إجابة علي السؤال: كيف يتجاوز الإنسان الشعور بالتقصير والحزن عند ضياع حلم الطفولة؟

السلام عليكم، بصي يا جميل، أنتِ مشكلتك على فكرة بسيطة بس بسبب أفكارك مش قادرة تشوفي الطريق بوضوح وحاسة الدنيا معقدة وحكمتِ على نفسك بالفشل. والأفكار اللي اتزرعت جواك من صغرك سبب رئيسي لمشكلتك، والوضع الأسري عمل لك عقدة مثالية وبحث عن الكمال وميزان خاطئ عن النجاح ومفهومه. ** للأسف مجتمعنا بيحصر النجاح والفشل في درجات الامتحانات، ومفيش تفهم خالص للفروقات الفردية والاهتمامات. فيه طلاب عندهم ملكة الحفظ عالية وطلاب تانين مش بيقدروا يحفظوا لكن بيفهموا أفضل، فيه طلاب بيميلوا للمواد الأدبية ومش بيقدروا يذاكروا المواد العلمية، مش معناها خالص إن دول أغبياء ودول أذكياء، معناه إن ربنا خلقنا بقدرات وميول مختلفة عشان منبقاش نسخ من بعض ونتبادل النفع، فيه ناس ذكاءها العاطفي والاجتماعي عالي وناس تانية لأ. فأنتِ مش مطلوب منك خالص تكوني نسخة من أهلك ولا مطلوب تسيري في نفس طريقهم وتحققي نجاحك بنفس طريق نجاحهم هم.. لأنك ببساطة مش هم. *** فكرة الكلية المعينة، دي اتزرعت فيكِ من صغرك... من كلام مامتك، ممكن أصلا هندسة نفسها مش هي الأفضل لك لكن بسبب تفكيرك المستمر من صغرك وكلام والدتك ترسب في عقلك إنها كليتك أحلامك واللي لو مش دخلتِها هتبقي فشلتِ. *** وأنا صغيرة كنت بقول هدخل صيدلة، بس عشان كل اللي حولي في العيلة كانوا بيقولوا لي كده، أنا كطفلة مكنتش أعرف إيه صيدلة لكن ترسب جواي ده لحد ما كبرت شوية. رغم إن ميولي كانت أكتر مايلة للكليات الأدبية والفنون الجميلة... وفي النهاية درست طب كمان مش صيدلة عشان العيلة. وبعد سنين رجعت أدرس وأشتغل في الحاجات اللي بحبها خارج نطاق الطب. فأنتِ دوري على ميولك التانية خارج الهندسة وصدقيني ممكن تلاقي حاجات أفضل وتحققي نجاح أكبر فيها بإذن الله وتصنعي اسم لنفسك. *** الثانوية مش هي نهاية المصير ولا خلاص ما دام مدخلتيش كلية أحلامك فكده فشلتِ. الثانوية بس بتشق لك طريق في اتجاه مكتوب تسيري فيه والاتجاه ده فيه الخير الأكبر لكِ *** بالنسبة للدعاء والأفكار الإلحادية. أنتِ بس في صدمة ومش فاهمة أو مش قادرة تتفهمي الدعاء واستجابته وحكمة ربنا اللي أعلم مننا وشايف مستقبلنا وشايف الصورة الكاملة الغايبة عننا. مين قال ربنا لم يستجب دعاءك؟ على فكرة استجابة الدعاء مش شرط خالص تكون بتحقيق الحاجة اللي عاوزينها لأن ممكن ندعي بحاجة وتكون شر لينا. فاستجابة الدعاء زي ما الرسول علمنا على ٣ صور: تعجيل الإجابة ... وهي إن ربنا يعطيك ما طلبته. صرف السوء.. . ربنا بيصرف عنك السوء أو الابتلاء أو المرض بمثل دعوتك (هنا ممكن الحاجة اللي عاوزاها كان فيها شر لك وربنا بيصرفه أو ممكن يصرف شر أكبر زي مرض أو غيره) التأجيل والإدخار .. وهنا ربنا بيدخر دعوتك للآخرة وبيبدلها أجر عظيم إن شاء الله.. (وأعتقد وقتها هنكون في أحوج حاجة لأي دعوة مدخرة تساعدنا في حساب الآخرة) فدي صور استجابة الدعاء، بس احنا اقتصرنا الاستجابة في إن ربنا يعطينا اللي طلبناه ولو تأخر يبقى كده مستجبش ومش بيحبنا أو بيكرهنا أو نبدأ نشكك فيه. ** أنتِ عملتِ اللي عليكِ واجتهدتِ ودعيتِ... يبقى خلاص تيقني إن ربنا استجاب دعوتك وبلاش تسلمي لوساوس الشيطان. ربنا مش بيضيع مجهود وسعي حد وأكيد كاتب لك خير في الطريق اللي اختاره لك... ** ناس كتير حصل معها نفس اللي حصل معك واكتشفوا بعد كده إن ربنا فعلًا وجههم لطريق نجاحهم ولخير كبير جدا مكنوش هيوصلوا له بالطريق اللي اجتهدوا ودعوا ربنا عشانه. ** فاهدي كده وامنحي نفسك الفرصة تهدى وتتجاوز الصدمة وارجعي فكري بهدوء. ومفيش حاجة خالص في الدنيا تستحق تخسري ربنا وإيمانك عشانها. ربنا يقويك وتتجاوزي المرحلة دي على خير وتكوني بأفضل حال. بالتوفيق.💚💚