السلام عليكم، طيب هل ده مستمر من زمان ولا مؤخرًا؟ إيه اللي حصل فجأة وخلى التفكير ده يظهر ومع الاستغراق فيه تحول إلى رهاب وقلق مستمر؟ شخص قريب أو عزيز جدا مات ولا بتتابع حوادث وأخبار وفاة ولا متأثر بأحوال العالم والحروب؟ حاول تفتكر كده عشان توصل لبداية المشكلة وجذرها وتتعامل معه. ****** عامة تذكُر الموت والخوف منه شيء كويس عشان بيخلي عيننا على الآخرة فناخد بالنا من أعمالنا لكن مينفعش الخوف يتحول لوسواس وقلق غير صحي. القلق والتفكير مش هيغير حاجة، ولو مكتوب لك تموت في أي وقت هتموت فملوش لازمة إنك تفضل تفكر في لحظة لسه مجتش والله أعلم ممكن تيجي بعد عمر طويل، هتفضل عايش في القلق والخوف لسنين طويلة؟ مش هتعيش حياتك ولا هتعمل اللي ربنا خلقك عشانه ولا هتقوم بمسؤولياتك. *** موضوع أربعين يوم ده مفيش عليه دليل شرعي أو علمي، هو كلام شائع بين الناس. كمان بلاش تشغل نفسك كمان بإحساس الميت وليه مش بيقول، ومحدش رجع من الموت عشان يوصف لنا اللي حصل، فمش هتستفيد حاجة لما تستغرق مع الأفكار دي دون نتيجة سوى زيادة الخوف. وخلي بالك إن العقل الباطن ممكن يوحي لجسمك بكل الأفكار اللي بتمليها عليه وممكن تحس بالأعراض اللي بتتخيلها. عشان كده بقيت حاسس بإرهاق ومبقتش حاسس بطعم السعادة والحياة. **** اقعد مع نفسك وحلل مشاعرك وامتى بدأت وجرب تغير روتينك، انزل جيم أو مارس هوايات جديدة، واجبر نفسك تنشغل بأهداف تملأ بها يومك عشان متسمحمش بوقت للأفكار دي، حتى لو مش لك نفس تشتغل على هدف أو مش شايف لازمة للحياة. وإذا لقيت صعوبة تتخطى ده لوحدك لا تتردد إنك تتابع مع مختص يساعدك بخطوات عملية ومتابعة شخصية، وإن شاء الله تتجاوز المشكلة دي بأقرب وقت. بالتوفيق.
لعرض الإجابة في فدني اضغط هنا