السلام عليكم
محتاجه حل ضرورى لمشكلتي اسفه لو هطول عليكو شويه
انا عندى 22 سنه و انا و ابن عمى اللى اكبر منى 6 سنين قرينا الفاتحه من حوالى شهرين تلاته
مش دى المشكله
المشكله فيا انا من قبل ما يتقدملى كنت حاسه ان أهلي عايزين الجوازه دى و كانو بيقولوا كدا من زمان من وقت ما توفى بابا و انا عندى 14 سنة
بس انا كنت مش حاسه ان هوا دا الشخص اللى عايزه اكمل معه
تصرفاته أفعاله مش هنكر انى اعجبت بيه بعد وفاة بابا و كمان بسبب كلام خالتى أن هوا دا الشخص اللى هيحافظ عليا و يصونى كنت بميل لكلامها من دون وعى منى و فعلا حسيت بمشاعر ناحيته بس لما كنت بتكلم لصحبتى على مشاعرى دي
وقتها قالت لى خلى بالك لأنها ممكن متكونش مشاعر حقيقيه و دا غير الكلام الكتير اللى بسمعه و كانت بتوعينى و انا شوفت أن كلامها منطقى جدا و قعدت فتره كل ما اصلى ادعى ربنا لو هوا هيكون زوج ليا يجمعنا سوا و لو مكنش هوا المناسب ليا يشيل حبه من قلبى
قعدت فتره كنت بدعى بكدا بس بعدين بدأت اشوفه أنه اه كبير دا غير أنه وقف جنبى فى اكتر وقت كنت محتاجه حد يكون جنبى
المهم لما عمى قالى أنه متقدم ليا و أنه موافق عليه قلت يمكن دى حكمه ربنا و برضه مرضتش اكسر كلمه عمى خصوصا انى بحب عمى اوى و بعزه و أنه كمان في مقام بابا الله يرحمه
واقت و قرينا الفاتحه الأمور كانت تمام بس انا وقتها مكونتش بحب لما كانو بيسيبونا لوحدنا ولا لما كان بيمسك ايدى كنت بحس بخنقه و بكون مدايقه دا غير انى من جوايا مكونتش مبسوطه بالعلاقة دى أو أنهم يربطو اسمي باسمه دى كانت بدايقنى اوى و بحس بخنقه
من حوالى شهر كنت مدايقه جدا و كنت مخنوقه منه و كل ما افتكرت اقعد اعيط و كنت بقول لنفسى مش هوا دا جوزى اللى انا عايزاه مش هوا دا اللى انا عايزه اكمل حياتى معه
أنا عايزه شخص يكون يوم القيامه ياخدنى من ايدي و ندخل الجنه عايزه شخص يساعدنى ع طاعه ربنا
إنما هوا كل ما بيتكلم معايا عن الصلاه و انى بصلى فتره و وبقطع فتره بحس برضه بضيقة و بغير الحوار ع طول لانه بيحسسنى انى انا مقصره و هوا كمان ع فكره مش بيصلى ولا ملتزم مش هنكر أنه بيقولى كلام حلو كتير بس لما بنهزر مع بعض بيمسك ايدى جامد و كمان بيضربنى ع ايدي لدرجه بتجمر و بكون مدايقه و بطلب منه كتير يبطل هزار
مش عارفه إذا كان قصده أنه يوجعنى أو بهزر بس بيكون باين أنه بيهزر و المشكله انى مش عارفه اشوفه زوج ليا مش عارفه اتقبله و صليت استخاره مرتين بنيه انى افشكل دى مره اول ما قمت من النوم و قلت انا هفشكل حسيت براحه كبير
مش هقول انى ملييش عيوب لا انا عندى عيوب كتير عارفه انى سعات بكون بارده معه بس المشكله كلامه مش هكون حاسه الكلام مش هتعرف أقوله
و فى حاجه تانى هى ممكن تكون حاجه عاديه بس بالنسبه ليا انا لا عمى اللى هوا برضه عمه هوا اللى هيجيب الدهب هديه ليه لانه بيعتبره ابنه بس انا مدايقه من النقطه دى بسبب أنه ممكن بكره و بعده لو اتزنق هشوف أنه ملهوش حق في الدهب انا معنديش مشكله أنه يجبلى دبله بس تكون من عرقه و شقاه و كمان انا مش حابه اقعد في البلد لأن في الأرياف انا مش بعرف اخد راحتى زى لما بكون في القاهره
طول الوقت و احنا في البلد لازم اقعد بالطرحه و لابسه كم في عز الحر لدرجه انا بحس بصداع اول ما قلع الطرحه فمش حابه أن بعد الجواز انى معرفش اخد راحتى في بيتى
انا تعبت اوى و مش عارفه اعمل اى دا غير أنه قبل كدا قالى أنه عنده اكتئاب و لو اتكلمت معه و حاولت أقوله أن فى حاجه مديقانى فيه يقولى انا مش وحش انا مش شايفاه وحش انا عايزه آخد خطوه الانفصال قبل ما نجيب الدهب
بس اللى مانعنى لحد دلوقتي انى خايفه ع مشاعره و كمان هوا معش طفوله سليمه بالعكس عمى من لما كان صغير دائما كان بيضربه جامد لدرجه كان بينزف دم و اوقات كان بيعمل أنه رغم عليه علشان يبطل ضرب فيه و كمان كبر و هوا بيشوف أبوه بيتحانق مع أمه و بيضربها و كل حاجه بتكون بزعيق و شخط
و كمان لما قولتله انا بفكر في الانفصال خالتى قالتلى متخليش حد يفرح فيكى دا غير أن دا ابن عمك و لو فشكلتى في شهرين الناس هتقول أن فيكى حاجه او عيب هى قالتلى أن دا مش هيفرق بس البنت سمعه و دى حاجه مخوفانى برضه فا قولتله انى تراجعت عن الفكره و هكمل معه
الكلام دا بقاله اكتر من اسبوع و المشكله انى برضه قلت اديه فرصه كمان و احاول انى اقرب ليه بس مش حاسه بكدا حاسه انى اضطربت اكتر من الاول و دا غير انى خايفه من أن أبوه و عمى يحصل بينهم مشاكل بسبب كل دى حاجات بتيجى في بالى و كلهم بيخوفونى و كمان بابا و ماما انفصلو و انا عندى 6 سنين فا انا مش حابه اعيش تجربه فاشله خايفه اتجوز و اخلف طفل يحس أنه نتيجه جواز فاشل زى ما انا اوقات كتير بسه بكدا
اسفه كمان مره انى طولت عليكم
عليكم السلام و رحمه اللّٰه و بركاته ، طالما متأكده من مشاعرك و إنك مش بتحبيه ف متكمليش اكتر من كدا عشان هتظلميه معاكي و هتعلقيه بيكي اكتر ،، انا اهلي من بلد ارياف و عارفه المعتقدات الِ بتقولي عليها ، و في الحقيقه إن لو كملتي ذي م خالتك قالت و سبتيه بعد فتره أطول بعدها هيتقال إنك لعبتي بمشاعره و إنك وحشه و لو خطبتي بعد كدا هيقولو كان في واحد تاني في حياتك عشان كدا سبتيه ،، كل ده حصل قدامي ف الواقع ، ف منصحكيش إنك تمشي مع كلام الناس ،و تنسي إن في إنسان لو كملتي معاه هتعلقيه بيكي اكتر و أنتِ في الأصل مش بتحبيه يعني هتظلميه معاكِ أوي ،، في نقطه كنت حابه أتكلم عنها بردو و هي إنكم في فتره خطوبه يعني مش المفروض خالص إن يمسك إيدك ولا يلمسها حتى، عموماً الأفضل إنك تصلي إستخاره تاني و لو حسيتي إنك بردو مش مرتاحه ف أتكلمي مع عمك و أهلك ب هدوء و صارحيهم ب مشاعرك و هم إن شاء الله هيفهموكي ، و بالتوفيق
تم النشر الخميس، ٢ أكتوبر ٢٠٢٥
السلام عليكم ورحمة الله وبركاته معلش يا حبيبتي بس مش هينفع تضيعي حياتك عشان خاطر اهلك....هو لما انتي تكتشفي شخصيته الحقيقية في الآخر بعد الجواز أهلك هينفعوكي فى ايه ؟! أنا ماما عملت كدة مع بابا وبالذات إن ستي كانت خايبة ومكنتش بتعرف تفرق بين الحلو والوحش راحت شافت بابا بيصلي راحت خطبته لماما وعلي هذا الحال وماما اكتشفت بعدين إن هو شخصية نرجسية وحتي إحنا كأولاده بنعاني معاه ...وعلفكرة ماما كانت عرفت في فترة الخطوبة حقيقته ولكن ستي قلتلها هتشمتي الناس فيا وبدأت تضغط عليها ولحد الآن ماما زعلانة ولكن أنا بحاول أصبرها بإن ده إبتلاءها ومش هينفع نعترض على قضاء ربنا وهي راضية الحمدلله ولكن ادعولها بالصبر والثبات بالله عليكم ....فرسالتي ليكي رغم صغر سني عندي 16 سنه اعتبريني اختك الصغيرة الناصحة ليكي ...رسالتي ليكي إن القلب بيحس بالخطر وعشان كدة يمكن تكوني مش حاسة بالأمان والاستقرار مع فكرة خطيبك ده بالذات إن فترة الخطوبة طولت.... أولاً استخيري ربنا بعدين إدعي ربنا بهداية أهلك للخير ويهديهم للصح ولفعل ما في مصلحتك بعدين إقرأي سورة البقرة كاملة كل يوم ويفضل بعد صلاة الفجر ولو حاساها طويلة ممكن تقرأي صفحه واحدة كل يوم لحد ما تحسي أن الكمية صغيرة وتبدأي تزودي الصفحات وهكذا يعني أنا بحاول أبسطهالك قدر الإمكان وتلتزمي بقراءة الأذكار الصباحية والمسائية كل يوم وتاج الذكر والصلاة الإبراهيمية لأن التلاتة اللي أنا قولتهم دول مفتاح كل كرب والله والله بإذن الله هتنفعك ومفيش حاجة بتقرب من ربنا إلا وكانت سبيل الخير بإذن الله والشيخ الشعراوي رحمة الله عليه كان بيقول إن ربنا ساعات بيخلي الإنسان زعلان ولا مهموم ولا تعبان ولا بيبتليه عشان بس يقربه ليه أكتر فتخيلي لما تقربي من ربنا فأكيد مش هيردك فاضية وعندك برضو صلاة قضاء الحاجه دي خطيرة ركعتين أول ركعة سورة الإخلاص تاني ركعة سورة الكافرون أو العكس مش فاكرة الصراحة.....دعاءها لا اله إلا الله الحليم الكريم سبحان الله رب العرش العظيم الحمد لله رب العالمين اللهم لا تجعل لي ذنباً إلا غفرته ولا هماً إلا فرجته ولا حاجة لي هي لك رضا إلا وقضيتها لي يارب العالمين..وتقولي الدعاء وياريت تصلي على النبي عليه الصلاة والسلام الأول بعدين تستغفري ربنا كتير لأن ساعات العائق للدعاء هو ذنب مفيش مش معروف ....وتقولي الدعاء وياريت تبدأي بالصلاة على سيدنا محمد والختام بيها لأن مش فاكره هو حديث ولا لأ ولكن مافيش حاة جت ما بين الصلاتين وهتترد يعني ربنا بيستحيي يقبل الصلاة على سيدنا محمد ويرفض دعوتك .......أسفة على التطويل ولكن أرجو كل من يقرأ تعليقي أن يدعو لهذه الفتاة هذا الدعاء دعوة 40 غريب مستجابه لن يأخذ من وقتكم كثيراً .......... بسم الله الرحمن الرحيم أسأل الله العظيم رب العرش العظيم أن يهديك للخير وأن يفرج همك وييسر امرك يارب العالمين يارب يهدي أهلك للخير ويهديهم لما يصح ويكون في مصلحتك يارب ويكشف حقيقة خطيبك أياً كانت لأهلك لكي يطمئنوا بالحقيقة يارب العالمين يارب يرزقك الزوج الصالح التقي النقي الطاهر الذي يخشي الله فيكي عاجلا غير آجل يا أختي يارب العالمين .....أسفة علي كلامي الكتير ولكن أرجو أن تتقبلي من أختك الصغيرة هذا الكلام 💖🥰
تم النشر الجمعة، ٢٨ نوفمبر ٢٠٢٥
لعرض السؤال في فدني اضغط هنا