دلوقتي انا اتخرجت السنه اللي فاتت و الحمد لله شغال في مجالي و شغلي الحمد لله كويس و ملهوش مواعيد او اني لازم اروح الساعه كذا و الكلام ده لكن كله معتمد علي دماغي و لو في حاجه نسيتها بحكم اني مكملتش لسه ٥ شهور بتاثر جامد في الشغل و اصحاب الشغل اللي المفروض ان هم عارفين انهم معينين حديث تخرج و قالولي في من تاني شهر اني لسه بتعلم و هما ورايا و الكلام ده لكن الفتره الاخيره هم للاسف مش بيتابعوا الشغل معايا ولا بينبهوني علي الحاجات اللي بتقع مني لكن بيجوا بعد م الشغلانه ديه نفسها تبوظ يحاسبوني و يقولولي انت مقصر
و للاسف نفسيا ده ماثر عليا جدا و مخليني دايما قلقان من بكره في الشغل و لما الاجازه تيجي ببقي مش عايزها تخلص علشان عارف اني بعدها هنزل الشغل و لما اعمل حاجه كويسه مش بلاقي تشجيع بالعكس بلاقي تلاكيك علي حاجات هايفه جدا
من الاخر بقي جوايا رهبه من الشغل ممكن تكون ماثره علي حياتي و للاسف انا لسه مخدتش الخبره الكافيه اللي تخليني افكر اسيب المكان و اتنقل لمكان تاني و مش عارف اعمل
مش هنصحك تسيب مكانك دلوقتي ولكن انصحك بالورقه والقلم حاول تكتب الامور المطلوبة منك في ورقه وتخلصهم اول باول عشان متنساش حاجه وبرضه حاول تكتب الاخطاء ال وقعت فيها قبل كده عشان متقعش فيها تاني ان شاء الله حاول انك تتقبل فكرة انك تغلط في البدايه لان محدش بيتعلم بالساهل ولكن دايما شوف اغلاطك انها سلم الخبرة بتاعك وهدي نفسك شويه بلاش لا تتوتر ولا تضايق ولا تتعصب واتعلم بعض الردود الدبلوماسية ال تحرج ال قدامك بالذوق يعني مثلا ليه معملتش كذا ..... هعمله المرة الجايه ان شاء الله ازاي تقع منك النقطه دي ...هاخد بالي بعد كده ان شاء الله ليه تصرفت كذا ..معلش ياريت حضرتك تبقى تنبهني في المواقف ال زي دي ليه مخلصتش كذا...هحاول اخلصه باسرع وقت ان شاء الله و مثلا برضه انا بستفيد من خبرة حضرتك ياريت متحرمنيش من نصايحك المفيدة ياريت حضرتك تبقى تنبهني عالنقطه دي قبل ما المشكله تحصل عشان نتجنب الخساير كده يعني .ودرب نفسك انك متفكرش في كلمات اللوم والعتاب تاني بمجرد انتهاء الموقف بالتوفيق something
تم النشر الأحد، ١١ يونيو ٢٠٢٣
طبيعي جدا انك تغلط .. لانك لسه قايل انك لسه متخرج جديد، وانت محتاج للشغل ده علشان تكتسب منه خبرة .. استنى ع الاقل سنة في الشغل اللي انت فيه مهما كنت حاليا مش طايقه .. تعالى على نفسك واستحمل شوية .. لان طبيعي هتروح لمكان تاني وهتلاقي نفسك بتغلط وده طبيعي في الاول .. وخلي نفسك طويل مع مديرك .. يقولك انت مقصر قوله هحاول اشوف التقصير ده فين واعالجه .. متزعلش انك مقصر لكن ازعل بجد لو متجاوزتش ده واتعلمت منه بعد كده .. واتطور في شغلك كمان وكمان ولو فيه كورسات معينه خدها .. معلش انت لسه في البداية ف اول سنة ديه هتلاقي فيها تعب شوية ..
تم النشر السبت، ١٠ يونيو ٢٠٢٣
اوعى تسيب دة طبيعي جدا على فكره فالشغل وف شغلك انت اللى بتسعي انت اللى بتدور تعرف هل انا كدة ماشي صح ولا لا اكمل ولا ايه واعمل ايه.... بص هما هيسيبوك تخبط كتير وكتير دة بيبقي مقصود علشان ده اللي هيديلك الخبره في انت متاخدش الامور معاهم بحساسيه هي فترة وهتعدى لحد ما تكون فاهم شغلك كويس ربنا معاك دة اصعب وقت لكن كمل متسبش هما بيختبروك وبينشفوا عضمك بيشوفوا هتنفع معاهم ولا لا ولو رحت اى مكان تاني هتلاقي كدة بردوا ... عموما جو التشجيع فالشغل دة مش موجود أساساً يعني
تم النشر الأحد، ١١ يونيو ٢٠٢٣
انت م جاوب علي سؤالك بنفسك انك لسه محتاج خبرة علشان تنقل من مكان تاني خلي ده الهدف اللي قدامك انك تحصل خبرة تفيدك و اي حاجة تانية اعتبرها مشتتات سواء كانت ذم و لكن ب احترام طبعا او مدح متبصش ل حاجة فيهم و لا تستنها لكن ركز انك تحمد ربنا انه اداك فرصة مش كتير بيلاقوها اول م يتخرجوا و دي في حد ذاتها نعمة محتاج تبصلها و تستاهل الحمد بدل م بتبص علي اللي يحبطك بس. طول م انت ركز في شغلك في مجال معين مش بتحتاج حاجة معاه غير الدعاء بالثبات و الزيادة و شوية مجهود منك و الصبر لحد م توصل ل مرحلة تمكن في التخصص ده . لو اي حد مننا اول م اشتغل كان بيستني كلمة مدح او يخاف من كلمة الذم مكناش هنكمل يوم واحد ...حس بالنعمة اللي انت فيها بصعوبتها لان الدرس كله في الصعب ده اتعلم تعدي منه دلوقتي علشان تعرف تعدي منه لو جالك تاني قدام ده ب انك اصلا متلتفش له و تشغل نفسك في ازاي تزود علمك و خبرتك ( و دي بتختلف طرقها طبعا من مكان للتاني انت اكيد اعلم ب مجالك) و كمان حاول تخالط نفسك بناس خبرتها اعلي منك في المجال ده سواء جوه الشغل او برة اعتبرها شغلانة انك تدور عليهم و استفاد من خبرتهم دي حد ذاته هتنفعك و تشجعك كمان . و اكيد طبعا مش محتاج اقلك انك تصلي استخارة دي حاجة ثابتة في كل خطوة بتاخدها في حياتك علشان تفكر نفسك ان ربنا هو اللي في ايده النفع و الضرر مش حد تاني ....وربنا يوفقك طبعا و يسدد خطاك💜
تم النشر السبت، ١٠ يونيو ٢٠٢٣
لعرض السؤال في فدني اضغط هنا