انا طالبه تالته ثانوي، انا اساسا مضغوطه وبقا عندي خوف داخل طول الوقت بسبب اني كل ما اشوف حاجه ليها علاقه بتالته ثانوي ادني افكر اذا كنت اقدر اجيب المجموع اللي عايزاه ولا لأ،
بالاضافه ان انا عندي ادمان بتطبيق على الموبايل، بيبعدني عن المذاكره وعن ربنا وعن كل حاجه وانا عارفه دا بس مش عارفه ابعد عنه لأن بصراحه لما بتضايق بروحله علي طول، هو التطبيق صحيح حسن حاجات كتير ليا في الانجليزي لأنه خلاني مثلا اعرف اكتب براجراف انجليزي بطريقه حلوه خاصه بيا انا لكن الوقت عندي بيضيع بسببه
بالاضافه ان اللي حواليا ببقى فاهمه ان عندهم ضغط بسبب شغلهم، لكن بيخرجو ضغطهم عليا فوق الضغط اللي انا فيه اصلا، دا مضايقني يعني انا اساسا بضغط علي نفسي عشان ابينلهم ان كل حاجه تمام وعادي عشان مش بحب اتكلم في مشاكلي لكن هما بيخرجو مشاعرهم السلبيه عليا ودا بيأثر عليا جامد،
وهزرت معاهم مره ب كنت عايزه اعرف الاجابه فعلا، قولتلهم انا حلمي مش طب، انا عايزه حاجه تانيه هتوافقو بيها ولا لأ، مردوش يردو وقالولي بجديه كدا كليه اي الاول، ففهمت انهم لو معجبتهمش الكليه هيرفضو، دي حاجه مخولاني بردو،
انا اساسا عامة بحب الطب اوي والجرايم بردو ف محتاره ما بين كليه الطب واي كليه تانيه ليها علاقه بالجرايم والجنائيات زي العلوم او الشرطه او حقوق، كدا، بس انا حددت هدف واحد وحليت المشكله دي الحمد لله واخترت الطب بمزاجي بس اتضايقت منهم في الجزئيه دي وعمال يجيلي خوف داخلي طب لو مدخلتش طب اعمل اي،
سمعت كمان عن امتحان كيميا السنه اللي فاتت وفيديو بتاع خالد صقر فعرفت ان الامتحان صعب اكتر من انا متوقعه والوزاره كانت منزله قريب انها هتخلي امتحانات السنادي بنفس مستوي امتحان الكيميا السنه اللي فاتت، بحاول اقنع نفسي ان رغم الامتحان كان صعب الا ان في عيال قفلته وأنا مش أقل منهم واقدر اعملها والكلام دا كله لكن لازال الخوف داخلي
السلام عليكم، بصي دي كلها أفكار بتشتتك مش أكتر، لما تكوني حاسة بضغط لازم عقلك يقعد يسوف بأفكار زي دي هربا من المسؤولية اللي وراكِ. أنتِ مش مطلوب منك تفكري في أي حاجة من دي أو تشغلي بالك بها، مطلوب بس تعملي اللي عليكِ وتذاكري، اسعي واجتهدي وأنتِ متوكلة ومتيقنة إن ربنا مش هيضيع تعبك وأيا كان اللي ربنا هيكتبه لك فهو الخير لك. *** بالنسبة للتطبيق، لو مش هتقدري تحذفيه أو تعملي له حظر تام على جهازك فجربي التخلص من إدمانه تدريجيا، كل يوم قللي كم دقيقة في استخدامه عن اليوم السابق وزودي قصاده عادة تانية إيجابية، سواء أضفتِ الوقت ده للمذاكرة أو تعلم مهارة أو ممارسة هواية تانية تفرغ من ضغط الدراسة عليكِ. *** لو اللي حولك بيفرغوا انفعالاتهم وضغوطهم حولك وتكلمتِ معهم بهدوء في الموضوع ده وقد إيه بيتعبك ويضغط أعصابك وملقتيش نتيجة من الكلام فخلاص حاولي قدر الإمكان تقللي التواجد في محيطهم أو الاحتكاك بهم، مؤقتا على ما تمر فترة الثانوية والامتحانات. (مش بقول طبعا تقطعي معهم تماما، قللي بس المواقف اللي بتجمعكم وتسبب تعرضك لانفعالاتهم) *** بالنسبة للطب وحبك للجنائيات والجرائم، فعادي، عندك مجال الطب الشرعي، بتدرسيه في طب وممكن تختاري التخصص فيه بعد التخرج. بس عامة، ركزي دلوقتي زي ما قلنا على مذاكرتك ومتتعلقيش بتوقع معين عشان في الآخر ربنا وحده عالم الخير في أي طريق. راجعي بانتظام وتدربي كتير على حل امتحانات سابقة ومتهمليش أبدا فترات الراحة بين المذاكرة وممارسة أي هواية خلالها وكافئي نفسك باستمرار، ده كله هيحفزك ويقلل ضغط الثانوية عليكِ. وبالتوفيق إن شاء الله. 💚💚
تم النشر الخميس، ٥ نوفمبر ٢٠٢٦
أنا فاهمة تمامًا الضغط اللي بتمرّي بيه يا بنتي، وإن الوسواس ده مش مجرد خوف عابر، ده بيأثر على تركيزك ونفسيتك يوميًا. اللي بيحصل معاكِ طبيعي في مرحلة الثانوية العامة، خاصة مع الضغط العائلي والامتحانات الصعبة اللي سمعتِ عنها، لكن المهم إنك تقدري تتعاملي معاه بخطوات عملية بدل ما يسيطر عليكِ. بالنسبة لإدمان التطبيق، جربي تحددي أوقات ثابتة ومحدودة له يوميًا، مثل ساعة واحدة بعد الانتهاء من هدف دراسي معين، واستخدميه كمكافأة بدل ما يكون ملجأ عند الضيق. كمان، قسمي وقت المذاكرة لجلسات قصيرة مركزة مع أهداف واضحة زي "أحل 10 مسائل في الكيمياء"، وتابعي تقدمك يوميًا في دفتر صغير عشان تشوفي إنجازاتك وتقللي الوسواس. وتذكري إن التوكل على الله مع الأخذ بالأسباب هو أساس الراحة النفسية، فادعي الله بصدق واستعيني به في كل خطوة. أما عن ضغط العائلة، فأنتِ مش ملزمة تثبتي لهم إن كل شيء تمام دائمًا، جربي تتحدثي معاهم بهدوء في وقت مناسب عن مخاوفك دون تفاصيل زائدة، وأكدي لنفسك إن اختيارك للطب جاء بمزاجك وهو هدفك. لو ما دخلتشِ الطب، فهناك بدائل كثيرة في مجال الجرائم والجنائيات مثل العلوم أو الحقوق، والحياة مليئة بالفرص، والمهم إنك تبني مهاراتك الآن في اللغة الإنجليزية والكتابة اللي اكتسبتيها من التطبيق. ابحثي عن أسئلة مشابهة على فدني للحصول على وجهات نظر إضافية، وتذكري إنك قادرة على التعامل مع هذا الخوف خطوة بخطوة. أنتِ قوية، وكل ما تتقدمي في الدراسة بهدوء وتنظيم، هيقل الوسواس تدريجيًا.
تم النشر الخميس، ٥ نوفمبر ٢٠٢٦
موضوع أن حد يخرج الطاقة السلبية على حد ده صعب وللاسف كلنا بنقع فيه غصب عننا فا تقبلي أن جزء من امانك المادي والنفسي وتركيزك على مستقبلك تمنه نفسية غيرك ومعاناة غيرك سواء ماما ولا بابا عشان في الأساس هما بيفكروا فيكي .. مش بقولك استحملي داخليا بس إضفاء معنى على الشيئ بيقلل من حدته .. هما بيحبوكي وصدقيني مش قصدهم .. و شايف بالنسبه للثانوية أنتي عارفه انتي عايزه ايه كويس فاضل انك تاخدي القرار وتضحي بأي حاجة. ده تمن النجاح أو النتيجة اللي نفسك فيها ربنا يوفقك يا رب وتخشي طب
تم النشر الخميس، ٥ نوفمبر ٢٠٢٦
بصي عامة التطبيق.اللي انتيي محملاه ده امسحيه و بالنسبه ادخل ايه دي بتاعه ربنا مش بتاعه حد. "وأن ليس للإنسان إلا ما سعى" تمام فاعملى اللي عليكي النتيجه دي بتاعه ربنا تمام اما الطاقه السلبيه دي صلي ركعتين لله و طلعي انتي كل حاجه لربنا فسبيها على الله و متفكريش كتير اصلك معلش متزعليش مني مش هتموتي يعني لو مدخلتيش طب عادي الدنيا ماشيه فاهمه بالتوفيق يا حبيبه قلبي ♥
تم النشر الخميس، ٥ نوفمبر ٢٠٢٦
لعرض السؤال في فدني اضغط هنا