بصي يا بنت الناس من الآخر كدة ومن غير لف ودوران فكري بعقلك ثانية واحدة وسيبك من عواطفك دي خالص واحد خانك تلات مرات وبيشتمك ويهينك ولما بتيجوا تبعدوا بيحط الحق عليكي ويطلعك أنتي اللي غلطانة ده مش حب ده كدة اسمه بهدلة وقلة قيمة وهو أصلاً كان مستني ليكي أي لقطة تافهة عشان يقلب التربيزة عليكي ويداري على بلاويه وخياناته ويخليكي تجري وراه وتعتذري عن حاجة إنتي معملتيهاش وحوار إنه يفبرك صور ليكي ده كارت احمر كبير أوي يخليكي تقفلي الباب ده ومن غير تفكير لأن الشخص ده مش أمان خالص وممكن يستغل الحوار ده ويهددك بيه بعدين فوقي لنفسك ومتقوليش بحبه وواحشني عشان اللي بيحب حد بجد بيصونه ويحترمه ويخاف عليه مش بيقوله مش هتلاقي حد في جزمتي ويهينه بالمنظر ده اقطعي معاه خالص واعملي بلوك من كل حتة ومتحاوليش تبرري له أي حاجة لأن هو عارف إنك مغلطتيش بس عاجبه يشوفك ضعيفة ومكسورة ارمي العلاقة دي ورا ضهرك واشتري كرامتك وبكرة ربنا يعوضك بابن حلال يصونك بجد ويقدر قيمتك ..و كمان لازم تواجهي نفسك بالحقيقة إنتي غلطتي في حق نفسك غلطة كبيرة أوي لما قبلتي على كرامتك كل ده وصبرتي على واحد خانك تلات مرات وكان بيشتمك ويهينك من أول مرة المفروض كنتي تسبيه وتديله ضهرك لأن صبرك عليه وتغاضيك عن قلة أدبه وخيانته هو اللي طمّعه فيكي وخلاه يشوف إن مالكيش كبير ومفيش حد هيحاسبه فبقى يدوس عليكي أكتر وهو مطمن إنك كدة كدة هترجعي وتسامحي ف سكوتك ده كان دليل بالنسبة له إنك قابلة بالوضع وقابلة بالإهانة وفبركة الصور دي هي النتيجة الطبيعية لشخص إنتي اللي عودتيه إنه يغلط وميتحاسبش فوقي لنفسك واعرفي إن اللي بيفرط في حقه أول مرة بيفضل يتنازل طول العمر... وجد والله ربنا يحفظك ويسعدك 🌷
الشكر لله .. موفقه باذن الله 🌷
تم النشر الأحد، ١٤ يونيو ٢٠٢٦
اكيد الخير فيما اختاره الله شكراً من كل قلبي بجد فهمتني كويس 🤍
تم النشر الأحد، ١٤ يونيو ٢٠٢٦
بصي اللي إنتي فيه ده مش حب خالص ده تعلق مرضي وإدمان للشخص اللي بياذيكي وجسمك وعقلك دلوقتي بيمروا بأعراض انسحاب بالظبط زي انسحاب المخدرات من الدم وعشان كدة عقلك رافض أي حد تاني وبيكتئب لما يسمع سيرة الجواز لأن المخدر اللي كنتي متعودة عليه مبقاش موجود فمتجلديش نفسك ولا تستغربي حالتك دي طبيعة النفس البشرية لما بتتعلق بوهم .. ليه مش هو؟ ده من الهوى والجهل بالغيب ربنا سبحانه وتعالى بيقول ..وعسى أن تكرهوا شيئاً وهو خير لكم وعسى أن تحبوا شيئاً وهو شر لكم والله يعلم وأنتم لا تعلمون ..يعني ببساطة الشخص ده لو كان فيه خير ليكي ربنا كان يسره ليكي ومكنش خانك ولا هانك ربنا حماكي منه ومن شره اللي كان مستنيكي لو اتقفل عليكي معاه باب واحد فازاي تبكي على شر ربنا نجاكي منه وإنتي دلوقتي في فترة نقاهة يعني عقلك ونفسيتك مش مؤهلين أصلاً يدخلوا أي علاقة جديدة ورفضك للناس اللي بتقدم ده صح ومطلوب حالياً بس مش عشان تفضلي تعيطي على الأطلال لأ عشان تقعدي مع نفسك وتصلحي علاقتك بربنا وعلاقتك بنفسك وتعرفي إنتي ليه قبلتي الإهانة من الأول المطلوب منك دلوقتي حاجة واحدة وهي انشغالي بنفسك ركزي في دراستك وفي عبادتك وفي صحتك النفسية واقفي على رجلك الأول واستعيدي كرامتك وثقتك في نفسك ومستعجليش الجواز خالص دلوقتي لحد ما تتعافي ولما تفوقي ساعتها بس هتبصي وراكي وتضحكي وتقولي الحمد لله الذي عافاني مما ابتلاني به..
تم النشر الأحد، ١٤ يونيو ٢٠٢٦
انا متفهمه كلامك جدا جدا ودا الي هعمله اكيد بس دلوقتي انا رافضه اي حد غيره ف حياتي مش قادره استحمل اي كلمه من حد غيره والي بيتقدم كتير برفض حتي بمجرد اني اسمع فلان اتقدم برفض وبكتئب اوي وبقول لنفسي ليه مش هو مش عارفه اعمل اي
تم النشر الأحد، ١٤ يونيو ٢٠٢٦
بصي بقى يا بنت الناس الحمد لله إنك بدأتي تشوفي الحقيقة وكلامك ده يفرح بجد لأنه أول حاجه عشان ترجعي بنت الناس المحترمة الأصيلة اللي هو نفسه قال عليها بس مش عارف يصونها الشخص ده كان بيعمل معاكي حاجة في علم النفس ..غسيل مخ ..أو تلاعب نفسي.. لما يلاقيكي هتضيعي من إيده يقلب حنين ويفرش لك الأرض وردد ويقول لك كلام يثبتك بيه ولما يضمن إنك رجعتي يرجع يقلب عليكي ويشتمك ويفبرك صور عشان يكسرك. دي مش توبة ده فخ عشان يفضل متحكم فيكي وفي مشاعرك... إنتي ظلمتي نفسك بس لما فكرتي إنك ظلمتيه! تعتذري له على إيه على إنه خانك تلات مرات؟ ولا على شتيمته ليكي؟ ولا على إنه مش عامل لكرامتك أي اعتبار؟ فوقي لنفسك واعرفي قيمتك كويس إنتي غالية أوي وقلبك النضيف الطيب ده خسارة في شخص مش مقدره وبيستغله عشان يرضي رغباته ويحس إنه مسيطر قسوته في الآخر دي الوش الحقيقي اللي بيظهر لما يفشل في إنه يسيطر عليكي بالكلام الحلو اوعي تضعفي تاني أو تحني لكلمتين حلوين وافتكري دايماً إن اللي بيحب بجد بيحافظ وبيحترم مش بيسيبك تحتاري وتشكّي في نفسك. إنتي ماشية في الطريق الصح كملي ومتبصيش وراكي واقفل الباب ده بالترباس وبكرة ربنا هيرزقك باللي يشيلك فوق راسه ويقدر قيمتك وأصلك بجد.... الشكر لله ربنا يحفظك ويوفقك لما يحب ويرضى
تم النشر الأحد، ١٤ يونيو ٢٠٢٦
انا بجد مش عارفه اقولك اي بس حرفيا كلامك طمني اوي اني ماشيه ف الطريق الصح اوقات كنت اخاف اكون ظلمته لو بعدت عنه لان لما كان يرجع ويكلمني كان بيكون حنين اوي واخر مره رجع فيها قالي انتي الوحيده الي مش عارف اطلعك برا قلبي انتي غير الي عرفتهم كلهم طيبه وبتحبيني وبتحترميني واصيله وبنت ناس محترمه تعرف ربنا كويس انتي الوحيده االي مش عارف انساكي ولا ابعد عنك استحملتي مني كتير ونا هعوضك كلام كتير حسسني ان ظلمته وانه تاب وجاي يصلح كل حاجة بس قسوه كلامه معايا ف الآخر هي الي اثبتت الحقيقه وبرغم كدا صدقت فعلاً اني ظلمته وان واجب عليا أعتذرله بس اعتذر ع اي كل الي يشوف الكلام يقولي فين غلطك كلامك وضحلي مشاعري بظبط شكراً بجد
تم النشر الأحد، ١٤ يونيو ٢٠٢٦
لعرض الإجابة في فدني اضغط هنا