انا متعلق بناس وبحبهم بجد يعني او ليهم معزه خاصه بس انا بقيت بلنسبالهم عادي او مش كده يعني هما كده بس انا بالغت في تقديرهم يعني بفكر فيهم دايما وبعزهم بس هما ممكن ميكونوش بيفكرو فيا زي منا بفكر فيهم ممكن اعرف ازاي احل المشكلة دي منغير مقعد افكر كتير واتعب نفسي
السلام عليكم، الناس مختلفين في قوة مشاعرهم تجاه الغير ودرجة تعبيرهم عنها. مش مشكلة لما تحب ناس وتعزهم بدرجة أكبر وتحب تسأل فيهم، دي طبيعتك ومش محتاج تحس بالذنب أو الضيق منها. أنت مشكلتك انتظار المعاملة بالمثل بدون عمل حساب لاختلاف البشر وتفاعلاتهم الاجتماعية وإنك بتعطي توقعات عالية فبتتصدم، ده غير إنك بتتعلق بالناس وده مش صح، الصح في العلاقات هو التوازن. الحل مع التعلق، هو انشغالك بنفسك وتركيزك عليها. كل ما انشغلت في يومك وأهدافك هيقل تعلقك واحتياجك للناس ومشاعرهم ومش هتركز مين سأل فيك ومين نسي. ممكن مشكلتك كمان كثرة التفكير ودماغك بتحلل كتير وتفصص في الأحداث والمواقف، يعني ذكرت إنهم (ممكن) ميكونوش بيفكروا فيك زي ما أنت بتفكر فيهم. وده معناه إنك أنت اللي حللت ووضعت افتراض ممكن يكون صح أو غلط وشغلت نفسك وأحزنتها بسببه. والتفكير الزائد ده برضه محتاج إنك تشغل عقلك بحاجات تانية أهم بحيث متلاقيش وقت للتفكير الجانبي في تفاصيل مش مهمة ومرهقة لك بس. ركز على نفسك وخليها أولوية وإن شاء الله المشكلة دي هتتحل. بالتوفيق.
تم النشر الأربعاء، ٥ أغسطس ٢٠٢٦
السلام عليكم، الحل بسيط جدًا أولًا التعلق بغير الله مذلة ثانيًا عاملهم زي ما هما بيعملوك بلاش ترفع مكانتهم، عامل بالمثل ثالثًا أتعلم إن الـ لأزم يكون في مكانة أعلى هو نفسك بمعنى بلاش ترهق نفسك في حاجة هي أصلًا عادية ومحتاجة معاملة عادية جدًا جدًا التعلق علاجة إنك تؤمن إنه مُهلك ليك وعائد مش مُرضي، طبعًا أدعي كتير علق نفسك بالقرآن والصلاة علق نفسك بأهدافك قلل الناس وكتر الأهداف والقراءة وأشغل نفسك وأشتغل عليها وأعمل لنفسك قيمة ومكانة عالية جدًا عشان بعدين هتلاقي غيرك عملك قيمة ومكانة عالية بس لأزم أنت تعملها لنفسك الأول وتعرف قيمتها وتعززها اتمنى أكون أفدتك بشيء بسيط بس صدقًا دا مش كلام مثالي دا كلام عن تجربة بالتوفيق 🌟
تم النشر الأربعاء، ٥ أغسطس ٢٠٢٦
أنا فاهمة شعورك تمامًا يا صديقي، وهو شعور طبيعي جدًا لما بنبالغ في تقدير ناس معينين ونحطهم في مكانة خاصة، وبعدين نكتشف إن التقدير مش متبادل بنفس القوة. ده بيحصل لأسباب كتير، زي إننا بنشوف فيهم صفات أو ذكريات بتخلينا نتمسك بيهم أكتر مما يستحقوا. الحل العملي هنا مش في إنك تحاول تغير مشاعرهم أو تقنعهم بقيمتك، لأن ده هيخليك تتعب أكتر. بدل كده، ركز على تقليل التفكير فيهم تدريجيًا من خلال ملء وقتك بأنشطة أو علاقات جديدة بتديك شعور بالتقدير المتبادل. مثلاً، ابدأ بتحديد أوقات محددة في اليوم ما تفكرش فيهم فيها، واستبدلها بحاجات بتفيدك زي تطوير مهارة أو التواصل مع ناس بيردوا عليك بنفس الحماس. كمان، حاول تقلل من التواصل معاهم لو كان بيفتح باب التفكير الزائد، وده مش قسوة، ده حماية لنفسك. تذكر إن الارتباط الحقيقي بييجي من الجانبين، ولو هما مش بيفكروا فيك بنفس الطريقة، فده مش عيب فيك، ده مجرد اختلاف في مستوى العلاقة. ركز على بناء تقدير ذاتي أقوى، وهتلاقي نفسك بتقلل من التعلق ده مع الوقت. لو عايز أفكار إضافية، ابحث عن أسئلة مشابهة على فدني عشان تشوف تجارب ناس تانيين.
تم النشر الأربعاء، ٥ أغسطس ٢٠٢٦
لعرض السؤال في فدني اضغط هنا