أنا دلوقتي ليا بنت عمتي بتيجي كل فتره هيا و أهلها بيزرونا هيا أصغر مني بسنتين دايما لما كانوا بيجوا و أنا لسا 7/8/9/10 سنين كنت بعمل أى حاجه علشان العب معاها أو ألفت نظرها و ده جاب نتيجة عكسية الصراحه و مبقناش نتكلم حتى و لو قعدين مع بعض فى نفس المكان
ولكن كانت بتيجي فى بالي أول ما افتكر موقف ليها أو افتكرها هيا شخصيا لكن ولله يعلم مكنتش بفكر فيها تفكير وحش أو نية خارجه
لحد رمضان اللي فات و كانوا معزومين عندنا و طبعاً بعد صلاة التراويح بتلاقي السيدات متجمعين فى الاوضة و بيتكلموا
فى الوقت ده كنت قاعد لوحدي بعيد عنهم طبعاً لقيتها معديه بسلم عليها ازيك عامله إيه و سألتها عملتي إيه فى الدراسة لقيت الكلام هيطول و إحنا بنتكلم و احنا واقفين قولتلها تعالي نقعد و فضلنا نتكلم و كان كلامي فى نية النصح فى إني أنصحها فى إنها تتصرف إزاي خصوصاً إن أنا و هيا تفكيرنا متشابة بنسبة عالية جداً فمحدش فينا خرج عن سياق الكلام و دخل فى نقطة برايفت عن التاني و فضلنا على كده تقريباً 3 ساعات محدش فينا كان حاسس بالوقت ولا كأننا كنا بنلعب لعبة مأدركناش الوقت غير لما أختها الصغيرة قالتلها تلبس الكوتش علشان هيمشوا عدا الموقف ده و بصراحة تفكيري فيها زاد عن الأول
و اتكرر موقف برضوا مشابة كانوا فى زيارة عندنا فى العيد و أنا كنت لسا مخلص مذاكرة و فعلاً هلكان و مش هذاكر تاني خلاص و الامتحان الصبح قولت أنزل أقعد تحت أكل و بعدها أقعد قدام الباب شوية نزلت لقيت عمتي و هيا معاها دخلت كلت و طلعت بره كان فى فرح قدام الباب لبست السماعة علشان مسمعش الأغاني شوية و لقتها جت قعدت جنبي بحجة هسمع الأغاني علشان مش سمعاها كويس و هيا جوا البيت أنا فهمت بس قولت مش هيحصل حاجه فتحت كلام معايا و حصل نفس اللي حصل لكن ولله محدش فينا بيتخطى الحدود مع التاني و محدش فينا بيقول كلام يتفهم بكذا معنى و دايما مواضيع عامه
بس معرفش بسبب إني مقبل على الجامعة بإذن الله بدأت أقول اللي أنا بعملوا ده بيضرها قبل ما يضرني و لو حد شافها قاعده معايا هيقول إيه ولا هيفكر فيها إزاي و فى نفس الوقت بقول لو اتكرر الموقف أقوم من جمبها و احرجها ولا مدام مفيش تخطي حدود فى الكلام و المقابلات بتكون فى المناسبات بس يبقى مفيش ضرر ولا مشكلة ؟
و إضافة علشان أبقى قولت كل حاجه أنا بحس معاها بشعور غريب حرفياً الوقت اللي بكلمها فيه أنا مبسمعش صوت دقات قلبي بيبقى ولا كأنوا وقف خالص و ده بالنسبالي إنجاز علشان أنا لو قاعد مع مين ببقى سامع صوت دقات قلبي ولا كأني لابس سماعة و كان تفكيري كلوا مشغول بيها و مكنتش عارف أفكر فى أى حاجه تاني غيرها ولا حتى امتحان بكره أنا وصلت لدرجة إني روحت الامتحان زي كأني رايح رحله مبسوط آخر إنبساط و مش شايل هم حاجه.
ملحوظة ( قصدي بكلمة قاعدين جنب بعض مش لازقين يعني فى مسافة ،،، و محدش فينا واخد رقم التاني علشان محدش دماغه تروح للفكره دي ،،، )
و أرجوا قبل ما تظن فيا بسوء تسأل و أنا اجاوبك و أقولك هل ظنك ده صح ولا غلط
و لو وصلت قراءة لحد هنا فأنا أشكرك حتى و لو مش هتجاوب.
انجذاب طبيعى من طرف لطرف اخر . بدأ معاك من زمان واتجدد دلوقتي بتفاصيل اوضح واقوى لان السن مختلف. هى اعجبت بردوا بنصحك ليها وانكم متشابهين فى حاجات زى ما انت قولت ...فالانجذاب بقي متبادل نوعا ما. ودى حاجة جميلة انك تكتشف ان فى شخص بقربه انت بتكون هادئ . انت عارف اصول الدين واصول العرف كمان وعارفه انك مش بتسأل فيهم اصلا. المواقف دى بتحصل عادى وانت عارف هتعمل ايه عشان ميبقاش الشيطان زينلك حاجة توديك فى مكان مش بتاعك اصلا....وان شاءالله اول ما تبقي جاهز للخطوبة ع الاقل ...اجرى واقرى فاتحتها عشان بتخليك مبسوط من غير حاجة.
تم النشر الثلاثاء، ١١ يوليو ٢٠٢٣
انت متعلق بيها مش اكتر انصحك تدخل البيت من الباب مش من الشباك وتتقدم لها طالما في قبول منها ومنك وواضح انك بتحاول تحافظ عليها حتى لو الوقت مش مناسب استني اما تتخرج أو هى تخلص واتقدم وكما معاها حياتك طالما أنك بتتحسن برؤيتها فليه متكملش معاها حياتك ربنا يرشدك الطريق الصح اتمنى اكون أفدتك لو بحتى لفت نظرك لشئ أو نقطه محدده 🕊️
تم النشر الثلاثاء، ١١ يوليو ٢٠٢٣
المفروض الكلام مع أي حد أجنبي (بما فيهم بنات العم والعمة والخال والخالة) بيكون في الضرورة والحدود (من قصة سيدنا موسى في القرآن) ١-عند الضرورة. ٢-على قدر الحاجة (الكلام قد الحاجة الي محتاجها). ٣-بدون رفع الكلفة (يعني بنقول لكل واحد باسمه العادي من غير اسم خاص هو متسمي بيه). وهو عموما الولد بيميل إنه يتكلم مع البنت ف لو أنت مقدم على زواج خلال سنة مثلا أو سنة ونص ومستعد تتقدم لخطبة قيمها تقييم عقلاني واسأل عن صفاتها كويس ولو ناسبتك واستخير وتوكل على الله، لكن لو خطوة الزواج مش قريبة فنصيحة نزل التعامل معاها للحد الأدنى (على قدر الضرورة فقط) عشان (ذلكم أطهر لقلوبلكم وقلوبهن) كما قال الله، وربنا يوفقك ويرشدك لما يرضيه
تم النشر الثلاثاء، ١١ يوليو ٢٠٢٣
هو مش عيب طلاما في حدود ومش بتلمسها ولا بتقربو من بعض وازا انت مش حابب انك تكلم معاها اقعدو قدام حد من قرايبكو او كده لكن لو هي عاوزاك لوحدك فهما انك خايف عليها هيفرق بدل ما تسبها وهي مش هتعرف هي عملت اي غلط ومع فهمي انكو اخوات بس لكن مش في حب وبنسبه لقلبك وكده فا تقريبا انت يا مكسوف يا بتحبها بقي
تم النشر الثلاثاء، ١١ يوليو ٢٠٢٣
متشكر كدا و إن شاء الله هعمل بكلامك.
تم النشر الثلاثاء، ١١ يوليو ٢٠٢٣
وصدقني طول م متقي ربنا وناوي خير ف والله ربنا هييسرلك حالك وهتفتكر كلامي ولو بعد سنين. "ومن يتقي الله يجعل له مخرجا.. ورزقه من حيث لا يحتسب" اه خلوه للاسف.... خلي دايما قدام عينك الحلال والحرام علشان ربنا يكرمك.. صدقني والله ربنا كريم و ودينا مش معقد ولا حاجه ده بيحافظ علينا.. و حتي لما ربنا يكرمكم وتتخطبوا ع خير وتكون ليك الزوجه الصالحه يارب.. تبقي بردو بالنسبالك اجنبيه.. لذلك نلتزم كمان بقواعد الخطوبه علشان ربي يرزقك بحلاله
تم النشر الثلاثاء، ١١ يوليو ٢٠٢٣
ان شاء الله فى النيه ولله التقدم ليها و صراحت والدتي بكده و اتفقت معاها على وقت معين و ساعتها نبقى نشوف هنفتح معاهم الموضوع إزاي... و على فكره اختها الصغيره بتفضل رايحه جايا علينا تقعد شوية أو تخش جوه شوية هيا بتبقى عايزة تمشيها لكن أنا بقولها تسبها تقعد بأي حجة تيجي فى بالي إتقاء من شري مين يعلم ممكن أنا اللي أخرج عن الكلام فهل لسا كده يعتبر خلوه؟
تم النشر الثلاثاء، ١١ يوليو ٢٠٢٣
لا انا لسه عند كلمتي الخلوه لا.. حتي لو قدام الباب. حتي لو ف طفل صغير خليه يقعد معاكم..+بدل م ميال فعلا وواثق فيها صدقني والله افضل حل الحلال.. ع الاقل هتكلمها براحتك..+ ماشي لما يكونوا عندكم ف زياده مفاجأه كأنك كنت نازل ومثلا اول م يدخلوا قول خساره انا كان نفسي اقعد بس معرفش مين مستنيني وكده.. وبجد هأكد عليك بلاش تحرجها.. دي قادره تربي كره
تم النشر الثلاثاء، ١١ يوليو ٢٠٢٣
لا هو الصراحه بنكون قاعدين قدام الباب بسبب أنا و هيا لما بنكون وسط جماعة مش بنعرف نتكلم (ده طبع عندي و عندها مش بنعرف نتكلم وسط الزحمه) فبنتطلع نقعد قدام الباب أبويا قاعد مع صديقه و شايفنا من بعيد بس هو واثق فيا إني مش هقول ولا هتكلم فى حاجه غلط فسيبنا ... هو الصراحه أنا ميال ليها من و أنا صغير لكن كان بسبب موقف من مامتها مش بعيد كان زمنا رايحين جايين على بعض بس الحمدلله إنو محصلش كده.... أنا مبقاش عارف إنهم جايين بتبقي مفاجأة و كذلك لما والدتي بتقول أنها هتروح عندهم بتكون مفاجاه بنسبلهم بس أنا مش بروح الصراحه لأني كده هتفهم غلط و ده هيتعكس عليها برضوا فمش بروح ....+ توضيح هيا بنت بنت عمتي علشان كده قولت مامتها بدل ما أقول عمتي. فهل كده تمام ولا إيه ؟
تم النشر الثلاثاء، ١١ يوليو ٢٠٢٣
دي حاجه مش وحشه طول م فيها حدود.. وف الاخر دي بنت عمتك مش حد غريب.. علشان حد يتكلم عليها بسوء.. ومش بيبقي ف الشارع ده ف البيت.. هو لا يجوز الخلوه عموما حتي لو بحدود.. بس ده هيجيب تعلق.. والتعلق هيجيب حب والحب هيودي لحته مش لذيذه.. ف لو حاسس انك ميال ليها استخير وافتح كلام حتي لو مش ف ايدك اي شئ دي بنت عمتك.. ف هيبقي ف تهاون لغايت م ربنا يفرجها عليك.. بس بلاش تحرجها.. ممكن انت تتهرب اصلا اشيك.. اللي هو لما تعرف انهم جايين روح لاصحابك مثلا.. او اعمل نفسك نايم whatever.... بس هرجع واقول الخلوه لا🤝🏻
تم النشر الثلاثاء، ١١ يوليو ٢٠٢٣
لعرض السؤال في فدني اضغط هنا