كيف أحسم حيرتي وقلقي تجاه موافقتي أو رفضي لعريس تقدم لي؟

Question

لو واحد متقدم لي وقعدت معاه مرتين المره الاولى معرفتش عنه حاجه لان أخته ومامته كانوا قاعدين معانا والدي هو اللي قعدهم معانا لانه كان معاه ضيوف قاعدين في المكان اللي مفروض مامته واخته يقعدوا فيه فطلبت اقعد معاه تاني بحيث اسأله وافهمه اكتر لما قعدت وطلعت حسيت أن انا موافقه مع اني كنت خايفه من بعض النقاط أنه بيجيب مامته واخته كل مره بييجي فيها وجيه المره الاولى فاضي والمره التانيه دخلوا بفاكهه بس انا حاليا قلقانه اوي من نقطة خايفه ليكون اتكالي لأن كل حاجه بيخلي أخته ترن على والدتي بما انها قريبه منها يعني وعلى معرفه ببعض من زمان وهو المفروض يرن على والدي ويكون كلامه مع والدي وتاني حاجه لما جيه يتفق على امتى ييجوا يتفقوا على الذهب خلى اخوه الكبير هو اللي يرن والنقطه دي مقلقاني اوي لأن ليه مش هو اللي بيرن في كل مره المفروض ييجي فيها أو يتفق فيها على حاجه هو انا كنت هرفضه لانه كان هيقعد في بيت عيله بس لما وصله كده قال انا هعمل اي حاجه تطلبها (انا مش حابه بيت العيله لانه مشاكله كتير اوي وانا مش بتاع مشاكل وكمان مش حابه اربي اولادي في ارياف ) وكمان لما قولتله هدفك إيه من الزواج قالي انا مش عارف اغض بصري فكذا حد قالي اتجوز علشان تغض بصرك قولتله علشان إيه تاني قالي علشان استقر وتعينيني على طاعة ربنا علشان انا لسه بداية التزامي انا قولت الحاجات اللي انا قلقانه منها بس باجي اقول لو هو اتكالي فعلا مكانش وافق أنه يسيب بيت مامته اللي هي شقته ويوافق أنه يقعد بره، انا متقبلاه ومتقبله قعدتي معاه هو متوافق معايا نسبيا في الفكر وبيقولي أنه بيجاهد ربنا وبيمتنع عن كذا حاجه بس انا قلقانه بردوا ومش عارفه احدد قلقي ده إذا كان علشان بفكر أن حياتي هتتغير من العزوبيه للحياة الزوجيه ولا مش عارفه قلقانه من إيه ملحوظه باباه متوفي حد يطمني بالله ده عادي ولا لا معلش فكروا قبل ما تقولوا حاجه علشان انا حاسه ان انا موافقه وفي نفس الوقت رافضه فاللي يرد يرد بحكمه ويفكر من جميع النواحي

Accepted Answer

السلام عليكم ورحمه الله وبركاته. اولا انت كده عديتي مرحله القبول المبدئيه اللي هي انت متقبله الشخص قادره تقعدي تتكلمي معاه مش حاسه من ناحيته بنفور او مش حاسه انه يعني في حاجات تبقى بالنسبه لك منفره قوي من البدايه فدي كده الاشاره التمام اللي بتقول احنا نقدر ندخل في مرحله الخطوبه طيب هي مرحله الخطوبه ده فيها ايه دي بقى الحاجه اللي ضروري جدا ان انت تكوني عارفاها والشخص اللي قدامك يكون عارفها إن المرحله دي احنا هنكون بنتاكد إن احنا مناسبين لبعض المرحله دي مش معناها ان احنا خلاص كده وما فيش رجوع لا احنا بنتاكد في المرحله دي لانه ممكن نكتشف في المرحله دي ان في حاجات هتخلينا مش قادرين نتعايش مع بعض في الجواز فساعتها هنقول ستوب ولا مش هينفع والافضل ان كل واحد يشوف حد ثاني مناسب ليه، الموضوع ده مهم جدا النقاط اللي انت وصفتيها وقلتي انه هل ممكن الحاجات دي تبين ان هو اتكالي احنا ما نقدرش نحكم من موقفين خالص لانه وارد يكون لها ترجمه اخرى يا ريت يكون الولد بيحب يكبر اهله ودي مش حاجه عيب ابدا بالعكس دي نقطه تحسب له ان هو حابب ان هو دائما يكبر اخوه الكبير وخصوصا لان والده متوفي فوالده متوفي وانتي لسه ما تعرفيش العيله وهم بيتعاملوا مع بعض ازاي همم ممكن يكون من وقت وفاه والده يكون اخوه الكبير هو اللي متولي الامور الشبيهه بدي او هو اللي يعتبر كبير البيت فاحتراما له وتقديرا له لازم يقدمه ولازم يكبروا في المواقف اللي زي دي ويقول له انت اللي تتكلم مع والدها مش انا لان هو بيعتبروه مثلا الاخ الكبير في مقام الاب اللي توفى النقط دي مش هنقدر ان احنا نقول عليها ان هو اتكالي او ان هو ما يقدرش يعني يتحرك من غير اهله ان هو يكبر اهله في ال الحاجات الرسميه دي دي حاجه كويسه جدا مش حاجه وحشه خلينا نشوف ايه الحاجات اللي ممكن تقول كده هل وانتم قاعدين بتتكلموا كلكم والعيله مجتمعه في في اول مره، هل هو كان ساكت خالص وهما اللي بيبادروا بالكلام وهما اللي بيقولوا وبيتناقشوا وهو ما كانش بيعبر عن نفسه خالص ما بيتكلمش عن نفسه هنا ممكن نبدأ نقول اه طيب احنا محتاجين نستكشف النقطه دي شويه والاستكشاف افضل حاجه يكون بالسؤال المباشر عادي جدا اللي هو لما بيكون فيه حاجه تخصك انت عاوز تعملها ايه اول حاجه بتعملها بتروح تاخد راي اخوك ولا بتاخد راي مامتك ولا انت بتكون رأي لوحدك وبعدين تروح تبلغهم إنه انت قررت تعمل إيه لو حبيتي تحسبي النقطه دي من قبل ما يعني تدخلوا في خطوبه او حاجه اطلبي انك على الاقل تكلميه مكالمه تليفون ويكون والدك قاعد جنبك او والدتك قاعده جنبك وتقدري تستفسري عن الحاجات دي او تتكلمي في النقط المهمه بالنسبه لك.

Answer

عايزه اقول لك خطوه الجواز مش سهل انك تختاري الانسان المناسب اللي هتفتحي مع بيت وتبني حياتك معاه ويبقى زوج مخلص ليكي راعي ربنا فيك واب حنين ومثالي لاولادك ده برده حاجه مش سهله ما تستعجليش لان انت اللي قلتيه دوت فعلا يخلي الواحد يبقى قلقان ويفكر اكتر من مره. انا كل اللي قلتيه مهمنيش اكتر من الا لما بيقولك اغض بصري يعني ايه رد بصره هل هو معنى كده ان هو بدايه التزامه يعني ايه اللي هو اخلاقه مش كويسه هل هو بيعمل علاقات مع البنات احنا مش هنحاسبه على اللي فات يعني حتى لو كده احنا مش بنحاسبه على ماضيه لكن المهم انه يبدا معاكي صفحه جديده على نظافه بس انا محتاجه منك انك تفكري اكثر من مره فكري بعقلك قبل قلبك مهما كان الوقت بيعدي مهما كان انت بتكبري الاستعجال بيؤدي الى الندم لكن ان انت تتقلي وتتقني في اختياراتك وتفكري صح اقعدي معاه مره واثنين وثلاثه وعشره قبل ما تلبسي دبل او يقرا خطوبه.

Answer

أختي العزيزة، إن مشاعر القلق والتردد التي تشعرين بها هي مشاعر طبيعية تصاحب قرارًا مهمًا مثل الزواج. من المهم أن تتأملي في جوانب العلاقة بشكل شامل قبل اتخاذ القرار النهائي. إليك بعض النقاط التي يمكن أن تساعدك في توضيح مشاعرك: التواصل : يبدو أنك تشعرين بعدم التوازن في نسبة الاعتماد الكلي بينكما، خصوصاً عندما يتعلق الأمر بالتواصل مع أهلك. من المهم أن يتواصل الزوج مع أهله ومع عائلتك بنفسه ليظهر استعداده لتحمل المسؤولية. استقلالية العلاقة : إذا كان الاقتراب من عائلتك يتطلب وجود أفراد آخرين في كل مرة تقابلونه فيها، قد يكون من الأفضل أن تناقشي معه شعورك من حيث الحاجة للاستقلالية وضرورة وجود حديث مباشر بينكما دون وجود أفراد آخرين. الأهداف والقيم : عزيزتي، من المهم أن تكون أهدافكما المشتركة في الحياة الزوجية متوافقة. يمكن أن يكون تعاونه معك في طاعة الله جانباً إيجابياً، ولكن يجب أن تتأكدي من أن لديك رؤية مشتركة لمستقبل حياتكما، بما في ذلك المكان الذي ستعيشون فيه وتربية الأطفال. الأشخاص المحيطين : قد يخلق العيش في بيت العيلة بعض التحديات والمشاكل، لذا من الجيد أن تضعي في اعتبارك كيف ستؤثر هذه البيئة على حياتك وسعادتك. استمعي لصوت قلبك : في النهاية، ينبغي أن تشعري بالراحة والاطمئنان نحو قرارك. إذا كان هناك شيء يجعلك غير مرتاحة، فمن المهم أن تأخذي ذلك بعين الاعتبار ولا تتجاهليه. أختي، خذي وقتك في التفكير ولا تتسرعي. تواصلي مع من تثقين به واطلبي النصيحة منهم. الأهم هو أن تكوني سعيدة ومطمئنة في قرارك. وفقك الله لكل خير.

كيف أحسم حيرتي وقلقي تجاه موافقتي أو رفضي لعريس تقدم لي؟

اجتماعية

زواج

سؤال من احد أعضاء فدني

تم النشر الجمعة، ٢ مايو ٢٠٢٥

3 إجابة

6 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك