السلام عليكم
انا اتقدملى ابن عمي شهر اربعه اللى فات بس كان بينه وبيني الموضوع يعني أخد رأي ولو وافقت كان هيتكلم رسمي هو قريب اوي من بابا وكمان لو رفضت ميحسش بالاحراج منه
المهم انا رفضت طبعا عشان دراستي واني مش جاهزه لارتباط هو اتصدم لانه كان واثق اني هوافق انا وهو اتربينا مع بعض فى بيت واحد ومن واحنا صغيرين عيلتنا دايما كانوا بيقولوا انه هياخدنى والكلام ده اكيد عارفينه
لما رفضته زعل اوي فتره وكان بينزل استوريهات حزن وموت وكان بيحسسني اني ارتكبت ذنب كبير في حقه وتأنيب ضمير رهيب
عدت فتره ورجع أتقدم تاني فى شهر عشره والمره دي طلب ان والدتي تعرف بالموضوع هى كانت عارفه بأول مره انا مقدرش اخبي حاجه عنها وبالذات فى حاجه زي دي وبعد تفكير طلبت منه فتره نتعرف بيها على بعض اكتر
هو اه انا وهو اتربينا مع بعض بس حرفيا والله منعرفش غير اسامي بعض وأننا قرايب انا كنت بتكسف منه اوي اوي لدرجه لا توصف ومكنش فيه بينا كلام غير عامل ايه وازيك وخلاص
هو بيشتغل فى إيطاليا بقاله تلات سنين طلبت منه فى فتره التعارف لقيت التعامل مختلف تماما معايا بيبقي مبسوط اوي واحنا بنتكلم وكان بيحكيلي كل حاجه وانه كمان مش بيحب يزعلني ومش هكدب عليكوا حاولت أعقد الموضوع من كل النواحي عشان يبعد بس هو كان بيحل كل حاجه و موافق على كل طلباتي كمان كنت بعمل كده عشان مش مرتاحه
حاسه حاجه جوايا بتقولى لا فيه خوف كبير لما بتخيل اني اوافق مش مبسوطه هو محترم جدا وشكليا حلو هو قالى انه بيصلي برضو (انا ثانويه عامه وهو مكملش تعليمه خرج فى ابتدائي بسبب ظروف العيله وقتها فكر اني رافضه عشان كده وقالى والله انه مكنش ب ايده ولو يطول يرجع يكمل هيكمل ) بس ده مكنش سبب بالنسبالي والله
انا بصيت للشخصية وتفكيره المحدود اوي وكلامه اللى اوقات مش بفهمه والله رفضت وفضل ينزل استوريهات على طول بقي شويه انه لسه بيحبني وعنده امل وشويه يقول انه نسي وانه ندمان وهكذا بقي مكنش ينفع اقطع معاه او اعمله بلوك لأنها صله رحم و كمان قولتله احنا اخوات وانا شايفاك اخ ليا ومش قادره اشوفك غير كده
وحاليا هو أتقدم لتالت مره بس المره دي رسمي عمي اهله قالوا لأهلى انه عايزني وحاليا هو حطني قدام الأمر الواقع طبعا دلوقتي لازم بقيت العيله تعرف وعمامي وهما ماشاءالله بيحبوه اوي وموافقين كلهم عليه ومبسوطين بيه اوي
وبالنسبه لاهلى فهما بصراحه قالولى القرار ليكي مع انهم موافقين عليه برضو بس بابا قالى لو مش موافقه ملكيش دعوه بحد وهرفضه دلوقتي رأيكم اعمل ايه محتاره اوي حاسه انه ضغط عليا كده اهله بيحبوني اوي ولما أرفض اكيد هيقطعوا معايا ما انا مش اغلى منه كمان هو حاسه اني معنديش احساس عشان محاولاته وانا برضو مش حاسه بناحيته حاجه بقول ادي الموضوع فرصه يمكن لما يجي وكده ارتاح ولو محستش بارتياح افشكل ولا كده بظلمه ولا أرفض
آسفه جدا جدا على الإطالة
و عليكم السلام ، باختصار لأ انتي مش ظالماه ، بالتفصيل ، عدم الارتياح اللي انتي حاساه نحيته بسبب عدم توافق فكري ما بينكم، و ده واضح جداً من ردود أفعاله على رفضك اول مره ، هل ده معناه انه وحش ؟ ، لأ خالص ، هو مش المناسب ليمي مش اكتر ، بنت تانيه هتشوفوا انسب حد ليها ، واتتي نفس الموضوع ، فما تقدميش اي تنازلات في فترة التعارف بالذات ، لأن كده كده بعد الحواز بيحصل تنازلات بطبيعة انكم اول مرة تعيشوا مع بعض ، فلو اتنازلتي من البداية عن انك تكوني مع شخص شبهك ، مش عتقكري تقدمي تنازلات علشان العلاقة الزوجية تكمل ، لإنك هتموني استزفتيها بالكامل في فترة الخطوبة ، فلا تظلمي نفسك و لا تظلميه معاكي ، و رفض موجع افضل من قبول نهايته دمار مستقبل ، وبالتوفيق 😊
تم النشر الأربعاء، ٢٥ مارس ٢٠٢٦
وعليكم السلام ورحمه الله وبركاته بصي يابنت الناس صلي استخارة الأول والراحة النفسية هي الأساس في الجواز والدين مقالش إنك تجبري نفسك على حد لمجرد إنه طيب أو قريبه لأن الأرواح جنود مجندة ما تعارف منها ائتلف وما تناكر منها اختلف والفرق الفكري والتعليمي اللي أنتي حاساه ده اسمه عدم كفاءة ودليل إن العشرة ممكن تكون صعبة بعدين فلو قلبك مش مطمن متوافقيش تحت ضغط الذنب أو عشان صعبان عليكي لأن ده بيت وعشرة عمر مش مجرد جبر خاطر والرفض هنا حقك الشرعي طالما مفيش قبول حقيقي ومن ترك شيئا لله عوضه الله خيرا منه وأنتي مش بتظلميه لو رفضتي بالحسنى بالعكس أنتي كدة بتحميه من جوازة مفيهاش مودة من طرفك .ربنا يحفظك ويعينك
تم النشر الثلاثاء، ٢٤ مارس ٢٠٢٦
متخافيش انك تقولي لا دي حياتك انتي وكمان شغل الاستوريات والصعبنيات ده بيلعب عليكي وكمان انتي بتقولي مش عاوزه تعمل بلوك عشان صله الرحم هو اصلا انتي ملكيش انك تكلميه ولا هو يكملك ولا حتي يسألك عامله ايه ولا مش عامله هي هو مش من محارمك اصلا فا انتي لو هترفضي تمسحي رقمه وتعملي بلوك وشوفي انك فعلا مينفعشي تتكلمي معاه ولا حتي مجرد انكم بتتعرفوا علي بعض فا فوقي كده وخلي بالك عشان هو بيحاول يخليكي انه يصعب عليكي وكمان انتي من اول مره قولتي لا رجع تاني وكلم امك وبعد كده رجع تاني اتقدم رسمي وانا شايف أنه الضوابط الشرعية اصلا والاحترام أنه يدخل البيت من الباب الاول مش يجي يشوف رأيك انتي رأيك انتي بتخديه لابوكي اللي هو ولي امرك وهو والدك بيقوله هو بيحاصرك عشان يجبرك توافقي فا خلي بالك ده قرار عمر وجواز وعيال ،ربنا يوهبلك الزوج الصالح وربنا يوجهك لطريق الصح إن شاء الله
تم النشر الأربعاء، ٢٥ مارس ٢٠٢٦
وعليكم السلام ورحمة الله يا حبيبتي، أول حاجة، شكراً إنك شاركتيني قصتك بالتفصيل ده، وأنا فاهمة تماماً الضغط اللي عليكي دلوقتي.. محتارة بين قلبك والعيلة والرحم، وده طبيعي جداً في موقف زي ده. أنتِ مش غلطانة إنك محتاجة وقت تفكري، ولا إنك مش حاسة بشعور قوي ناحيته بعد. رأيي المباشر: القرار ده ليكِ أنتِ 100%، مش للعيلة ولا لأي حد. في الإسلام، الزواج لازم يكون برضا الطرفين، خاصة الست، زي ما قال الرسول ﷺ: "الْبِكْرُ تُسْتَأْذَنُ فِي نَفْسِهَا". لو مش مرتاحة ومش شايفة توافق في التفكير والشخصية (زي اللي قلتِ عليه)، متتجبريش نفسك.. ده مش ظلم له، ده حماية ليكِ وليه في المستقبل، عشان الزواج مش لعبة. إيه اللي تعمليه عملياً؟ صلي الاستخارة : خدي رأي ربنا الأول والأخير. صلي ركعتين وقولي الدعاء، وشوفي الراحة في القلب هتيجي ولا لأ. فكري في التوافق طويل الأمد : هو كويس ومحترم، بس الدراسة والتفكير والحياة اليومية مهمة. لو وافقتِ، اطلبي فترة تعارف أطول (رسمي مع العيلة)، وشوفي إحساسك لما يرجع وتتعاملوا أكتر. لو رفضتِ : قولي لأهلك بوضوح وبلطف، زي "أنا بحترمه جداً وشايفاه أخويا، بس قلبي مش مستعد دلوقتي". العيلة هتفهم مع الوقت، وصلة الرحم مش هتقطع عشان كده – ده مش شرط الزواج. باباك قال الكلام ده، اعتمدي عليه. متخافيش الندم : لو أديتِ فرصة ومش ارتاحتِ، افشكلي برضو. أحسن من زواج بدون حب أو راحة. يا قمر، أنتِ في ثانوية عامة ومستقبلك كبير قدامك، متضغطيش على نفسك. لو عايزة آراء تانية، دوري في فدني على أسئلة مشابهة عن "خطبة قريب وضغط عائلي"، هتلاقي كتير. ولو محتاجة استشارة متخصصة، روحي لصفحة الخبراء هنا: https://www.fedni.net/experts – فيه مدربين حياة ومستشارين أسرة هيساعدوكِ أكتر. أنتِ قوية وهتختاري الصح، ربنا ييسرلكِ ويختارلكِ الخير. لو عايزة تكملي، قولي! 💕
تم النشر الثلاثاء، ٢٤ مارس ٢٠٢٦
نصيحة لك يا يا جميلة بلاش قطعا جواز الاقراب ايا كانت مشاعرك اسمعي صوتك الداخلى انتي مش هو اي بيحس ركزي في مذاكرتك دي اهم حاجه دلوقت انتي لسه صغيرة حطي تحت دي ميت خط لسه الفرص والحياة قدامك اوعي تضيعي عمرك وصدقيني اهم حاجه فكري فيها انك دلوقت فترة انك حب وكدا معه أو مع غيره فترة مؤكده لو حصل جواز انتي المسئولة علي اختيار الاب يا حبيبتي احسني الاختيار والتوقيت واختري اب ولادك يشكروك عليه ( انا جعلنا بينكم موده ورحمه) مش اعجاب وحب ربنا معاك
تم النشر الأربعاء، ٢٥ مارس ٢٠٢٦
لعرض السؤال في فدني اضغط هنا