السلام عليكم، بصي هو بالنسبة لطولك فأنتِ في المعدل الطبيعي، إلا إذا عندك توزيع الدهون غير متناسق، أو نسبة الدهون زائدة عن الكتلة العضلية فيبان إن وزنك زائد رغم إنه على الميزان طبيعي. في الحالة دي بتبقى "سمنة ذات وزن طبيعي"، من أسبابها عدم ممارسة الرياضة وقلة الحركة، ولو أكلك غير متوازن (بتاكلي كربوهيدرات وسكريات أكتر من البروتينات) وأسباب تانية منها عدم جودة النوم وزيادة التوتر والقلق. *** لو كده أنتِ مش محتاجة تخسي بمعنى تنقصي وزنك على الميزان، أنتِ محتاجة تمارسي رياضة بحيث تحرقي مخزون الدهون وتزيدي الكتلة العضلية للجسم والتمارين مع الوقت هتخلي جسمك مشدود. كل اللي هتعمليه، تعملي نظام أكلك متوازن، تزودي بروتين عشان بناء الكتلة العضلية وتقللي الكربوهيدرات والسكريات، وزودي ألياف (خضار وفاكهة وحبوب كاملة) حسني نومك وقللي من القلق والتوتر. أنتِ قلتِ بلاش رياضة، بس مش شرط تمارسي رياضة تقيلة أو لفترة طويلة، في غرفتك عادي جربي تمارين تمدد مش هتاخد منك عشر دقائق كل يوم بس هتفرق بعد فترة وهتحسي جسمك مشدود. بلاش خالص ريجيم قاسي ولا تجويع، أنتِ مش محتاجة ده، وبيجيب نتيجة عكسية بعد كده أصلا. لو عمرك فوق ١٨ سنة شوفي كده الصيام المتقطع، بس متعمديش عليه وحده من غير تعديل نظام الأكل زي ما قلت في أول نقطة. وبجد حاولي تعملي معه تمارين، هيفرق معك. لو صعب قوي التمارين بالنسبة لك فعلى الأقل زودي حركة في البيت وبرا البيت، واستخدمي السلالم بدل الأسانسير سواء في البيت أو الكلية، ولو رايحة مشوار قريب بلاش تركبي مواصلة أو توكتوك مثلا وامشي الطريق، كل ده هيساعدك تحرقي الدهون الزائدة. ********* ممكن تقرئي المقال ده لمعلومات أكتر وإن شاء الله يساعدك في عمل خطة مناسبة للوصول لشكل الجسم اللي عاوزاه. https://altibbi.com/مصطلحات-طبية/تغذية/الوزن-الزائد بالتوفيق.💚💚
فاهمة أنا نقطة الاندومي دي.😅 بس فكري إن صحتك أهم والشكل اللي عاوزة توصلي له يستحق تجتهدي عشان تغيري الروتين ده. قللي الاندومي بالتدريج وابدئي ظبطي نظام أكلك. هو زي ما قلت الوزن نفسه في النطاق الطبيعي لكن طالما حاسة إن شكلك تخين يبقى المشكلة في نسبة الدهون بالنسبة للعضلات. جربي استخدمي الحاسبة دي عشان تعرفي نسبة الدهون عندك.. دخلي السن والطول والوزن، وهتقيسي محيط الرقبة والخصر والورك وتدخليهم في الحاسبة وهتطلع لك النتيجة https://medipolglobal.ar/calculators/body-fat-percentage-calculator تابعي قنوات رياضة وتغذية هتشجعك إن شاء الله تمشي على نظام صحي. اقعدي مع نفسك وفكري في الصورة اللي عاوزة توصلي لها بجد وغيري قناعاتك أو أي فكرة جواكِ بتقول لك إن صعب تغيري المعادلة دي أو تكسري الدائرة وتمشي على نظام صحي. والفكرة برضه في التدرج، متجبريش نفسك توقفي كل حاجة مرة واحدة أو تعدلي نظامك كله مرة واحدة، ابدئي واحدة واحدة تخلصي من العادات السيئة ودخلي العادات الإيجابية سواء في الأكل أو الرياضة. والتغيير بياخد وقت فاصبري على ما تشوفي النتيجة اللي عاوزاها. بالتوفيق.💚
تم النشر السبت، ٧ نوفمبر ٢٠٢٦
بصي هوا انا يعتبر توزيع الدهون عندي محايد بس المشكله شكلي تخين بجد و وشي بحسه تخين في الصور ده غير ان بحس حركتي تقيله حبه مع اني بتحرك اغلب الوقت و المشكله في اني تقريبا عايشه علي الاندومي و مش بقدر ابطل اكله و كل ما ازهق منه بخترعله واصفات عشان ارجع اكله ده غير انو ممكن افطر و اتعشي اندومي و علي الغدا باكل قليل جدا و بجد معرفش ايه السبب انو وزني كبير كده لاني ساعات اصلا ممكن ماكلش في اليوم غير واحد اندومي وبس بجد ومش هخبي عليكي ساعات ببقي جعانه ف باكل تاني حاجات قليله بس ده نادر، ومش بحب الحلويات و ممكن اكل بس علي فترات طويله، زهقت بجد من المعادله اللي مش عارفه احلها
تم النشر الجمعة، ٦ نوفمبر ٢٠٢٦
لعرض الإجابة في فدني اضغط هنا