السلام عليكم يا مريم، كل عام وأنت بخير ورمضان كريم عليك.❤️ شكرًا جدا على السؤال وشكرا لطلب رأيي وهحاول إن شاء الله أجاوب من خلال تجربتي وأرجو إن إجابتي تفيدك. بالنسبة لإدارة الوقت وأفضل طريقة فهو الحقيقة مفيش طريقة محددة هي الأفضل والأمر بيختلف من شخص للتاني. أنا جربت طرق كتير وجربت كتير مع حلول التسويف وتنظيم الوقت، وفي الآخر اللي وصلت له إن أي طريقة مش هتنفع إلا لو فيه إلزام للنفس واستمرارية. يعني أنا ممكن أتبع أفضل طريقة وتكون مناسبة لي فعلا لكن أنا معالجتش مشكلتي مع التسويف والالتزام فأيًا كان النظام اللي هتبعه سواء قائمة مهام أو تقسيم الوقت فمش هلتزم به وهينتهي اليوم من غير ما أكون خلصت المهام اللي مطلوبة مني. ** أنتِ ممكن تجربي أي طريقة منهم وتلتزمي بها كم يوم وبعدين تجربي غيرها وتقارني بين النتائج وأدائك كان أفضل مع أي طريقة. وممكن في الآخر تلاقيكِ عملتِ نظام مختلف خالص يكون خليط من كذا طريقة ويناسبك أنتِ. أنا بعد كل التجارب علمت نفسي إني أكون مرنة. يعني أوقات ممكن أتبع قائمة المهام وحاليا بقالي فترة بقسم الوقت... يعني بكتب من الساعة كذا لكذا ده وقت المهمة الفلانية ولما يخلص وقتها حتى لو مبدأتهاش أو أنجزت فيها قليل باخد بريك وأبدأ المهمة التانية في وقتها. ** قائمة المهام كانت ساعات بتحسسني في آخر اليوم بإحباط إذا لقيتها فاضية أو متعلم حاجات بسيطة من المهام لكن أعترف إن أحيانا كان عدم التزام مني أو عدم توزيع للمهام بشكل صحيح على اليوم أو وضع مهام كتيرة في اليوم من غير حساب جيد للوقت. **** كمان اختيار الوقت للمذاكرة أو المهام وأفضل وقت هل الفجر أو غيره ده بيفرق من شخص للثاني. فيه ناس نظامه ليلي، night owls بتكون طاقة تركيزهم وإنجازهم أكتر بالليل وناس العكس Early birds طاقتهم وتركيزهم عالي من الفجر. وساعات زي ما قلتِ ممكن تحصل ظروف أو نظام نومك يتغير فالحل هو إنك تكوني مرنة وتعتبري يومك بيبدأ من وقت ما صحيتِ وتتابعي مهامك المطلوبة لحد ما تقدري تنظمي يومك ونومك من تاني. ************** أنتِ في ثانوية عامة حاليا، فمش مهم أي نظام تتبعيه... ممكن أنصحك بـtime blocking وأرجو يكون أنسب لشخصيتك... فيه قانون باركينسون بيقول إن المهمة تتمدد لتناسب الوقت، فلو مقسمتيش الوقت وأعطيتِ وقت لكل مهمة وتركتِ الوقت عايم هتلاقي الوقت بيمد معك وحاجة ممكن تخلص في ربع ساعة تخلصيها في ساعتين أو حتى يوم. فجربي تلتزمي بتحديد وقت لكل مهمة حتى لو اتبعتِ نظام قائمة المهام. ____ بس ممكن تدمجي time blocking مع قائمة المهام عشان تستفادي من مزايا كل واحدة، ** ابدئي اليوم وأنتِ في كامل تركيزك بأصعب مادة عندك واللي محتاجة أكبر تركيز. لو حاسة إن الطريقة دي هتمنعك تحسي إن فيه إنجاز زي مثلا ما تكوني بدأت بحاجة سهلة خلصت بسرعة وعلمتِ عليها صح، ممكن تدمجي هنا قائمة مهام صغيرة خاصة بالtime blocking المحدد... يعني مثلا اخترتِ من الساعة 6 إلى 8 صباحا لمذاكرة الرياضيات. فممكن تقسمي الوقت ده لمهام أصغر وتعملي قائمة مهام بها... يعني مثلا ربع ساعة مراجعة القوانين، ربع ساعة حل مسائل على الجزء الفلاني، ربع ساعة لكذا... وكل ما تخلصي مهمة منهم علمي عليها صح. كده هتحسي إن فيه إنجاز في المهمة وهتكوني دمجتِ الطريقتين سوا. *** زي ما قلت في الأول، كل ده لازم له تدريب على الاستمرارية والانضباط الذاتي. ومش معنى إنك لو تعثرت في الاستمرارية والانضباط إن فيه مشكلة فيك، لأ عادي تتعثري ووقت يقع منك وتسوفي ساعات بس أهم حاجة إنك بترجعي تتابعي وتكملي. الموضوع في الآخر هيبقى تعود مع الأيام وتركيزك وطاقة استمراريتك هتزيد إن شاء الله. ********* حاولت قدر الإمكان تكون إجابتي شاملة ومفيدة بس لو فاتتني حاجة أو عاوزة تسألي في أي تفصيلة اسأليني في التعليق وهرد إن شاء الله. بالتوفيق يا جميل.💚
سعيدة إني ساعدتك شوية وإن شاء الله بالتوفيق في دراستك وكل حياتك. ❤️
تم النشر الأحد، ١ مارس ٢٠٢٦
جزاكِ الله خيراً على مساعدتك الجميلة يا دكتورة 💗
تم النشر السبت، ٢٨ فبراير ٢٠٢٦
لعرض الإجابة في فدني اضغط هنا