السلام عليكم، أولا ربنا يوفقك في دراستك وألف سلامة عليكِ. بالنسبة للصداع فهو أسبابه كتير وممكن لو مش من العين أو الجيوب الأنفية يكون من التوتر والضغط المستمر بسبب المذاكرة، ممكن كمان الإرهاق أو طريقة جلوسك للمذاكرة تكون غلط ومأثرة على فقرات العنق وعاملة لك إجهاد عضلي وبالتالي يسبب الأعراض دي. *** عارفة صعب أقول لك خففي ضغط وتوتر بس حاولي، برمجة أفكارك وعقلك هي الحل، إنك تعاملي الثانوية العامة بحقيقتها ولا تعطيها أكبر من حجمها وتحوليها كابوس مرعب بالنسبة لك. انسي خالص التوقعات والمخاوف عشان هي مش نهاية العالم ولا اللي هتحدد مصيرك ونجاحك النجاح تقدري تصنعيه في أي مكان أو كلية تكوني فيها فاشغلي نفسك دلوقتي باللي مطلوب منك وهو إنك تذاكري. ركزي مع الرحلة والطريق وأجلي تفكير حاليا في خط النهاية. لو هديتِ صدقيني هتعرفي تظبطي مذاكرتك وتنجزي من غير قلق وتسرع أو مذاكرة ساعات طويلى مرهقة *** كمان حاجة، اطمني إذا مش عندك أنيميا أو نقص فيتامين د لأنهم عوامل مؤثرة جدا ووجودهم بيسبب إرهاق وصداع وخمول وممكن كمان يعمل نوبات اكتئاب. الرياضة ولو عشر دقائق في اليوم أو في فواصل المذاكرة هتفرق معك.. هتزود نشاطك وتحرك الدورة الدموية وتقلل التوتر وكمان هتقلل الشد العضلي والإرهاق اللي بيحصل مع الجلوس للمذاكرة. ** ما دام كنت بتنجزي وأنت مشغلة قرآن فارحعي للطريقة دي. حاجة كمان فرقت معي عن تجربة، وهي إنك تفصلي بين جلسات المذاكرة بخمس دقائق قراءة قرآن... زاحمي المذاكرة بالقرآن عشان ربنا يبارك فيها. وربنا يوفقك دايما.
لعرض الإجابة في فدني اضغط هنا