتكملي معاه ،، طبيعي هينتقدوكي ويقولوا كلام مش هيعجبك بس عادي كلامهم أفضل بكتير من إنك تتجوزي حد مش شبهك أو تتجوزي وتنفصلوا
تم النشر الأحد، ٣١ مايو ٢٠٢٦
لازم تفهميهم إن دا نصيب....عارفه إن فيه بيقولك قطر الجواز هايفوتك والكلام ده مع إن مافيش محطات أصلا 😂 أحلي ناس أهل الريف احكي همك لربنا ف صلاة استخاره بالليل كده وإن شاء الله لو فيه خير يقربوا منك ولو فيه شر يبعدوا عنك انتي منين؟ أنا من الفيوم 🙂
تم النشر الأحد، ٣١ مايو ٢٠٢٦
لعرض السؤال في فدني اضغط هنا