اختلطي بالصالحات، هتلاقي همتك بتعلى في حفظ القرآن. وفي طريقة أنا بعملها، ممكن تكون غلط أو صح، بس أنا بعملها، ودي أساسية عندي. وطبعًا، مع حفظ القرآن، لازم يكون ليكي طريقة مراجعة، لأن لو قعدتي تحفظي من غير ما تراجعي، انتي كده زي ما تصبي مياه في كوباية مخرومة، هتلاقيكي بتنسي يعني. طريقة الحفظ (وليست المراجعة) بتاخد ٧ أيام. هتحددي انتي هتحفظي قد ايه.. وخليها ربع حزب كويس. أنا بحفظ ربع حزب أو صفحتين ونصف. بجيب القارئ اللي أنا بحبه وبتأثر بيه، وطبعًا لازم يكون بيقرأ صح. مثلاً، أنا بسمع لياسر الدوسري عشان بتأثر بيه وبحبه أوي. فأنا أجيب السماعة في ودني وأظبط التسجيل على ربع الحزب ده، وأشغل التسجيل، وأنا بسمع، ماسك المصحف وبقرأ معاه في نفس الثانية، وأقلده لحد ما أخلص الربع ده كاملًا. وبعدين أكرر الطريقة دي بليل بعد العشاء أو قبل ما أنام... يعني مرة بعد الفجر، ومرة بعد العشاء أو قبل ما أنام. لمدة ٥ أيام، يعني هتكوني قرأتي ربع الحزب ده ١٠ مرات. والطريقة دي بتاخد حرفيًا ٦ دقايق معايا بعد الفجر، يعني في خلال اليوم، الطريقة لا تتعدى الـ١٥ دقيقة. المهم، أثناء الـ٥ أيام، في قائمة تشغيل للشيخ د. عثمان الخميس، بسمع التفسير بتاع ربع الحزب ده. لمدة ٥ أيام أكون مخلصه، والفكرة إن الشيخ د. عثمان الخميس بيقول تفاصيل مش هتلاقيها في التفسير المختصر أو الميسر، فدي حاجة حلوة، هتعرفك القصة كاملة. وابدأي بسورة آل عمران، بجد حاجة جميلة أوي أوي أوي وبتزود الهمة أوي. ومتخافيش، مش صعبة ولا حاجة مع الطريقة دي. المهم، بعد ما تسمعي الفيديوهات بتاعت د. عثمان الخميس، تقريبًا هتسمعي التفسير في اليوم ١٥ دقيقة. أنصحك عشان متكسليش: اسمعي الـ١٥ دقيقة دي وانتي بتتغدي، أو وانتي بتمشي، أو وانتي في المطبخ، وهتلتزمي إن شاء الله. وبعد الـ٥ أيام، هيتبقى يومين. اليوم السادس: هتقرأي بنفس الطريقة دي بس ٧ مرات، هتقسميهم على مرتين: بعد الفجر وبعد العشاء. وأنا أفضل بعد الفجر ٤ مرات، عشان بعد العشاء أو بليل هتنشغلي. المهم، قبل ما تبدأي في اليوم السادس تحفظي، حمّلي تطبيق "وحي" واقرأي تفسير المختصر أو الميسر، ومعاه تفسير الميسر في غريب القرآن. ولو فيه كلمة معينة عايزة تعرفي معناها، شوفيها—التطبيق فيه الميزة دي. والمهم، تقرأي التفسير بتركيز، وبعديها تبدأي تحفظي. بس أقرأي بقى ٤ مرات بعد الفجر بتدبر. يعني قيسي الكلام أو الآيات على حياتك. مثلاً، آية: "قل أؤنبئكم بخير من ذلكم للذين اتقوا عند ربهم جنات..." لآخر الآية، وانتي بتقري، استحضري، وقيسي الكلام في دماغك. يعني: ربنا أو الرسول بيقولي "أقولك على حاجة أحسن من شهوات الدنيا دي؟! الناس اللي صبروا إنهم ميملوش ذنب أو شهوة بالحرام، ليهم الجنة وشهوات زي الدنيا دي وأحسن منها". أتمنى تكوني فهمتيني. يعني مثلًا، ربنا بيقول: "وويل للكافرين من عذاب شديد، الذين يستحبون الحياة الدنيا على الآخرة"، يبقى أنا لازم مكفرش بنعمة ربنا، زي ما الكافر أنكر نعم ربنا عليه وكفر بيه، وحب الدنيا، ومآمنش بربنا. فأنا لازم أطيع ربنا، عشان هو خلقني، وأنعم عليّا بنِعم كتير، فمينفعش أعمل ذنب عشان بحبه أكتر من ربنا. ماشي، المهم، هتقرأي ٧ مرات في اليوم السادس والسابع، وخلاص كده. هتكوني حفظتي ربع حزب في الأسبوع، وتدبرتي القرآن، وكمان سمعتيه من القارئ اللي انتي بتتأثري بيه، وبقيتي فاهمة الآيات بتتكلم عن إيه، بقيتي فاهماها كويس. والطريقة دي بتاخد تقريبًا في الأيام العادية ١٢ دقيقة حفظ، و١٥ دقيقة تفسير. ويومين الصعبين شوية: قراءة التفسير 15-20 دقيقة، والحفظ صراحة مع التدبر مفيش ملل، بس في المتوسط هتاخد تلت ساعة صبح وتلت ساعة بليل. بس لازم معلمة تحفظك قرآن، وتقولك طريقة للمراجعة، عشان المراجعة أهم من الحفظ. يعني راجعي كل يوم، بس ما تحفظيش بس، مهم تراجعي. وكمان، هتختلطي مع صالحين، فالهمة هتعلى.
لعرض الإجابة في فدني اضغط هنا