السلام عليكم
انا كنت معجبه بإبن خالتي هو أكبر مني ب ٨ سنين المهم يعني كنت السنة الي فاتت في تالته ثانوي وجبت مجموع مش حلو وكمان هو الي جابلي النتيجة ودخلت كلية الزراعة وكمان هو خطب للأسف هو مكنش بنا اي كلام خالص هو بس بنسلم علي بعض وخلاص وحتي مش بنشوف بعض غير فين وفين لكني حبيته وكنت حاسة انه معجب فيا
المهم هو كان خاطب شهر ١١ السنة الي فاتت لغاية دلوقتي ساعات مش بعرف اتخطي انا بتمناله كل سعادة هو خطبيته وكمان بدعي لو فيه نصيب ليا وهينفعني في ديني قبل دنيتي ربنا يجمعنا مع بعض غير كده لا لكن انا مش عايزه اشوفه لاني دلوقتي كنت بعيط لوحدي لما افتكره وكمان هو فرح اخته مش عايزه اروح عشان مشوفهوش مع خطيبته
انا دلوقتي كمان حاسة اني قليلة في كليتي وفي عيلتي وكمان انا بنت خالتي هي تالته ثانوي السنادي والناس بيقولولها دكتورة دكتورة بدعيلها من قلبي تكون دكتورة وفي المكان الي هي عايزاه لكن انا جوايا شعور زعل برضوا من نتيجتي حاسة اني آخر حد في دنيا
وعليكم السلام، الـ حصل حصل وأنتِ عملتي الـ عليكِ ودا نصيبك وقدرك ركزي على باقي جوانب حياتك غير الدراسة مارسي هوايتك المفضلة أحفظي القرآن، الحياة مليانة حاجات ليه مركزة على حاجة واحدة؟ الكلية أو ثانوية عامة مش آخر حاجة في حاجات كتير جدًا وفي مسؤوليات، خدي كورسات أفهمي نفسك وشخصيتك القراءة هاتي كتب أتعلمي للغة، المهم متفكريش في حاجة واحدة بس، أما موضوع الزواج، أدعي ربنا يرزقك الزوج الصالح والخير ورزقك جاي جاي مفيش أي حاجة فاتتك والـ فاتك مش ليكِي متفكريش فيه خالص 🤍
تم النشر الجمعة، ١٠ يوليو ٢٠٢٦
السلام عليكم، مش الكلية أو كلام الناس ونظراتهم هي اللي هتحدد قيمتك، أنتِ قادرة تصنعي لنفسك اسم ومكانة وتقدير أيا كانت كليتك ومجال شغلك. المكان اللي ربنا وضعك فيه أكيد هو الخير لك حتى لو أنتِ غير مدركة لده دلوقتي، ومفيش كلية وحشة أو قليلة، دي نظرة مجتمع فارغة. فكري إزاي تغيري نظرتك لنفسك ولدراستك وازاي تستغلي كليتك في تحقيق مستقبل أفضل، ركزي في دراستك واعرفي أكتر عن المجالات اللي ممكن تتفوقي فيها من خلال كلية الزراعة، ممكن تلاقي نفسك وتبدعي في الحاجة اللي هتشتغليها، وحتى لو مفيش حاجة منها جذبتك فعادي ممكن تلاقي مجالك في تخصص مختلف غير دراستك، طول ما أنتِ عايشة فقدامك فرص تغيري وتطوري من نفسك، وده اللي هيساعدك في مشكلة تعلقك بابن خالتك. تركيزك على حياتك وإنك تعملي أهداف وتشتغلي على مستقبلك هو الحل، انشغالك مش هيسمح لك تلاقي وقت تفكري أو تحزني، ومش هيخليك أصلا مركزة مع تفكير الناس بخصوصك وكل ما تزوجي ثقتك بنفسك وتتطوري كل ما هيختفي شعورإنك قليلة قصادهم. ارمي بس كل الأفكار السلبية اللي مالية بها رأسك وابدئي اشتغلي على صنع الحياة اللي تستحقيها فعلا. قدري نفسك.💚💚
تم النشر السبت، ١١ يوليو ٢٠٢٦
وعليكم السلام ورحمة الله، يا بنتي. أول حاجة أحب أقولها لك إن مشاعرك طبيعية جدًا، وإنك مش لوحدك في اللي بتمرّي بيه. الحب اللي بييجي بدون كلام كتير وبيبقى مجرد إحساس داخلي بيخلّي الإنسان يتعلق، وده بيحصل كتير، خاصة لما يكون الشخص قريب من العيلة. بس الواقع دلوقتي إن هو خطب، وده معناه إن الطريق ده انتهى، وربنا سبحانه وتعالى عنده خطة أحسن ليكِ إن شاء الله. اللي بيوجعك دلوقتي مش بس الفراق، لكن كمان الشعور بالنقص اللي جواكِ بسبب نتيجة الثانوية والكلية، ومقارنة نفسك ببنت خالتك. ده شعور ثقيل، بس تذكّري إن قيمة البنت مش في الشهادة أو اللقب، وإن كل واحدة ليها طريقها ورزقها. أنتِ دلوقتي في كلية الزراعة، وده مجال فيه فرص كتير لو ركزتِ فيه، سواء في الدراسة أو في تطوير مهاراتك. حاولي تحولي الطاقة دي لشيء إيجابي: ركزي على مذاكرتك، اقرئي كتب أو دورات تساعدك تطوري نفسك، وادعي ربنا يفتح لك أبواب التوفيق. بالنسبة لعدم الرغبة في حضور فرح أخته عشان متشوفيهوش، ده قرارك ومحترم، بس لو قدرتِ تروحي وتكوني قوية وتتعاملي بابتسامة عابرة، هيبقى أحسن لنفسيتك على المدى الطويل، لأن التجنب المستمر بيخلّي الذكرى أقوى. استمري في الدعاء اللي بتدعيه، وأضيفي له دعاء بالشفاء من التعلق وبالرزق بالشخص المناسب اللي ينفعك في دينك ودنيتك. ولو حسيتِ إن الدموع بتيجي كتير، اكتبي مشاعرك في مذكرة، ده بيساعد على التصريف. أنتِ مش "آخر حد في الدنيا"، أنتِ بنت ليها قيمة ومستقبل، وربنا هيجبر بخاطرك إن شاء الله. خدي خطوة صغيرة كل يوم عشان تبني ثقتك بنفسك، ولو عايزة تحكي أكتر أنا هنا أسمعك.
تم النشر الجمعة، ١٠ يوليو ٢٠٢٦
هو اللي عدى عدى وأهم حاجه تثبتي وجودك ف المكان اللي انتي فيه دلوقتي وعامة دي كلها حاجات دنيويه مش مثال خالص لقيمتك انتي كبيرة وقيمة بأخلاقك وبحاجات تانيه غير دي ..وابن خالتك لو كان بيفكر ف الاول خالص فيكي حتى لو ملمحتيش كان هيقولك بس خالص طالما خطب انسيه تماما وادعي دايما ربنا يعوضك بحد تستاهليه ..وان شاء الله ربنا يعوضك ويوفقك يارب ❤️
تم النشر السبت، ١١ يوليو ٢٠٢٦
الإنسان مقدر لكونه إنسان *ولقد كرمنا بني آدم...* مش بالشهادة ولا المال ولا الحاجات الدنيويه دي خالص يعني ،، فلازم ثقتك بنفسك تكون أكثر شويه + ابن خالتك خلاص خاطب ربنا يوفقه في حياته ويرزقك بالخير لكِ
تم النشر السبت، ١١ يوليو ٢٠٢٦
ادعي ربنا يكرمك بحد احسن منه
تم النشر السبت، ١١ يوليو ٢٠٢٦
لعرض السؤال في فدني اضغط هنا