السلام عليكم، المشكلة هتزيد بتوترك وخوفك منها. التوتر والتفكير الزائد والقلق خاصة في الساعات اللي بتسبق النوم كلها بتسبب نوم مضطرب ومن ضمن الاضطرابات حاجات زي الكوابيس وشلل النوم. الصلاة والأذكار واظبي عليها زي ما أنتِ حتى لو المشكلة مستمرة شوية، بس خلينا برضه نؤكد إن الذكر مش بس باللسان فلو مفيش خشوع في الصلاة أو حضور بالقلب فيها ويقين في الذكر فلازم نشتغل على ده عشان يحصل التغيير. فحاولي تشوفي طرق التعامل مع التوتر ومارسي رياضة خفيفة زي تمارين تمدد واسترخاء قبل النوم بساعة مثلا، اعملي روتين قبل النوم يساعدك على الاسترخاء، أعتقد لو بحثتي على الانترنت أو اليوتيوب هتلاقي أفكار، زي قراءة كتاب هادئ أو تفريغ أفكارك على الورق أو تنفس عميق... شوفي كده. ودوري كمان عن طرق فعالة للتدرب على التقليل من التوتر... هتلاقي نصائح اشتغلي عليها بجدية. الموضوع أكيد هيحتاج وقت ومثابرة، والأهم إنك توقفي خوف من المشكلة وتوقع لحصولها... أنتِ تقريبا بتحضري نفسك ذهنيا قبل النوم بتوقعك وقلقك فبتسببي حصول شلل النوم اللي خايفة منه. زي ما بيقولوا كده (اللي يخاف من العفريت يطلع له)
العفو، يا رب أكون ساعدتك شوية. تابعي كده وإن شاء الله تتحسني وتقل أكتر لحد ما تقف إن شاء الله... أنصحك كمان مع الأذكار تقرأي رقية شرعية كل يوم أو لو حد عندك في البيت يقدر يرقيك يكون أفضل وتشغليها جنبك لما تنامي... كمان سورة البقرة حاولي تقرأيها يوميا حتى لو قسمتِها على الأيام تساعد إن شاء الله لو فيه أي حاجة.. زي ما قال الرسول صلى الله عليه وسلم "اقرؤوا سورة البقرة، فإن أخذها بركة، وتركها حسرة، ولا تستطيعها البطلة (أي السحرة)" وربنا يعينك ويوفقك إن شاء الله.
تم النشر الاثنين، ١٢ يناير ٢٠٢٦
شكرا جدا لحضرتك حاضر ان شاء الله هعمل كده، عندك حق في جزء اني بهيأ نفسي قبل النوم انه هيحصل بيحصل فعلا بس انا في أيام بتعدي عليت بيجيلي ٧ مرات في اليوم تقربيا كل ما بغفل، وبحس في كل مرة ان نفسي بيقف لدرجة بفكر اني هموت وبسمع صوت عالي في وداني فبقيت اخاف غصب عني، كل مرة بقول مش هخاف لكن كل مرة بحس ان دي هتكون اخر مره ليا لاني بفتكرها سكرات موت والله وفي مرات بحس فيها ان مثلا حد مسك أيدي وافتح عيني اشوف ظل وبعدها بدقايق الاقيه اختفى كل ده بيوترني اكتر ،انا الحمد لله قل كتير عن زمان بقا ممكن يجيلي مره في الأسبوع بس بحاول اهو ودعواتك
تم النشر الاثنين، ١٢ يناير ٢٠٢٦
لعرض الإجابة في فدني اضغط هنا