بصي انا طالبة مش معيدة بس هحاول اقولك حاجات لاحظتها في المعيدين اللي بيدوني و بتمنى تتصلح او نقاط قوة يعني بتخلي الشخص ده شرحه كويس اول حاجة اتعلمي communication skills و خدي بالك وانتي بتشرحي متقوليش آآآآآآه بين كل جملة و جملة لان ده بيخلي الطلبة تسرح و متركزش و يملو لما تحسي انك هتعملي كده اسكتي .. اسكتي بين كل جملة و جملة ثانيتين عشان يبقي كلامك له وقعه و تركيزه ... اسمعي conor Neil's و شوفي طريقة كلامه عاملة ازاي و قناته تحفة اسمعيها ... لو حسيتي ان الطلبة بدات تتكلم مع بعضها اسكتي ... هتلاقيهم سكتوا لأنهم شافو انك خدتي بالك .. اسكتي كده و بصي عليهم نظرة صارمة بس ... ابدأي شرحك بسؤال او معلومة مدهشة او مشكلة من حياة الطلبة تخليهم يكملوا سماع الشرح للآخر يخليهم يحسو ان الكلام ده interesting و مهم و هيساعدهم بشكلٍ ما ... وانتي بتشرحي اذكري مواقف من الحياة او قصص تشبيهية او مواقف كوميدية تذكرهم بالحاجة دي طول عمرهم ... خليكي مرحة و متكسريش حدودك عشان في طلبة قليلة ادب ... خلي شرحك باسهل و اسرع طريقة ممكنة بحيث تجيبي الزتونة في أسرع وقت ممكن و شيلي الحشو الزيادة اللي ملوش لازمة ... اشركي الطلبة معاكي في الحوار اساليهم وانتي بتشرحي اسألي كل واحد فيهم عن رأيه في الحاجة دي (في الشرح) و بعديها كملي شرح و قولي و زي ما قال فلان ... و تذكري كلامه او اجابته الصحيحة للسؤال .. ده هيخليه يحس إن كلامه مهم و هيخليه يركز معاكي طول الوقت هو و باقي زمايله لأنهم هيحسو ان كلامهم مهم و اي واحد فيهم هيبقي جزء من الحوار في اي وقت فبالتالي هما هيبقو active معاكي. وخلي وقت كبير اخر الشرح للأسئلة و الحاجات اللي مش فاهمينها لو لقيتيهم فصلو معاكي في نص الشرح أدي بريك خمس دقايق و كملي... اسمعي مشاكلهم و متتكبريش عليهم حسسيهم انك قريبة منهم و فاهمة معاناتهم ال show Empathy ده بياثر جدا ف النفسية و يخليهم يحسو ان كلامك مهم .. صوتك عالي وانت بتشرحي وواضح عشان ميناموش بس مش زعيق ... و تغيري بين الضمائر وانتي بتتكلمي دي من أساليب التنبيه في البلاغة 😅 اللي تخلي الشخص يرجع للكلام .. زي مثلا بتغيري الضمير من الغائب للمتكلم زي قوله تعالي {أَلَمْ أَعْهَدْ إِلَيْكُمْ يَا بَنِي آدَمَ أَنْ لَا تَعْبُدُوا الشَّيْطَانَ ۖ إِنَّهُ لَكُمْ عَدُوٌّ مُّبِينٌ وَأَنِ اعْبُدُونِي ۚ هَٰذَا صِرَاطٌ مُّسْتَقِيمٌ} (يس: 60–61) قبلها كان الكلام بصيغة الغَيبة عن المجرمين وأحوالهم يوم القيامة. فجأة يحصل التحوّل المرعب إلى الخطاب المباشر: "ألم أعهد إليكم يا بني آدم… أن لا تعبدوا الشيطان" فده بيخليهم ينتبهو لكلامك لو عرفتي تطبقيه يبقى حلو لو معرفتيش عادي خالص ... و غيري بين طبقات الصوت مرة هادي و مرة عالي عشان ده بيحسسهم ان في تغيير حصل ف ينتبهو ... الف مبروك ليكي و بالتوفيق يا رب... صحيح و نسيت كب شوية اتاكدي انهم فاهمين الجزئية دي قبل ما تروحي على اللي بعدها عشان ساعات الطلبة بتتكسف تسأل و بيكملو و هما مش فاهمين و ده بيبوظ كل اللي عملتيه ... اساليهم بعد كل فقرة .. فاهمين؟ حد عنده سؤال لو في جزئية حسيتيها مش واضحة قوليها تاني في السريع قبل ما تدخلي في الخطوة الجاية عشان الناس ال introvert اللي بتتكسف تسأل 😅.. و بس ياري اكون غطيت كل حاجة
ممتنه ليكي جدا ، شكراً بجد ♥️
تم النشر السبت، ١٣ سبتمبر ٢٠٢٥
أختي العزيزة Study Account، كلامك رائع ومفيد جدًا، لامستِ نقاط أساسية في فن التدريس وطرق تواصل المعيدة مع الطالبات بطريقة فعّالة وجذابة. نصائحك حول التحكم في التواصل الصوتي، إشراك الطلاب، والاهتمام بفهمهم من الأساس كلها عوامل تساعد المعيدة الجديدة على بناء علاقة قوية مع طلابها وتحقيق نجاح كبير في أول سنة لها. جزاك الله خيرًا على هذا الدعم العملي والراقي، بارك الله لكِ ووفقكِ دائمًا! 🌷
تم النشر السبت، ١٣ سبتمبر ٢٠٢٥
لعرض الإجابة في فدني اضغط هنا