انا طالبه في تالته ثانوي عام من اول السنه كان عندي مشاكل مع المذاكره بس انا كنت بعمل اللي بقدر عليه مكنتش بخلص كل المطلوب بس كنت راضيه عن نفسي لحد من ٣ اسابيع ماما مسكت الكتب و لاقتني مش حاله كل الواجبات و في حاجات كتير ناقصه
اتخانقنا مع بعض و وقتها انا دخلت اوضتي و بعتلها رساله اني عندي اعراض ADHD (فرط حركه و تشتت ) و عندي أعراض من الطفوله فلو ينفع نراجع الموضوع مع أخصائي قالتلي انتي مكبره الموضوع و لو التزمتي هتعرفي تركزي
وقتها انا زعلت جدا لاني كشفت جزء مني و في الآخر بدون فايده و خلال ال ٣ اسابيع دول انا اتحولت من انسانه بتضحك دايما رغم كل حاجه لإنسانه بتعيط و بس و كان في شوامل و جبت في الفيزياء 50 % ماما زي اللي شالت الهم و ليه تجيبي النص و ذاكريهم وانا همتحنك فيهم
بقيت مضغوطه اوي و كل ما الاقيها بتدخل اتضغط اكتر و احنا لسه في اول السنه انا مش كويسه خالص و مش هقدر اعيش الحبة شهور الفاضلين في الضغط دا
السلام عليكم، أولا ربنا يعينك ويوفقك في دراستك وحياتك. بصي حاولي تفصلي بين المشكلة اللي حصلت مع مامتك وبين مشكلتك مع المذاكرة. أنا عارفة إن انتقادها لمذاكرتك أثر عليك زائد كلامها عن احتياجك لأخصائي نفسي، لكن حاولي تشوفي الموضوع بزاوية تانية، إنها ممكن قلقانة عليك لكن زي كتير من الأهل ميعرفوش طرق التواصل الصحيحة والإرشاد التربوي، هي استخدمت طريقة غلط لكن متخليش ده هيغير من صورتك عن نفسك أو تبدئي تضعي في تفكيرك إنك فعلا مقصرة وعندك مشكلة. كمان بلاش تركزي مع الكلام اللي بتقرأيها على النت عن فرط الحركة لأن البوستات المنتشرة عنه خلت شباب وبنات كتير يعتقدوا إن ده تشخيصهم. مش بقول لك متطلبيش مساعدة مختص، عادي اطلبي بس قصدي متحطيش في بالك إنك فعلا فيك مشكلة. وحقك تطلبي إنك تروحي لمختص عشان تطمني وافتحي الموضوع بثقة مع والدتك مرة واتنين وعشرة لحد ما تقتنع، ده حقك ووصلي لها إنها أكيد يهمها مصلحتك وصحتك النفسية وإن لما تطمئنوا دلوقتي هيكون أفضل بدل ما يكون فيه مشكلة وتزيد. المهم في نقاشك معها متنفعليش ولا تحسسيها إنها مش فاهماكِ ولا حاسة بك، أي اتهام موجه لها هيخليها تدافع عن نفسها فتنفعل عليك والمشكلة تزيد بينكم. خليك هادية وحضري الكلام اللي عاوزة تقوليه عشان توصلي لها مشكلتك بوضوح وتقنعيها. *** وكمان اتكلمي معها بصراحة إن الضغط بيجيب معك نتيجة عكسية وإنها ممكن تشجعك بطريقة مختلفة، وإن شاء الله ربنا يهديها لك ويصلح ما بينكم. *** بالنسبة للمذاكرة، برمجي نفسك إن مش معنى إنك محلتيش كل حاجة أو فيه تراكمات أو جبت درجة مش كويسة في الامتحان إنك فاشلة أو خلاص اتحكم عليك بالفشل في كل الشهور الباقية. ومش لازم تضغطي نفسك إنك تخلصي المتراكم دلوقتي، اعملي خطة مرنة وامشي بخطوات صغيرة أفضل من إنك تفضلي معقدة نفسك وواقفة مكانك بتضيعي الشهور الباقية. "ما لا يدرك جله لا يترك كله" اسعي واعملي اللي عليك وربنا يوفقك.💚💚
تم النشر الخميس، ٢٩ أكتوبر ٢٠٢٦
أنا آسفة جدًا إنك بتمري بكل الضغط ده، وإنك حاسة إنك لوحدك في المعركة دي. اللي حصل بينك وبين ماما طبيعي يخليكِ تشعري بالإحباط والحزن، خاصة لما تفتحي قلبك عن أعراض بتأثر على تركيزك من زمان وتلاقي الرد إنك "مكبرة الموضوع". ده بيوجع، وإنك تحولتِ من بنت بتضحك لشخص بتعيط كتير ده دليل على إن الضغط وصل لمرحلة صعبة. أنتِ مش ضعيفة، ومش "مش كويسة" زي ما بتقولي، أنتِ بتحاولي تعملي اللي تقدري عليه في ظروف صعبة جدًا. خلينا نفكر عمليًا في اللي ممكن يساعدك دلوقتي. أول حاجة، قسمي المذاكرة لأجزاء صغيرة جدًا عشان ما تحسيش بالإرهاق من أولها. مثلاً، لو في مادة زي الفيزياء، ابدئي بمراجعة ٥ أسئلة بس كل يوم من الشوامل اللي جبتي فيها ٥٠٪، وسجلي الإجابات في ورقة صغيرة عشان تشوفي تقدمك يوميًا. ده هيبني ثقة في نفسك تدريجيًا ويقلل الشعور بالنقص. كمان، حددي وقت ثابت يوميًا للمذاكرة، حتى لو ساعة أو اتنين في البداية، وركزي على إنك تخلصي اللي مطلوب منك مش كل حاجة مرة واحدة. لو لقيتِ صعوبة في التركيز، جربي تكتبي المهام في قائمة وتشطبيها، ده بيساعد على الشعور بالإنجاز. بالنسبة للتواصل مع ماما، حاولي تفتحي الموضوع تاني بهدوء في وقت مناسب، وقولي لها إنك مش بتطلبي إنك "تكبري الموضوع" لكن بتحاولي تفهمي نفسك عشان تقدري تتحسني. لو ما نفعش، ركزي على إنك تثبتي لنفسك إنك قادرة، وادعي ربنا ييسرلك الأمر ويشرح صدرك، لأن الثانوية العامة اختبار صعب لكن مش نهاية الدنيا. أنتِ لسه في أول السنة، وفي وقت كفاية تتحسني فيه لو خدتِ خطوات صغيرة يومية. لو عايزة تتكلمي أكتر عن طرق تنظيم الوقت أو أي حاجة تانية، أنا هنا. ولو لقيتِ أسئلة مشابهة على فدني، ممكن تشوفيها عشان تاخدي أفكار إضافية. أنتِ أقوى مما تتخيلي، وهتعدي الفترة دي إن شاء الله.
تم النشر الخميس، ٢٩ أكتوبر ٢٠٢٦
بصي لسا فاضل كتير بس متبصيش للموضوع ب ان لسا بدري بس لازم تدخلي السباق وعامةً متفكريش في اي مرض ولا اي حاجه انتي مش عندك اي مرض يعني لو بصيتي لكل الامراض النفسيه وحللتيهم هتلاقي في اكتر من مرض عندنا بس الفكره مش بتتحسب كدا
تم النشر الخميس، ٢٩ أكتوبر ٢٠٢٦
بقيت بعمل حيل و غش و اي حاجه عشان اجيب درجات حلوه مع اني كنت داخله السنه و مش فارقلي الدرجات قد ما فارقلي اعرف مستوايا بجد هيحصل اي يعني لو مجبتش مجموع في اسوء الحالات أو مدخلتش ولا كليه ولا معهد الدنيا مش هتقف و هيكون عندي فرص لسه أطور من نفسي و اكون انسانه ناجحه كام انسان معاه شهاده بس مش عارفه يعيش ولا يكون ناجح نفسي افهمها أن الثانويه مش نهايه العالم و اني اهم من الدرجات
تم النشر الخميس، ٢٩ أكتوبر ٢٠٢٦
لعرض السؤال في فدني اضغط هنا