السلام عليكم ورحمة الله، إحساسك بعدم الإنجاز ده سببه الرئيسي السوشيال ميديا، طوال الوقت فيه فيديوهات وبوستات من ناس كتير قد إيه عاملة إنجازات في حياتها وقد إيه بتشتغل من وهي مش عارفة كم سنة وعملت فلوس قد إيه وسافرت وراحت. كل ده عمل لك ولغيرك آثار سلبية منها اللي انتِ حاسة به ومنها كمان التشتت بين مجالات مختلفة كل شوية عشان فاكر إن المجال ده هو أسرع وسيلة تنجحني وتخليني أعمل إنجازات وأشتغل. أنتِ محتاجة تهدأي الأول ولا تقسي على نفسكِ. شعورك بالضغط مش هيسمح لك تفكري في الخطوات اللي محتاجة تمشيها واللي أولها بيبدأ بإنك تفهمي نفسكِ. تقعدي مع نفسكِ في هدوء وجلسة رايقة مع مشروب بتحبيه وتكوني نايمة كويس وتاخدي وقتك على الآخر في إنك تكتبي كل اللي بيخطر ببالك. اكتبي كل الحاجات اللي حاسة إنك مهتمة بها أو بتحبيها. مثلا هل حصة الرسم في المدرسة كانت من الحصص اللي بتحبيها؟ كنتِ بتميلي للرسم والتلوين؟ كنتِ بتحبي حصة التعبير؟ ابدأي اتعرفي على نفسكِ واحدة واحدة. أنتِ لسه مكملتيش 17 زي ما قلتِ وده وقت بنكون فيه مشغولين في دراسة وبنتحسس طريقنا كمان. وكل واحد فينا له طريقه وله اهتماماته... فيه ناس بتعرف بدري هي بتدور على إيه وشاطرة في إيه وناس تانية بتتأخر شوية على ما تعرف نفسها وهي عاوزة إيه وبيتنقل بين كذا مجال ومحطة لحد ما يلاقي نفسه واهتمامه. استعيني بالله وتوكلي عليه وادعيه يوفقك للي فيه الخير لك. ممكن تعملي اختبار الشخصية.. هو خطوة بتقربك شوية لمعرفة شخصيتك وإيه من المهارات والهوايات تناسبك، بس حاولي تعملي صح عشان تحصلي على نتيجة مظبوطة. ده رابط الاختبار. https://www.for9a.com/personality-test أنا ممكن أقترح عليكِ شغل ما أو لغة معينة أو مهارة من اللي أنا بحبها بس ده ممكن مينفعش معك عشان ده في النهاية بيرجع لشخصيتك أنتِ وميولكِ أنتِ. كمان نصيحة أخيرة، لا تستعجلي على العمل في مواقع العمل الحر لأن ده موضوع كبير ومحتاج تكوني متدربة وعارفة خطواتك كويس وإزاي تحصلي على عميل... والعمل على جروبات الفيسبوك للأسف بيحصل فيه نصب كتير والبنات بتتعرض لمشاكل بسببه فلازم تكوني عارفة خطواتك صح جدًا الأول قبل ما تبدأي. بالتوفيق إن شاء الله.
لعرض الإجابة في فدني اضغط هنا