السلام عليكم، طيب ليه تشتري حد بايع أصلًا؟ يعني هو مش بس بايع ده كمان خانك وأنتم مخطوبين ورمى العيب عليكِ في الآخر. وصلاة استخارة إيه اللي صلاها؟ تقريبا بقالكم سنة مع بعض وجاي يفتكر يصلي استخارة دلوقتي وبيصليها بعد ما ارتبط بواحدة تانية كمان. سواء كان فيه مشاعر من ناحيته واتغيرت أو هو خاين بطبعه أو بيتحجج عشان ميكملش، كل الاحتمالات لا تنفي إن المفروض أنتِ ترميه من حساباتك، وتحمدي ربنا إنك نجيتِ وأنتِ على البر، مش ترجعي تدعي ربنا بعد ما بعد الشر عنك. *** وعلى فكرة، فيه شباب واخدين فكرة الخطوبة لعبة، زي الارتباط والصحوبية كده، يروح يخطب ويعلق البنت به ويعيش له يومين وبعد كده يخلع عادي بأي حجة ويروح يخطب واحدة تانية وهكذا. فياريت تعززي نفسك وتفتكري إنك كبنت أنتِ اللي المفروض ينشري رضاكِ وتقعدي وتتشرطي وتختاري اللي تلاقيه فعلا يستحق، مش تذلي نفسك لحد بايعك وقالها لك صراحة وبكل الطرق. فكرك لو رجع وتزوجتِه هتبقي مرتاحة؟ أشك، بنات كتير حصل معهم كده وندموا طول العمر على رجوعهم وارتباطهم بأشخاص زي دي والحب والتعلق تحول لكراهية. في النهاية الحل في إيدك وحدك، محدش مننا يقدر يجبرك على حاجة، أنتِ أدرى بمصلحتك، فياريت تختاري نفسك وتقدريها. ربنا معك.
لعرض الإجابة في فدني اضغط هنا