حبيت زميلتي في الجامعة وكانت أول حب في حياتي وتعلّقت بيها جدًا.
توكلت على الله كلمت والدها عرفته ظروفي وجهزت فلوس الشبكة واللهم لك الحمد ظروفي المادية مش وحشة خالص، كنت بشتغل ليل نهار، وفعلاً حاولت أعمل كل اللي أقدر عليه وضحّيت بحاجات كتير جدا جدا علشان العلاقة تنجح.
خلال الفترة دي كان في ابتزاز عاطفي وضغط نفسي كبير عليّ، ورغم إنها كانت بتقولي إنها بتحبني ومش عايزة من الدنيا غيري، بعد مشكلة بسيطة حصلت في العيد قالتلي إنها مش عايزاني وأنهت كل حاجة ومكانتش أول مرة تقولي الكلام دا.
دلوقتي أنا تعبان جدًا نفسيًا، ومش قادر أتخطى
حبيتها من كل قلبي وراعيت ربنا فيها
ولسه متعلّق بيها ومش عارف أتعامل مع إحساس الوجع ده.
مقدره انها اول حب فى حياتك وإنك كنت راجل وعملت كل اللي عليك ودخلت البيت من بابه وجهزت نفسك وشقيت عشانها بس لازم تفهم إن اللي عملته ده يخليك تنام مرتاح الضمير لأنك مكنتش بتلعب بمشاعرها بالعكس أنت كنت شاري بجد والابتزاز العاطفي اللي كنت بتتعرض له ده علامة واضحة إن العلاقة دي كانت هتتعبك قدام أكتر بكتير لو كملت ومادام هي باعت بكل السهولة دي وبعد كل التضحيات دي عشان سبب بسيط يبقى هي للاسف مش مقدرة قيمتك ولا مقدرة تعبك وده وجع مؤقت هيمشي مع الوقت لما تدرك إن ربنا نجاك من حياة كانت هتبقى كلها ضغط نفسي وتوتر فاستعوض ربنا في تعبك وفلوسك وركز في شغلك ومستقبلك والوقت كفيل ينسيك ويجبر بخاطرك بحد يستاهل قلبك ونظافتك دي وبلاش تلوم نفسك على حاجة هي اللي اختارت تنهيها وابدأ صفحة جديدة مع نفسك لأنك تستاهل تتحب وتتقدر
تم النشر الخميس، ٩ أبريل ٢٠٢٦
بص يا صاحبي الوجع ده طبيعي عشان انت كنت شاري بجد وتعبت وشقيت بس لازم تفوق لنفسك وتعرف ان اللي يبيعك في اول مشكلة بسيطة يبقى مكنش يستاهلك من الاول ولا كان هيشيل معاك شيلة العمر قدام والحل دلوقتي انك تقطع اي سكة بتوصلك لصورها او كلامها وتركز في شغلك ومستقبلك والوقت كفيل يداوي بس انت استعين بالله وقول يا رب عوضني خير وهيجي لك اللي تصونك وتقدر تعبك ده وتعرف قيمتك بجد ومن غير زعل اللي يخرج من حياتك بالسهولة دي متبكيش عليه عشان هو اللي خسر قلب ابيض زيك واشغل نفسك بالرياضة او القعدة مع ناس بيحبوك وهتلاقي الدنيا بقت احسن واحدة واحدة والتعلق ده هيفك مع الايام وهتضحك على حالك ده قدام وتعرف ان ربنا كان شايلك الاحسن ....عن تجربه بس لسه مستني الاحسن 😅😊
تم النشر الأربعاء، ٨ أبريل ٢٠٢٦
أخي الكريم، أشعر بألمك جدًا، وده طبيعي تمامًا بعد حب أول صادق زي ده، خاصة لما تكون ضحيت كده وراعيت ربنا فيه. الله يعوضك خير، وغالباً اللي حصل ده اختبار أو رحمة منه سبحانه، عشان يحميك من ضغوط أكبر. التعلّق ده زي الجرح، بيحتاج وقت وعلاج صح. خطوات عملية عشان تتخطى: قطع الاتصال تمامًا : بلوكها من كل حتة (واتس، إنستا، جامعة إن لزم). متشوفش صورها أو تسأل عنها، ده بيجدد الوجع زي الملح على الجرح. اربط نفسك بربنا أكتر : زد الصلاة، اقرأ قرآن يوميًا، وادعي ربنا يشفيك ويفتح لك أبواب خير. توكل عليه زي ما عملت قبل كده، وهو أحسن عَرَفْ. ركّز على نفسك وأهدافك : شد حيلك في الدراسة والشغل، حدد هدف صغير يومي (مثل دراسة فصل أو رياضة ٣٠ دقيقة). ابدأ هواية جديدة أو طور مهارة. نام منتظم، كُل صحي، وامشي أو ارفع أثقال – الجسم الصح بيخفف الضغط النفسي. تابع تقدمك : اكتب يوميًا ٣ حاجات شاكر ربنا عليها، ولاحظ إزاي الوجع بيقل تدريجيًا (أسبوعين أول، شهر كله يتحسن). أنت قوي وقادر، وده هيخليك أحسن في المستقبل. لو عايز دعم أكتر، ابحث في فدني عن "التعامل مع الانفصال" هتلاقي إجابات كتير، أو شوف الخبراء هنا: https://www.fedni.net/experts – في متخصصين نفسيين هيساعدوك. ربنا يفرج همك يا رب. 💪❤️
تم النشر الأربعاء، ٨ أبريل ٢٠٢٦
اولًا بجد يعني فكرة إنك تقدمت دا تصرف يُوحي إنك رجُل متحمل المسؤولية، وعلى العكس الأخت...فكرة مش عايزاك وكلام صراحةً يدل أن البنت غير متحملة لـ المسؤولية أنا مش عارفه إيه المشكلة بس واضح جدًا ان الأخت غير ناضجة في قراراتها والزواج والبيت يحتاج لـ تحمل مسؤولية حضرتك محتاج تفكر في الأمر دا بجد هيخليك تنسى التفكير فيها الحب مش كل حاجة في مسؤوليات وفي إهتمامات وسبحان الله ربنا عشان أنت واضح وضحلك الطريق وأن مش دي الـ هتشيل بيت معاك والله أعلم برضو لأني معرفش المشكلة الـ حصلت ومين الخطأ فيكم، فأنا مثلًا هقولك أشغل نفسك حاليًا في بناء مستقبلك وثقل شخصيتك تقوية الشخصية فهم الحياة بلاش تشوف الحياة من جانب واحد مش معنى حب يبقى زواج لا في حاجات كتير جدًا ومهمة
تم النشر الخميس، ٩ أبريل ٢٠٢٦
بصراحه ربنا يعينم ويساعدك ويعوضك خير ان شاء الله انت شخص كويس ومحترم وزي ما وعدت فعلت بس للأسف اختيارك كان خاطئ وده مش ذنبك بس نصيب وان شاء الله اكيد ربنا شايلك الافضل والاجمل ال هيفرح قلبك ويعوضك عن اي ألم حسيت بيه واوعي تندم انك كويس وانك عملت علشان خاطر حد لا لان ده ال هيذيدك درجه وبسببه عتشوف عوض جميل ويسعدك ويفرحك بس حاول ألهي نفسك ف شغلك وقربك من ربنا ومن اهلك وان شاء الله ربنا هيعوضك بحاجه تنسيك كل ده من جمال الفرحه ال هيعطيهالك ان شاء الله
تم النشر الجمعة، ١٠ أبريل ٢٠٢٦
احمد ربنا ان انتي سيبتها وبانت علي حقيقتها
تم النشر الخميس، ٩ أبريل ٢٠٢٦
قبل اي نصيحه .. ربنا يراضيك و يجبر كسرك .. هفكرك و افكر نفسي بحاجه .. و عسى أن تحبوا شيئا وهو شر لكم .. من ضمن صدق توجهنا الى الله الصبر على ما لا تطبق ما لا نعلم و ده أمر عظيم .. مهما حسينا أننا ماسكين زمام الأمور وعارفين الصالح من الطالح .. و ايه يفسدنا و ايه يصلحنا.. إلا أن فالنهايه احنا نظرتنا للامور محدوده .. مقدرش انا أو غيري نحكم على تفاصيل علاقتكم من بوست خارج من وجع جواك بيلخص علاقه في كام سطر و مش من حقي انا أو غيري أننا نحكم على مشاعرك أو سبب انفصالكم أو مين معاه الحق و مين ملهوش حق.. لكن اللي اقدر انصحك بي أكثر من قول لعله خير .. لعل الله يحدث بعد ذلك أمرا
تم النشر الخميس، ٩ أبريل ٢٠٢٦
شكرا لتعليقات حضراتكم 🤍
تم النشر الخميس، ٩ أبريل ٢٠٢٦
انت شخص كويس انك سعيت للحلال واتقيت ربنا وإن شاء الله ربنا يجازيك خير .... مشكلتك حلها فى إنك تحاول تبص لنفسك شوية وتحب نفسك وتحترمها أكتر بس وانت مش تتخطى علشانها او انت مش قادر تستغنى عنها لا هو بس كان حد فى حياتك وماشى بروتين معين فجأة الكلام دا اختفى ف انت عندك فراغ كبير ف دايما بتحنلها ومش عارف تتخطاها بس خلى بالك انتى ربنا نجاك المهم الفراغ دا لازم تشغلة ب حاجة تانية بمجرد ما تشغل فراغك دا هتنساها تلقائيا فاهمنى
تم النشر الأربعاء، ٨ أبريل ٢٠٢٦
لعرض السؤال في فدني اضغط هنا