السلام عليكم، بصي بالنسبة لرأيي الشخصي فمعنديش مشكلة مع زواج الجنسيات المختلفة طالما الدين واحد، كل جنسية فيها الحلو والوحش. الفكرة بس إن زواج الجنسيات لازم تفكري كويس قبل ما تاخدي الخطوة، هو زي أي زواج بس لازم تعملي حساب الاختلافات الثقافية وهل هتقدري تتعايشي معها أو هيكون صعب بعد كده. في مصر حتى، هتلاقي لو بنت من بحري تزوجت من الصعيد أو من مكان أبعد من بلدها بيكون فيه شوية صعوبة وتردد عشان اختلاف البيئة والثقافة رغم إننا بلد واحد فكل ما بعدت المسافة وزاد الاختلاف بيكون الأمر أصعب فمحتاجة تعملي حسابك على النقطة دي كمان. ** بالنسبة لأهلك، فتقبلي إنه طبيعي يكون عندهم تخوفات، حاولي تختاري وقت هادئ تناقشيهم فيه وتردي على تخوفاتهم، بس أهم حاجة خليكِ هادئة تماما، متنفعليش وتتعصبي عشان ميعندوش قصادك ويرفضوا يسمعوا منك أي كلمة. *** اللي قدامك دلوقتي: الأول، صلي استخارة، بس اركني مشاعرك على جنب وخليكِ حيادية، وفوضي الأمر والاختيار لله ولو فيه خير في الزواج حتى لو أهلك معترضين حاليا فربنا هييسر الأمر من عنده. ثانيا، حاولي بس متعمديش على القلب في قرارك... حتى لو هتتزوجي من مصري هنصحك بنفس النصيحة. الزواج بالذات لازم تاخدي القرار بعقل وحكمة ومتغلبيش العاطفة، الحب للأسف بيعمينا وممكن يخلينا نقبل عيوب وأوضاع مش في صالحنا وبعد ما العاطفة بتبهت بنصطدم بالأمر الواقع وده حصل في زواجات كتير كانت قائمة على الحب. *** ثالثا، لو أهلك اقتنعوا ممكن تخليه يزورهم ويتعرفوا عليه عن قرب وممكن لو تعرفوا ناس مسافرين في دولته ياخدوا عنوان أهله ويسألوا عنهم. كمان نقطة أخيرة مهمة، مهم جدا تسألوا عنه كمان في سفارة بلده، كان فيه حالات قبل كده البنات اكتشفت من السفارة إن الأشخاص اللي متقدمين لهم عليهم سجل جنائي في بلدهم. فدي نقطة زيادة عشان الاطمئنان. ** ممكن تشوفي على اليوتيوب تجارب البنات المتزوجات من أجانب هيعطوك نصائح أكتر وهينبهوك للنقاط اللي لازم تاخدي بالك منها. وإن شاء الله اللي فيه الخير يقدمه ربنا. بالتوفيق.
لعرض الإجابة في فدني اضغط هنا