السلام عليكم، أنا متفهمة قلقك من إنك تقولي لأهلك ومسؤوليتهم تزيد بسببك لكن ده سكوتك على مشكلتك مش حل خالص. دلوقتي في مشكلة ومأثرة على دراستك وحياتك وكل ما تجاهلتِ حل مشكلتك الوضع هيزيد سوءا. التركيز والسمع مرتبطين ببعض، وطبيعي إذا مش بتسمعي كويس مش هتقدري تركزي أو تفهمي وده هيأثر جدًا على مستواك الدراسي وأنتِ قلتِ أهلك حاطين أملهم عليكِ، فأنتِ بطريقة غير مباشرة برضه هتتسببي في قلقهم وحزنهم لما مستواكِ الدراسي يتدهور وأكيد برضه مش هيكونوا سعداء وأنتِ نفسيتكِ تعبانة وحياتك كلها متأثرة. *** لو مش عاوزة تصارحيهم دلوقتي فأنتِ ممكن تاخدي الخطوة الأولى بنفسك، مقياس السمع ممكن تعمليه في أي مستشفى حكومي وتتأكدي إذا كان فعلا سمعك ضعيف ولا فيه حاجة مؤقتة زي شمع مثلا قافل الأذن أو أسباب تانية ممكن تتعالج بسهولة. روحي ومتهمليش صحتك. *** بالنسبة لتعرضك للتنمر، خليني أنصحك بحاجة... إذا الإنسان مش شايفة حاجة معينة فيه إنها عيب أو نقص، مش هيسمح لحد ينطق كلمة غلط في حقه. إحساسك الداخلي هو اللي مسبب المشكلة ومخليكِ مش عارفة تواجهي أي حد بيتنمر أو بيوجه لك كلام مش كويس. دربي نفسك واتكلمي معها وبرمجي عقلك إن حتى لو سمعك ضعيف فده لا يعيبك في شيء ولا يشوه من نظرتك لنفسك ولا قيمتك. فيه ناس كتير ربنا مأنعمش عليها بنعمة السمع، حتى لو المجتمع شايفاها مشكلة هي مجرد ابتلاء لكن مش هو اللي بيحدد قيمة الشخص فعلا. وقت ما تثقي في نفسك وتوقني إن قيمتك أنتِ اللي بتحدديها مش نظرة الناس هتقدري بنظرة أو كلمة توقفي أي حد يحاول يتجاوز حدوده معك. *** أرجو إني أكون قدرت أساعدك شوية، وإن شاء الله ربنا يطمنك ويوفقك.
لعرض الإجابة في فدني اضغط هنا