انا عندي أخت أصغر مني بسنتين وبحبها جدا ...ونفسي اعرف انصحها بطريقه كويسه تقتنع اننا بنخاف عليها وعايزين ليها الخير ...هي دخلت في موضوع الانستا وسوشيال ميديا والموضوع ده ومش عارف ابعده ازاي عنها من غير ما اخسر الأخوية اللي بيننا بحكم اني ذكر ورجل بطبعي الغيره علي اهل بيتي واللي يخصني ..
بس برضوا محتاج اتحكم في عقلي شويه وغيرتي بدون ما اتعصب او اخسر الأخوية اللي بيننا وبدل ما تلجأ ليا تروح تلجأ للغريب ...كل ما احاول اقفلها كل ايميل هي بتعملوا على انستا او الفيس او اي حاجه مرتبطه بالسوشيال وبيخلي دماغها تتسحل مع القرف سوشيال ميديا الاقيها بتعمل واحد تاني من ورايا وممكن والله اعلم تكلم ولاد ...
احنا ناس اتربينا على الدين من صغرنا وكل حاجه بس برضو السوشيال بيخلي كل الناس تتسحل وتنسى هو وظيفته ايه في الحياه ...
خلاصه الكلام قصدي انا مش عارف اتصرف حد عنده فكره او حل ...وازاي اتعامل مع الموضوع ده ...لاني مش عايزها حد يضحك عليها او تخسر دينها او تخسر الاخره وتتلهي بالدنيا عايز أنصحها واكلمها واتفاهم معاها ..حد عنده حل ...ولو يعرف ينصحني ازاي اتعامل معاها زي ما قال الله ورسوله وجزاكم الله خيرا
السلام عليكم، المشكلة مش في إنها يكون عندها حسابات على السوشيال ميديا ومنعك لها هيكون الحل، ده مش حل خالص. بنات كتير عندهم عادي سوشيال ميديا وبيستخدموها بطريقة كويسة وعارفين حدودهم. (الممنوع مرغوب) محاولة منعها من امتلاك أي حسابات هيجيب نتيجة عكسية... زي ما قلت كل ما تقفلها حساب تفتح واحد جديد من وراك. المنع مش الحل، خاصة لو هي شايفة إنك بتمتلك عادي حسابات على السوشيال ميديا (في حالة كان عندك) فكرة إن الولد عادي يبقى له سوشيال ميديا ويستخدم النت بحريته وحتى في المعاملات الاجتماعية مسموح له بأخطاء شرعا حرام هو يعملها عادي لكن لو بنت لأ... دي فكرة غلط. حتى الشباب كتير منهم بيستخدموا السوشيال والنت بطريقة غلط جدا وبيتجاوز الحدود المسموحة شرعا. ** أنا متفهمة غيرتك وخوفك عليها لكن قبل المنع لازم يكون فيه صحوبية ونصيحة بالحسنى وإنكم تنموا فيها حس المراقبة الذاتية. (فاللي يمنعها من الغلط ساعتها مراقبتها لذاتها وخوفها من ربنا مش الخوف منكم) ** ممكن تسألها كل فترة عن أحوالها ولو فيه حاجة مضايقاها وتخليك مصدر ثقتها وأمانها وتتفهم مشاكلها. (ده مش هيحصل بين يوم وليلة، خليك صبور وابني علاقتكم بثبات مع الوقت) ** ممكن تشوف فيديوهات مفيدة أو في حاجة هي مهتمة بها وتبعتها لها.. ده هيخليها تاخد الجانب الإيجابي من الانترنت. رشح لها ناس بيقدموا محتوى نظيف وهادف (لكن خد بالك ميكونش بطريقة مبالغ فيها أو باستمرار مزعج لها... كل فين وفين عشان متحسش إنك بتحاصرها أو بتحاول تفرض عليها الأفكار اللي تتابعها) ** ممكن بطريقة مواربة تنبهها لطريقة تفكير الشباب (أنت كشاب أكيد فاهم عقلياتهم وأفكارهم ومداخلهم للبنات) وفي نفس الوقت تملأ عندها أي فراغ عاطفي من ناحية الأهل ممكن يخلي حد لا قدر الله لو لقى عندها مشكلة في النقطة دي يحاول يستغلها. لو انت بتستخدم السوشيال ميديا خليك قدوة لها وبين لها ازاي تستخدموها بحكمة، زي إنكم مثلا تتفقوا على وقت محدد في اليوم ويكون ده قاعدة سارية على البيت بحيث متحسش إنها وحدها اللي بيتفرض عليها حدود، ومن ناحية تانية تتجنب إدمانها للسوشيال ميديا وتضييعها الوقت عليها. *** استعن بالله الأول وجدد نيتك واسأل الله لك ولها الهداية والرشاد. لو جيت تتكلم معها خد بالك من الحوار ولو حسيت إنك هتتعصب عليها وقف نفسك بسرعة وافتكر إن الرشاد من ربنا والعصبية هتأثر سلبًا وهتخليها تنفر منك وتضيع كل مجهودك وفكر نفسك بضعفها كبنت وواجبك ناحيتها الاحتواء مش الانفعال والعصبية. ** طولت كتير بس أرجو أكون أفدتك شوية. وربنا يعينك ويوفقك في هدفك.
تم النشر الخميس، ٤ ديسمبر ٢٠٢٥
بص انا ك بنت بقولك ان طالما احنا شبعانين حنية من الاب والاخ مش بنفتح باب لاي شخص تاني يدخل حياتنا انت وظيفتك تقعد معاها وتتكلم معاها بهدوء وقولها انك بتحبها وبتغير عليها دا مش هيقلل منك بالعكس هي هتفرح وهتبقي مبسوطة وكلمها عن وجهة نظرها ويا ريت تقولها ان الشباب برة بيشوفوا البنات ازاي وانهم ممكن يتراهنوا علي مين اللي يوقع البنت الاول لما تقولها كدا هي هتخاف قبل ما يحصل معاها حاجة هتجري عليك تقولك وانت اديها مساحتها يعني لما تيجي تحكيلك حاجة اسمعها للاخر وبلاش تتعصب حتي لو عملت مصيبة علشان متفقدش ثقتها فيك وانصحها بالراحة وخد رايها في حاجات تخصك البس دا ولا لاء كدا انت بتحسسها انها مهمة جدا في حياتك
تم النشر الأحد، ٧ ديسمبر ٢٠٢٥
الاول ادعيلها كتير تاني حاجه الاهتمام بالسوشيال ميديا هو عرض لحاجة تانيه شوفها واحكي معاها شوف دماغها فيها ايه هي حابه السوشيال عشان أصحابها عشان متضايقه عشان ايه بالضبط . كمان فكرة انك تحذف حساباتها حاجه مش مثاليه إلا لو كانت في ثانوية عامة مثلا غير كده مفيش سبب مقنع يخليك تحذف حساباتها وخاصة لو كل البيت ليه حسابات ما عدا هي ممكن تكلمها تقلل من استخدام الموبايل عموما وتشغل نفسها بحاجة تنفعها ممكن مثلا تشترك لها في درس تحفيظ قرآن او تشوفلها مسجد فيه دروس للنساء تنزل فيه وقت معين الأنشطة الاجتماعية هتشغلها عن وسائل التواصل كتير. أنصحك تقعد انت وهي تسمعوه بلاي ليست للمهندس أيمن عبدالرحيم تأسيس وعي المسلم المعاصر الجزء الاول والثاني و كمان التربية الإيمانية للمهندس فاضل سليمان اسمعوا مع بعض قناة انه القرآن وهدى للناس و المهندس محمد المقرمي رحمه الله اسمعوا مع بعض سلاسل الشيخ احمد السيد. ليه كلمتك تسمعوا مع بعض لان السوشيال بتتابعها عشان انت فاضي، لما تبقى مش فاضي ووراك جدول مش هتلاقي وقت للسوشيال
تم النشر السبت، ٦ ديسمبر ٢٠٢٥
بقترح عليك تتناول الموضوع مع أختك من وجهة نظر مبنية على أساس تربيتكم الموجودة فعليا. يعني تقولها خلي بالك يا فلانة إحنا لازم تكون شخصيتنا في الواقع هي بالظبط شخصيتنا عالنت. لو إحنا بنتصرف عالنت بطريقة مختلفة عن تصرفاتنا في الواقع، يبقى إحنا كده عندنا ازدواجية وبنخبي حاجات ودي حاجة غلط جدا وهي أبسط علامات المعاصي والذنوب والاثام. هل احنا في الواقع ممكن يكون لينا أصدقاء من الجنس الآخر؟ هل إحنا في الواقع ممكن نقعد نتكلم ونحكي مع حد غريب؟ هل إحنا في الواقع بنسلي وقت فراغنا بالتعرف على الناس في النوادي والكافيهات؟ الإنترنت اخترعوه علشان يقرب المسافات ويسهل الصعوبات، لكن مش عشان يغير الثقافات والأفكار والمرجعيات والأخلاق. فأحنا كل حاجة بنعملها عالنت، عشان نعرف هي صح ولا لا، أبسط حاجة نسأل نفسنا هل إحنا مستعدين نعملها في الواقع وبنعملها عالنت فقط للتسهيل؟ ولا منقبلش نعملها في الواقع أصلا لأنها ضد أخلاقنا؟ خلي بالك يا فلانة لو بدأنا النهارده نعمل أي حاجة صغيورة خالص عالنت إحنا لا نقبلها في الواقع، الحاجة دي هتكون عبارة عن بذرة ازدواجية في شخصيتنا عمرها ما هتفضل في حجم مستقر وهتفضل تكبر يوم بعد يوم وتمرض شخصيتنا وتحطم صحتنا النفسية والعقلية تماما. الكلام اللي فوق هو أبسط نوع من المرجعية العقلية المنطقية اللي بتقول إن الإنسان لازم تكون شخصيته واحدة مش مزدوجة. أما لو فيه في الأساس مرجعية دينية قوية فالأمر طبعا محسوم: الاختلاط والتواصل بين الأجانب من الجنسين محرم قطعيا إلا لضرورة، سواء عالنت أو في الواقع.
تم النشر الجمعة، ٥ ديسمبر ٢٠٢٥
اعتقد اخت حضرتك ف سن المراهقه هتكون محتاجه حد يصحابها ويحتوايها بدل ما تاخذ الامور بالغصب او بالعافيه لاني ساعته مش هتستجيب يعني ممكن عادي تفتح سيوشيال لكن ممكن بردو تصحبها وتتكلم معه ومن وقت للاخر تفتح الاكونت بتاعه وتطمن وده طبعا مش علطول ولو كان عندها اخت بنت ف تتكلم معها افضل لكن قفل الايميل او غيرو مش هتستجيب ف خليك قرايب منها وعرفها انك بتخاف عليها وواضحلها وجهه نظرك احسن ما تعمل شئ غلط من وراكم
تم النشر الخميس، ٤ ديسمبر ٢٠٢٥
اتعامل معاها بالراحه ومتضغطش عليها اكيد عندها وقت فراغ كتير علشان تبقي عاوزه تتسلي اخرج معاها لو مش معاها صحبات اسمعوا فيلم خليها تقرأ كتب انصحها تطور اللغه علشان في المستقبل يكون معاها علي الاقل حاجه تنتفع بيها وكل دا بالهدوء مش بطريقه استهزاء او تقليل وصدقني هتوافق احنا البنات لو اتعاملنا بالحنيه بس بنتنازل هي بس عنيده معاك لانها مفكره انك بتتحكم فيها مش خايف عليها ودا بيزيد عنادها
تم النشر السبت، ٦ ديسمبر ٢٠٢٥
لعرض السؤال في فدني اضغط هنا