اية حل الام اللي عمرها ماقالت لبنتها كلمة حلوة
الناس كلها بتحبني وبتقول اني امورة ولبسي حلو الا امي بحسها بتغير ولما بتشوفني حلوة ونفسيتي هادية بتخلق اي حاجة تعمل بيها قلق ونكد ليا
لما كنت ففرح اخويا بعد الفرح قعدت تزعقلي ادام الناس وكسفتني وبتطلع عليا سمعة ان عندي جفاء رغم ان الجفاء جي منها هي
حبيبة قلبي مفيش أم بتغير من بنتها أو أنا فعلا مكنتش مكانك فأنتِ أدري لكن مقدرش أقولك كلام يُسيء إلي والدتك أحياناً أمهاتنا بتبقي تعرضت لشيء في حياتها قبل ما تتجوز ممكن حد كان بيعاملها بنفس ما هي بتعاملك فَبسبب كذا ممكن تكون بقت عندها جفاء في المعامله بتطلعه علي الناس سواء قريب او بعيد عليكي او على غيرك فالبتالي دا نقص فيها بتعوضه بهجوم وكلام جارح وممكن زي ما بتقولي بتغير منك ففي ناس بتحس انها اقل من غيرها بدال ما تواجه دا تقوم تقلل من اللي قدامها او لِنَفترِض حسن النيه يمكن مامتك عاشت في بيئه قاسيه خلتها كدا فممكن شايفه ده عادي وبتكرره معاكي في ناس بتحب المشاكل وعمل خناقات كتير تتعاملي عادي عدّي الموقف المره دي بعد كده حاولي تتكلمي معاها وتقولينها نفس الكلام دا وهيا اكيد هتفهم كدا حاولي تقربي منها يمكن قلبها يِحنّ بإذن الله انتي جميله وكلام مامتك بيبقي في وقت عصبيه ربنا يهديهالك❤️
تم النشر الأحد، ١٩ أبريل ٢٠٢٦
احيانا الحب الزياده بيتحول لغيره لكن مش منك دا غيره عليكي يمكن انتي بعيده عن امك حاولي تقربي منها وافتحي معاها اي موضوع ووصلي ليها انك انتي كده لأنها هي اللي مربياكي وانك جمالك من جمالها واخلاقك من اخلاقها يعني فهميها انك عارفه ومقدره فضلها عليكي وان لولا وجودها مكنتيش انتي هتبقي موجوده.. الام مش بتكره لكن حبها بزياده بيتحول لخوف شديد حتى من عيون أقرب المقربين تصرفاتها دي كلها ممكن تكون خوف عليكي ابدأي انتي بالكلام الحلو والمدح ومهما قابلته بصد كملي وحده وحده هيتشال الحاجز اللي بينكم وهتشوفي بنفسك الحب في عنيها وتحسيه في افعالها وربنا يباركلك فيها ويحفظها ويصلح حالكم
تم النشر الأحد، ١٩ أبريل ٢٠٢٦
بصي، اللي إنتِ حاساه مش بسيط خالص، وحقك تتضايقي وتزعلي، خصوصًا إن اللي بيحصل جاي من أقرب حد ليكِ. أي بنت بتتمنى تسمع كلمة حلوة من أمها، فلما ده ما يحصلش أو العكس يحصل، طبيعي جدًا تحسي بوجع ولخبطة. بس مهم جدًا تفهمي إن ده مش معناه إن فيكِ حاجة غلط، ولا إنك أقل من اللي حواليك… بالعكس، شهادة الناس ليكِ إنك جميلة ولبسك حلو ده دليل إن فيكِ حاجة حلوة واضحة للكل. أوقات في أمهات بيبقوا قاسيين في كلامهم أو تصرفاتهم، يا إما بسبب ضغط جواهم، يا إما لأنهم اتربوا على نفس الأسلوب، فبيكرروا اللي شافوه من غير ما يحسوا. ده طبعًا مش مبرر للي بيحصل، بس بيوضح إن المشكلة مش فيكِ إنتِ. اللي بيحصل منها قدام الناس خصوصًا صعب جدًا، وبيكسف ويكسر، فحاولي على قد ما تقدري ما تدخليش في شد وجذب قدام حد، واحتفظي بهدوءك حتى لو من جواك متضايقة. لو في فرصة، اختاري وقت تكون هادية فيه واتكلمي معاها بهدوء، قولي لها إنك بتتأذي من الأسلوب ده وإنك محتاجة دعمها مش نقدها، حتى لو ما استجابتش بسرعة، مجرد إنك عبرتي عن نفسك ده مهم. وفي نفس الوقت، حاولي تبني لنفسك دايرة أمان تانية صحاب كويسين، حد من قرايبك، أي حد بيدعمك نفسيًا عشان ما يبقاش كل تأثيرك جاي من مصدر واحد. واحدة واحدة على نفسك… الصبر هنا مهم، مش بمعنى إنك تستحملي الغلط وتسكتي عليه، لكن بمعنى إنك ما تستهلكيش نفسك في كل موقف، وتختاري إيه يستاهل تردي عليه وإيه تعديه. مع الوقت هتتعلمي تتعاملي بشكل أهدى وأذكى، وهتبقي أقوى من إن أي كلام يهزك بنفس الشكل. حاولي كمان تشتغلي على ثقتك بنفسك من جواك، مش بس من رأي الناس اعملي حاجات بتحبيها، طوري نفسك، وافتكري دايمًا إن قيمتك أكبر بكتير من أي حد يحاول يقلل منك. وخلي عندك يقين إن في يوم من الأيام يا إما الأمور تهدى، يا إما إنتِ هتبقي وصلتِ لمرحلة إنك عارفة تحمي نفسك ومشاعرك كويس جدًا.”
تم النشر السبت، ١٨ أبريل ٢٠٢٦
السلام عليكم أهلا بيكى ممكن دية تكون طبيعة شخصيتها بس عمرها ما تغير منك إطلاقا ممكن هى ديه طباعها وأكيد انتى أعلم بيها مننا لأنك عايشة معاها وبتبقى صعب جدا تتغير للأسف تتعاملى معاها ازى ؟ هى فى الأول والآخر والدتك يعنى جنتك ونارك بس تحاولى بقدر الإمكان متتأثريش نفسيا تتعاملى على أساس ان ديه طباعها وشخصيتها وتتعاملى معاها دون تأثير عليكى شخصيا خلى الموقف يأثر فى وقته بس مياخدش حيز أكبر من كدا وممكن بقى فى ساعة روقان كدا وهى فرحانة وانتى رايقة وانتوا الاتنين سمنة على عسل مع بعض تقعدى معاها وتقوليلها وتفهميها احساسك ومشاعرك ديه عادى مرا واتنين وتلاته وتذكرى ان صبرتى على دا تؤجرى بل يمكن صبرك على طباعها اللى بتأذيكى وبرك ليها يكون سبب فى دخولك الجنة محدش عارف ممكن ندخل الجنة ب إية صح كدا ربنا يهون عليكى ويهديكى ويهدى والدتك ليكى
تم النشر السبت، ١٨ أبريل ٢٠٢٦
يا حبيبتي، أنا ذكية، وأنا حزينة جداً إنكِ بتمري باللي ده مع أمكِ.. ده مشكلة شائعة كتير، وغالباً بيجي من غيرة داخلية أو صعوبات نفسية عندها هي، مش عيب فيكِ أنتِ. الناس كلها شايفين جمالكِ وأدبكِ، ده دليل إنكِ أمورة فعلاً! 💕 حلول عملية خطوة بخطوة، مع الالتزام بالبر الوالدين زي ما الله أمر: افتحي حوار هادئ : اختاري وقت هي فيه مرتاحة (مش بعد فرح أو زحمة)، قوليلها كده: "يا أمي، أنا بحبكِ جداً وبحس إن فيه حاجة بينا مش تمام، عايزة أفهم إيه اللي مضايقكِ عشان أصلحه." متتهميهاش، ركزي على مشاعركِ (ده يقلل الدفاع). ردي الجفاء بالإحسان : مترديش الزعيق بزعيق، اعملي لها حاجة صغيرة يومياً زي كوباية شاي أو مساعدة في البيت، وقولي "ربنا يبارك فيكِ يا أمي". الدعاء لها بالهداية كمان قوي: "اللهم أصلح بين قلبي وقلب أمي". بني ثقتكِ بنفسكِ : متعتمديش على كلامها بس، سجلي إنجازاتكِ اليومية في دفتر (زي "النهارده الناس قالولي حلوة")، وادعي ربنا يزودكِ بالصبر والرضا. لو استمرت : لو الموضوع كبير، روحي صفحة الخبراء في فدني https://www.fedni.net/experts وابحثي عن متخصص نفسي أو عائلي لاستشارة خاصة. كمان، دوري في فدني على أسئلة زي "علاقة متوترة مع الأم" هتلاقي إجابات كتير مفيدة. أنتِ قوية وغالية، والصبر ده هيجيب خير إن شاء الله. لو عايزة تفاصيل أكتر، قوليلي! 😊
تم النشر السبت، ١٨ أبريل ٢٠٢٦
فيه حاجز بينكم، خليك أنت المبادرة وشوفي الحاجة اللي أنت عايزاها منها (كلمة حلوة أو تعامل كويس إلخ) واعمليه أنت تجاهها هتلاقيها بعد كدا بشكل تلقائي بادلتك التعامل والكلام، فأنت ارفعي من مدى تقبلك للأمور وأنت بتتعاملي مع معني إيماني عظيم وهو بر الوالدين فميفرقش معاكي حد، أنت بتتعاملي مع ربنا.
تم النشر السبت، ١٨ أبريل ٢٠٢٦
عساكِ بخير 🤍، أنا مش هقولك إجابة مثالية بس هقولك تعاملي بكل حب وبر عارفة ليه؟؟ عشان كلها شوية وماشين الدنيا قصيرة جدًا جدًا لما تزعلك متروديش حتى لو مظلومة عادي خليكِ بارة لله..ولما تعملي حاجه في البيت قولي أنا بعمل كدا لله أي حاجة في حياتك لله وبلاش تقولي أنها غيرانة عارفة ليه؟ عشان الأم ساعات بتكون مضايقة من حاجات فطلع في الاود وهما مش عارفين ليه!! معلش بجد البر صعب ولكن الأجر عظيم، عظيم جدًا والصبر وأنتِ لما تحصل مشكلة أو كلام يعصب حاولي قدر الإستطاعة تسكتي خالص مرة على مرة هتتعودي! وأدعي كتير جدًا أن ربنا يجعلها هينه لينه عليك ويفتح بينك وبينها، وهقولك حاجه والله أخوية أسمعي كتير محاضرات عن البر هتلاقي قلبك للين وتحسي الموضوع واجب عليكِ مش حاجة عادية
تم النشر الأحد، ١٩ أبريل ٢٠٢٦
لعرض السؤال في فدني اضغط هنا