مساء الخير
انا تعبانه ومرهقه نفسيا و بتخيل حاجات كتير و ممكن اعمل شخصيات مش موجوده في دماغي وبتفاعل معاها اكنها واقفه قدامي ..انا مش قادرة اقول كده لحد يفتكرني مجنونه و اهلي كذا مرة اقولهم انا تعبانه انا مرهقه انا مش تمام مبيصدقوش وبيفضلوا يهزروا و يقلبوا الكلام يا اما هزار يا اما استهزاء ..
بقيت من كتر الشخصيات و الحوارات اللي في دماغي التجأت اني اكتب يمكن اهدى تفكيري يهدى لكن الصدفه اني لما باجي اكتب مش بلاقي حاجه لكن لما ببقا قاعده عادي بيبقى في حاجات كتير وشخصيات اكني بعمل فيلم في دماغي وبتفاعل معاه ولو حاجه تضحك بضحك حاجه تزعل اعيط اكني جزء من الشخصيات دي ومش عارفه اعمل اي بجد و مشاعري مبقتش حقيقيه بقا قصاد اي حد بقيت بمثل و مبقتش عارفه انا حاسه بايه انا مش عارفه بجد اي الحل انا لسه صغيره يعني ١٨ سنه بجد ياريت حد يفيدني🙏🙏
بصي يا بنت الناس انتي زي الفل ومفيش فيكي اي جنان ولا حاجة ده ضغط نفسي وعقلك بيحاول يهرب منه بالخيال بس اهم حاجة متسلميش نفسك للافكار دي وخليكي فاكرة ان ربنا اقرب ليكي من حبل الوريد يعني لما تحسي ان الدنيا زحمة في دماغك قومي اتوضي وصلي ركعتين وفضفضي لربنا بكل اللي وجعك هو الوحيد اللي فاهمك وبكره يحليها من عنده وطالما اهلك مش حساسين بالتعب دلوقتي حاولي انتي تشغلي وقتك بأي حاجة حقيقية تخرجك من خيالك ووالتعب النفسي زيه زي تعب الجسم محتاج دكتور كويس فلو قدامك فرصة توصلي لمعالج نفسي اعملي كده عشان ترتاحي وربنا يشرح صدرك ويطمن قلبك يارب ونشوفك احسن واحدة في الدنيا وجد والله ربنا يحفظك ويسعدك 🌷 لو مش قدامك حد ممكن اقلك على كام حاجه تعمليهم هيظبطو معاكي الدنيا
تم النشر الأحد، ٢٦ أبريل ٢٠٢٦
السلام عليكم - بصي اهدي الموضوع مش خطر بس هو يمكن هروب من الواقع وعادي علي فكرة بتحصل كتير معايا بس مش بتعامل مع الموضوع بخوف او اني مجنونة بالعكس انا بحب الاوقات اللي بتخيل فيها دي لانها بتخرجني من الضغط اللي انا فيه وانا فعلا بقيت بكتب القصص للي بتخيلها على هيئة رواية واحيانا كمان لما بشوف حلم حلو لما بصحى عقلي بيكمل الاحداث بتاع الحلم ف بردو بكتبها ف اكتبي القصة اللي بتتخيليها دا بيساعدك تخلصي تخيل في الفكرة دي ودا بيحصل في اوقات معينة يا اما لما تبقي فاضية خالص فعقلك يشتغل ويستبدل الفراغ دا يا اما وقت الضغط الجامد فعقلك بيقف خالص ويطلعك من الضغط - فالموضوع عادي زي ما قولتلك بيخليكي تفصلي شوية واول ما تيجي افكار في دماغك اكتبيها هتلاقي نفسك بتزهقي ف التخيل هيقل بقولك الكلام دا عن تجربة
تم النشر الأحد، ٢٦ أبريل ٢٠٢٦
اللي انتي حاسة بيه إن خيالك بقى نشط جدًا لدرجة إنه بيعمل عوالم وشخصيات كاملة في دماغك وبتتفاعلي معاها كأنها حقيقية وده مش معناه جنون ولا حاجة غريبة بالشكل اللي انتي متخيلاه اللي بيخلي الموضوع ياخد شكل متعب هو إن دماغك بيفضل شغال جواكي أكتر من الواقع فبتلاقي نفسك أوقات مش مميزة انتي حاسة بإيه بجد ولا اللي جوا الخيال وده اللي مخلي إحساس إني بمثل أو مش أنا يظهر ده غالبًا بيحصل مع ناس عندها ضغط نفسي أو وحدة أو كتر هروب للتفكير مش شرط سبب واحد واضح بس الفكرة إن المخ بيتعود يخلق بديل للواقع عشان يشغلك أو يهربك من حاجة تقيلة حتى لو انتي مش واخدة بالك منها المشكلة مش في الخيال نفسه لأنه طبيعي المشكلة لما يبقى هو المكان الأساسي اللي عايشة فيه بدل الواقع فالحل من وجهة نظري مش إنك تمنعيه فجأة ولا تحاربيه بس تحاولي تقللي الوقت اللي بتسيبيه فيه يسحبك، يعني أول ما تلاقي نفسك دخلتي في الحالة دي ترجعي نفسك لشيء ملموس حواليكي حركة شغل بسيط أو حتى إنك تكلمي حد في حاجة عادية جدًا، المهم تكسري الدايره اللي في دماغك وبرضه خلي بالك إن الكتابة مش شرط تيجي بشكل منظم، انتي اكتبي أي حاجة بتيجي في دماغك حتى لو جمل ملهاش علاقة ببعض، مع الوقت هتلاقيه بقى أوضح. وفي نفس الوقت بجد لازم يبقى فيه شخص فاهم يكلمك في الموضوع ده بشكل مباشر او هل معقول الاهل كلهم مفيش حد يفهمك او تعرفي تثقي فيه و تتكلمي معاه!!لو مفيش شوفي مثلا صديقه مقربه ليكي ، لأن لو فضلتي تتعاملي معاه لوحدك ممكن يفضل يكبر جواكي ويعطل إحساسك بالواقع اكتر. ( طبعا دا ميغنيش عن الجانب الديني) ان شاء الله ابقي فدتك ولو بـ حاجه بسيطه 🤍
تم النشر الأحد، ٢٦ أبريل ٢٠٢٦
مساء النور يا حبيبتي، أنا ذكية هنا معاكِ، وأشعر بتعبكِ تمامًا.. مش لوحدكِ في ده، كتير بنات في سنكِ بيعانوا من "التخيلات المفرطة" (maladaptive daydreaming) زي اللي بتصفيه، وده رد فعل طبيعي للإرهاق النفسي، بس ممكن نتحكم فيه خطوة بخطوة. أنتِ مش مجنونة خالص، ده عقلكِ بيحميكِ من الضغط، وفرصة نغيّرها. الحلول العملية اللي هتساعدكِ دلوقتي: سجّلي كل حاجة في دفتر يوميات : خصّصي 10 دقايق يوميًا بعد الصلاة (مثلًا بعد الفجر)، واكتبي الشخصيات والحوارات بالتفصيل. هتخرجيها من دماغكِ وتهدّي. لو مش عارفة تبدئي، اكتبي بس "النهارده تخيلت إيه؟" – هيبدأ الكلام لوحده. اقطعي الوقت الخامل : لما تلاقي نفسكِ قاعدة فاضية، قومي فورًا اعملي حاجة حقيقية: مشي 5 دقايق في البيت، رتّبي غرفتكِ، أو اقرئي صفحة قرآن. الخمول بيغذّي التخيلات، فحوّليه لنشاط. روتين يومي بسيط إسلامي : صلّي على الوقت، وادعي ربنا يهدّي قلبكِ: "اللهم اهدِ قلبي واجعله مطمئنًا". اقرئي قرآن يوميًا 5 دقايق (ابدئي بسورة الإخلاص 3 مرات). نامي باكر (قبل 11 مساءً) واصحي باكر – النوم المنتظم بيعدّل المشاعر. رجّعي مشاعركِ الحقيقية : لما تحسي إنكِ بتمثّلي قدام حد، قولي لنفسكِ داخليًا "أنا هنا دلوقتي، إيه اللي بحسه فعلًا؟" وركّزي على حواسكِ (إيه ريحة القهوة؟ إيه صوت التليفون؟). مع الوقت، هترجعي أصلكِ. أنتِ 18 سنة، يعني عندكِ قوة شبابية هتغلبي بيها بسرعة! جربي الأسبوع ده وشوفي الفرق، ولو استمر، روحي للخبراء في fedni.net/experts – فيه متخصصين نفسيين هيساعدوكِ بشكل شخصي وسري. ابحثي كمان في فدني عن "تخيلات مفرطة" هتلاقي إجابات تانية. أنتِ قوية يا بنتي، ربنا معاكِ 💕 قوليلي بعد أسبوع إيه اللي حصل! 🙏 (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الأحد، ٢٦ أبريل ٢٠٢٦
تخلية وتحلية: تخلية بأنك تمنعي الاسترسال في الأفكار دي وتشتيتها دا لازم تعمليه عشان هتزيد ودا مضر، وتحلية بأنك تقرأي عن اليوم الآخر والجنة والنار، فيه كتاب بسيط جدا اسمه "وصف الجنة لمعمر عبد العزيز"" هيخلص في تلت ساعة فتقدري تنزليه كبداية،، فايدة التخلية دي هي. أنك تبني هدف لحياتك فمش هييجي في بالك الأمور دي وتكسبي الآخرة كمان والضغط النفسي هيتقلص فعلا ، أكيد اللي عايز يدخل الجنة هيهتم يعرف اللي فيها،
تم النشر الاثنين، ٢٧ أبريل ٢٠٢٦
لعرض السؤال في فدني اضغط هنا