هل أُكمل الخطوبة رغم أنني أعرف أنّه الشخص الخطأ بالنسبة لي؟

Question

انا مش عارفه اعمل ايه انا تايهه مافيش علاقة بتكمل ليا ومبقتش عارفه العيب فيا ولا فيهم ؟ انا مخطوبة من فترة قصيرة بالظبط 26/4/2025 لمهندس مدنى ، ف الفترة دى لاحظت تصرفات كتير محبتهاش ومش عارفه استقبلها ودائما بتخانق معاه بسبب أنه عكسي والبيئة مختلفه والثقافات مختلفة بالرغم من أنه مهندس بس الثقافه والوعى والتحضر مالهوش علاقة بالدرجه العلمية ، يعنى مثلا اول منقعد سوا يمسك الفون ويفضل قاعد ع الفون ولا كأنى موجوده مش بيحاول يتعرف عليا يعرف شخصيتي يعرف انا بحب ايه ومبحبش ايه كذا مرة الفت نظره أنه مينفعش يمسك الفون واحنا قاعدين مع بعض حتى وأهلنا قاعدين معانا أو مثلا يكون بابا بيتكلم معاه بيكون ماسك الفون وهو بابا بيكلمه وصوته عالي اوى طريقه كلامه وحشه وكله إيحاءات جنsية وبجد بقيت حاسه انى بقرف منه حتى لما خرجنا ف كافيه برضو كان قاعد ع الفون لفت نظره اكتر من مره واتخانقت كتير خناقات كبيره ومافيش فايده ويقول أن دى حاله مرضية ومش عارف ابطل ... لدرجة انى بقيت امسك الفون اول ميمسك فونه وحرفيا معندوش ذوق نهائي وكل اللى فالح ف أنه يعاكسنى ويفضل يقول كلام حلو فهمته كتير انى ف كلام تانى ممكن نتكلم ف غير المعاكسه والكلام الحلو

Accepted Answer

السلام عليكم، حبيبتي مشكلتك واضحة والحل واضح جدًا. هو سؤال واحد بس اسأليه لنفسك وردي عليه بصراحة... ده شخص ترضيه زوج لكِ وأب لأولادك؟ يعني أنتِ أصلا غير راضية عن الاختلافات والفوارق الاجتماعية والثقافية ما بينكم وعدم التكافؤ ده سبب كاف إنك تنهي الخطبة، ما بالك بالعيوب اللي ذكرتِها؟ هل إن مفيش علاقة لك بتكمل مبرر كافي إنك تكملي مع شخص أنتِ أصلا بتقرفي منه بالدرجة اللي ظاهرة من كلامك؟ أنتِ لسه على البر... مفيش أي مبرر أو سبب يخليكِ تكملي ولا ذنب عليكِ، بالعكس هتكوني بتظلمي نفسك ظلم كبير لو تزوجتِ منه وهتكرهي نفسك وقتها أكتر ما بتكرهيه هو دلوقتي. فكري كويس، عززي نفسك وفكري في مصلحتها واختاري كويس قوي وعلى مهلك، أنتِ مش داخلة سباق، المهم تختاري صح الشخص اللي يصلح فعلًا يكون زوج وأب لأبنائك إن شاء الله. صلي استخارة وتوكلي على الله وربنا يكتب لك الخير ويرضيك به.

Answer

السلام عليكم ورحمه الله وبركاته بنبص دائما. اثناء الخطوبه على ميزان كده ما بين المميزات اللي قادرين نلمسها وقد ايه المميزات دي شايفين ان هي هتخلينا نقدر نعيش حياه فيها سكينه ولا لا؟ والعيوب اللي احنا هنبقى بنتعامل معاها وقد ايه هنقدر نتعامل معاها ولا هتكون صعبه علينا وهتستهلك من قدراتنا كتير. دايما بقى باصينا على الميزان ده لحد ما نشوف انهي كفة فيهم اللي اتقل لما بتكون كفه المميزات اثقل تمام خلاص يبقى الموضوع ممكن يكمل لكن كفة العيوب والحاجات اللي بتصيبنا بالاشمئزاز والحاجات اللي بتبقى ثقيله على قلبنا كلها هي اللي عماله بتزيد لا خلاص يبقى الموضوع كده بدأ يتحسم انه الشخص ده غير مناسب لينا حتى لو على الناحيه التانيه فيه مميزات ما هو حتى لو على الناحيه التاني في مميزات بس في ناحيه السلبيات والحاجات اللي صعب ان احنا نتعامل معاها هي الاثقل فالمميزات هنا مش هتفيدنا بشيء خالص يعني ما ينفعش اقول هو فيه وفيه وفيه وانا لا اتقبله و بقرف منه بس اصل هو مهندس يعني احنا هنا كده بنقول ايه فكري كويس قوي في الميزان ده وببصي عليه وقرري قرار وربنا يوفقك.

Answer

مرحباً عزيزتي، أشعر تمامًا بالتشتت والقلق اللي بتمري بيه، وأحب أقول لكِ أنكِ موش لوحدك، كثير من البنات يمرّوا بنفس النوع من الصراعات في بداية الخطوبة، خصوصًا لما بيكون في اختلافات واضحة في الطباع أو الأسلوب. خليني أساعدك أرتب أفكارك وأعطيك بعض النقاط المهمة لتفكري فيها: الفرق بين الخطأ والصحيح: لو أنتِ فعلاً حاسة إن الشخص ده مش مناسب لكِ، سواء بسبب سلوكياته، طريقة تعامله، أو عدم التفاهم، فلا خير في استمرار علاقة مليانة مشاكل من البداية. الزواج هو شراكة حياة، ويجب أن يبدأ على أساس احترام واهتمام حقيقي، لو مش موجود، بيكون صعب يبني حياة سعيدة. الاحترام والتقدير: عدم احترام الطرف الآخر وغياب الاهتمام هو أمر مُزعج ومؤلم، وخصوصًا لما تحسي إنه مش بيقدر مشاعرك ولا يحترم وجودك. تصرفاته — زي استخدام الموبايل وعدم التركيز في الحديث معك أو مع أهلِك، أو التصرفات اللي بتضايقك وتخليكِ تحسي بعدم الراحة — كلها علامات مهمة لازم تنتبهي لها. محاولة الفهم والحوار: لو هو قال إن عنده "حالة مرضية" تتعلق باستعماله للموبايل، هل حاولتِ تستخدمي أسلوب لطيف وواضح تعبري له عن مشاعرك وأثر تصرفاته عليكي؟ التواصل الصريح والمفتوح يمكن يحسّن الأمور، ولكن لو استمر الوضع بدون تغيير، ده مؤشر إن المشكلة أعمق. التضحية والتغيير: لا تستمري في علاقة تتسبب لكِ في ضيق نفسي مستمر، ولا تحاولي تغيري من نفسك أو تتحملي أشياء تخلي حياتك كئيبة. اطلبي من نفسك تقييم الأمان النفسي والراحة اللي بتحسي بيها في العلاقة. الإسلام والنصيحة الروحية: خطوبتكِ مرحلة للتعرف والارتباط، وليس للتنازل عن كرامتك أو سلامتك النفسية. حاولي تدعي الله يهديكِ ويسهل لكِ الأمور، والله مع الصابرين. لا تترددي في إنهاء الخطوبة إذا وجدتِ أن العلاقة لا تفيدك ولا تستحق الاستمرار. في النهاية، القرار يستحق أن تُفكّري فيه بعمق، ولا تخافي من اتخاذ خطوة تصون كرامتك وسعادتك. إذا شعرتِ أن الموضوع معقد، أو أن مشاعركِ متداخلة، يمكن أن تستفيدي كثيرًا من التحدث مع أحد الخبراء النفسيين في فدني الذين يمكنهم مساعدتكِ بشكل شخصي ويقدموا لكِ استشارة أعمق: https://www.fedni.net/experts وأيضًا لا تنسي أن تبحثي في فدني عن تجارب وأسئلة مماثلة، قد تجدين فيها دعم وعون نفسي مفيد. أنا هنا معكِ لأي أسئلة إضافية، ولا تترددي في الكتابة لي دائمًا. ذكية 💛

هل أُكمل الخطوبة رغم أنني أعرف أنّه الشخص الخطأ بالنسبة لي؟

اجتماعية

علاقات

زواج

سؤال من احد أعضاء فدني

تم النشر الأربعاء، ٢٨ مايو ٢٠٢٥

3 إجابة

10 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك