كيف تتصرفون في موقف كهذا؟

Question

انا من تلت ايام كنت بحكي مع امي عادي بهزار فبقول لها انا في سر في حياتي عمري ما اقولو لحد فضربت في دماغها اني اقولها السر قعدت اقولها مينفعش دا يتقال فاستخدمت اسلوب غريب ممكن أسميه باسم (سلاح الامهات) وهو إنها حسستني بالذنب وقعدت تقولي لو مقولتش مش هرضى عنك لو مقولتش انا غضبانة عليك ومش مسامحاك وهكذا حسستني اني عامل جريمة فقلت ليها مينفعش يا امي تجبريني عن حاجة بطريقتك دي ومقولتش السر . (انا لو قلت السر حياتي هتبوظ وفكرت اني أؤلف حاجة واقولها عشان اعدي الموقف بس قلت بلاش يعني كدب وكمان اكون بستلوح على امي

Accepted Answer

لو انت مش حابب تحكي حاول تضحك وتهزر معاها وانك كنت بتشوف رد فعلها -او احكيلها علي حاجة حصلت بحيث تنسيها موضوع السر دا - بس نصيحة دي امك مش حد من صحابك يعني لو السر دا خطر عليك ان حد يعرفه هي اللي هتخبيه معاك وهتساعدك وعمرها ما هتقول لحد - وسبب انها مصممة تعرف دا خوف عليك لتكون حاجة اكبر منك وتاذيك - وفي العموم صاحب والدتك واحكيلها علي اللي مضايقك واللي مفرحك لانك هتلاقيها اكبر داعم ليك في حياتك

Answer

متقولهاش عادي انت مش مجبر تقولها حتى لو قالتلك مش هرضى عنك مش هتاخد ذنب لان دي حاجة خاصة بيك بس لو انت مش عاوز تزعلها ومش عاوز برضو تكذب ممكن تفهمها بالراحة انك مينفعش تقولها او تقولها اي سر تاني ميكونش بحجم السر دا بحيث متبقاش كذبت عليها

Answer

السلام عليكم ورحمه الله وبركاته. طيب يعني اللي عنده سر ليه بيقول ان هو عنده سر ما هو دي بدايه البوح بالسر ده معناه مبدئيا انه انت مش مستحمل ان يكون عندك السر او انك حابب تقول انا بقيت شخص مستقل وبقى عندي اسرار وبقى عندي حاجات تخصني وما حدش هيعرفها مفيش مشكله ان يكون تطورك من نفسي وتطور الشخصيه بتبين فيه انك بقيت شخص مستقل لكن بلاش الطريقه دي بتكون بالشكل المباشر ده وخصوصا مع الاهل لان دي بتصب معاهم في حته انه خلاص احنا ما بقيناش محتاجينكم الحاجات دي بتتداخل مع بعضيها وبتعمل ازمات ما بين الولاد واهلهم فاحنا مش محتاجين نروح لاتجاه ده خالص يعني خليك بشخصيتك وليك الحاجات الخصوصيه بتاعتك ليك اسرارك اللي مش هتحبي تتكلم فيها مع حد ولكن ده مش معناه ان انا اصرح واقول خلاص بقى انا بقى في حاجات عندي انتم مش هتعرفوا عنها حاجه لان ده شيء الامهات وبيلاقي الاهل عموما سواء اب او ام انه طيب اذا كان ابني قدري يخبي عليا انا كده اا مش مطمنه ايه هل اللي ممكن هو مخبيه ده حاجه تكون هتضره وهو مش عارف ولا لا لان ده طبعا. وفرق الخبره بيقول انه الولاد ممكن يكونوا هم دلوقتي شايفين اللي هم بيعملوه عادي او شايفين اللي هم مخبينه عادي في حين ان دي حاجه ممكن تكون هتؤدي بيهم لشيء خطر او شيء هيضرهم ليه نحطهم في موضع حيره وطبيعي جدا الام تحاول بكل الطرق ان هي تضغط عليك علشان تخليك تقول الحاجه اللي انت قلت انها سر. علشان تحس انها مطمنه فمن فضلك اولا يعني ما تستخدمش الطريقه دي تاني مع الام متحسسها بالعمود ااا علشان ااا يعني تكون محسن اليها زي ما ربنا طلب مننا ثانيا والله ممكن تقول لها اي حاجه تانيه تكون فعلا يعني معلومه هي ما تعرفهاش اصلا يعني حاجه هي متعرفهاش حد من صحابك انت زعلت منه عشان حاجه هي ما تعرفهاش ااا موقف حصل معاك اا وانت ما حبيتهوش يكون متعرفوش اكيد يعني في مواقف او تفاصيل حاجات صغيره هي ما تعرفهاش وهيبقى عادي ان انت تحكيها مش بنفس عظم اللي انت شايفه سر كبير انت مش عايز حد يعرفه عشان تطمنها ويا ريت تقول لها لا طبعا انا ما بقدرش اخبي عنك حاجه ااا وانا دايما بلجا لك وانا دايما ااا باجي عشان خاطر احكي لك ما تقلقيش عليا يا ريت تطمني والدتك.

كيف تتصرفون في موقف كهذا؟

تربوية

اجتماعية

أهل

سؤال من محمد احمد

تم النشر السبت، ٣١ يناير ٢٠٢٦

4 إجابة

5 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك