انا طالب شهادة ثانوية أزهرية ومعنديش هدف يحركني اكون حاطه قدامي علشان يحفزني وأنا اصلا طموحي مش إني أدخل كلية وأكمل تعليم وتوظيف يعني مش بحب الطب ومستصعب الهندسة مع أني شاطر جدا وللعلم انا قاسم السنه ومستوايا عالي في المذاكره لكن بحس احيانا اني مش ف المكان اللي انا عايزو انا بحب العمل الحر وصناعة المحتوي والتصميم والمونتاج وناوي اني ادخل ف المجال دا لكن طبعا بدور الاول على شهاده أو هدف ملموس أو في الأغلب مضمون لأن لازم اصلا معدات علشان أبدأ صناعة محتوى والمستوي المادي مش احسن حاجه دلوقتي
ف انا دلوقتي مشتت وان عدم وضوح الهدف بيعمل حاجز للجديه والإرادة ياريت لو حد كان ازهري واتخرج ياريت يفيدني ولو حد خبره في YouTube او صناعة المحتوى يفيدني
أنت دلوقتي في منطقة صراع. حاسس إن الكتب دي سجن، واليوتيوب هو الحرية. بس الحقيقة؟ الحرية الحقيقية هي إنك تملك قرارك. لو دخلت كلية قوية بمجموعك، هتكسر عين الظروف وتخلي أهلك يثقوا فيك وفي اختياراتك بعدين. لو فشلت في المذاكرة بحجة الشغف، هتفضل طول عمرك محتاج لغيرك، وصناعة المحتوى وقتها هتبقى هروب مش طموح. وأكبر صانع محتوى في العالم هو اللي بيعرف يدير وقته ويصبر على النتيجة. لو مش عارف تسيطر على كتاب الفقه أو الميكانيكا وأنت شاطر فيهم، مش هتعرف تسيطر على خوارزميات اليوتيوب اللي أصعب بمراحل. اعتبر مذاكرتك دلوقتي هي أول فديو ليك.. النجاح فيها هو اللي هيثبت إنك شخص نَفَسه طويل ويستحق يوصل. واللي عايز ينجح بيبدأ باللي في إيده. لو استنيت الكاميرا والمايك عشان تبدأ، فأنت مش بتحب صناعة المحتوى، أنت بتحب صورة صانع المحتوى. ابدأ دلوقتي بكتابة سكريبتات، بتعلم مونتاج على الموبايل في وقت بريكك. في زمن التفاهة، الناس بتدور على حد عنده أصل لغته سليمة وعقله مترتب. دراستك الأزهرية دي هي البراند بتاعك اللي هيميزك عن ملايين غيرك بيعملوا فيديوهات. متفرطش في الميزة دي عشان شوية زهق اتعب تعب الشطار عشان ترتاح راحة الأحرار. خلص السنة دي ، ارمي كل طاقتك في المذاكرة كأنها معركة . واليوتيوب مش هيطير، بالعكس، هتدخله وأنت واقف على أرض صلبة، معاك شهادتك في إيد، وموهبتك في الإيد تانية.ربنا يوفقك ويكرمك
تم النشر الاثنين، ٢ مارس ٢٠٢٦
السلام عليكم انا اختك آلاء في تالته ثانوي ازهر وحالتي زيك بالظبط انا قاسمه السنه ومستواي حلو وبعرف اذاكر وكنت بفهم نفسي ليا فتره اني مش بتحمل الدم ولا بتحمل الحقن والكلام ده انا مش عايزة طب فضلت ادور علي هدف ليا كتيير كتير اوي شهور ضاعت في تالته ثانوي وانا بس بدور انى عايزه اي بعدين لقيتني حابه اكون الاولى انا عايزه اكون اوائل جمهوريه عابزه اكون الاولى على المدرسه انى بحب الصداره زي اي انسان لكن الصداره كانت حلمي بدأت افوق وحده وحده دلوقتي عرفت اني نفسي في طب انا مايله اكتر للذكاء الاصطناعي اللي فاتحة جديد لكن دي مجموعها اكتر من طب لازم تشد حيلك انا كل يوم قبل ما ازىم افكر في حلم البرمجه اصمم فديوهات اظبطها عندي طموحات كتيره لكن الشيء اللي فهمته بعد ده كله انك عمرك ما هتعرف انت عايز اي وانت واقف اتحرك وهتعرف نفسك مايل للطب ولا ذكاء بس الاول جيب مجموع للاتنين بالتوفيق يا بطل
تم النشر الأربعاء، ٤ مارس ٢٠٢٦
أول حاجة أشكرك إنك شاركتنا اللي جواك ده، وده يدل على وعيك بنفسك وإنك طموح فعلاً رغم الشتات ده. صحيح 100%، عدم وضوح الهدف بيخلي الإرادة تضعف زي اللي بيجري في الضباب – مش عارف وين رايح، فالجدية بتنهار. بس أنت شاطر ومستواك عالي، وده رأس مال كبير! تأثير عدم وضوح الهدف: نفسياً : بيسبب إحساس بالضياع والإحباط، زي اللي قلت، وده بيقلل الدوبامين (هرمون التحفيز) فالدماغ، فالتركيز يقل والتسويف يزيد. عملياً : بدون هدف ملموس، العمل بيبقى روتين ممل مش مرتبط بحياتك، فالجدية تروح. خطة عملية عشان تخرج من الشتات (خطوات صغيرة، ملموسة): الهدف القصير الأمد (أولوية قصوى) : خلص الثانوية الأزهرية بتفوق. دي مش نهاية الطريق، دي البوابة لأي مجال – حتى العمل الحر! كتير أزهريين نجحوا في يوتيوب وتصميم بعد الشهادة. حدد هدف يومي: "النهارده أخلص فصلين"، واربطه بطموحك: "دي هيفتحلي أبواب الدخل الحر". ابدأ صناعة المحتوى دلوقتي بدون فلوس كتير : معدات صفرية : استخدم موبايلك (أي كاميرا هاتف كويسة تكفي). حمل CapCut أو InShot مجاناً للمونتاج، Canva للتصميم. خطوة أولى : اعمل فيديو قصير (1 دقيقة) عن يومك كطالب أزهري، أو نصائح مذاكرة. حمّله على يوتيوب أو تيك توك. هدف أسبوعي: فيديو واحد. تعلم مجاني : شوف قنوات زي "أحمد الغندور" أو "يوتيوب بالعربي" للمبتدئين. ابدأ بـ"niche" تحبه زي "حياة الطالب الأزهري" أو "تصميم بسيط". بناء الإرادة إسلامياً وعملياً : صلِّ النوافل واقرأ قرآن يومياً، التوكل على الله + عمل = نجاح. قول: "اللهم يسر لي هدفي". تابع تقدمك في دفتر: "النهارده عملت إيه؟" ده هيبني ثقة. للدخل: بعد الشهادة، دور على فريلانس في Upwork أو خمسات (تصميم/مونتاج بـ50 جنيه أول شغلانة). أنت قاسم السنة وشاطر، فالوقت في صالحك! كتير زيك بدأوا صغير ووصلوا ملايين المشاهدات. جرب الخطة دي أسبوع وشوف الفرق – هتحس بالحركة تاني. نصيحة فدني : دور في فدني على أسئلة "ثانوية أزهرية" أو "صناعة محتوى" هتلاقي إجابات من أزهريين ناجحين. أنت قادر، يا بطل! قولي بعد أسبوع إيه اللي عملته. 💪❤️
تم النشر الأحد، ١ مارس ٢٠٢٦
وبما أن السنه الماضيه فتحوا كليات ذكاء في الأزهر ف دي فرصه حلوه انك تدخل المجال الي عايزه بس برضوا محتاجه مجموع كبير يعني محتاج تذاكر اكتر وخلاص السنه بتخلص يعني مفيش وقت للكلام دا
تم النشر الأربعاء، ٤ مارس ٢٠٢٦
بما اني كنت طالبه تالته ثانوي ازهري السنه الماضيه وكنت بقول نفس الكلام اني مش عايزه طب وانا اصلا بتعلم تصميم ومونتاج ولاقيه نفسي اكتر في الفريلانس والمهارات والتكنولوجيا ف كنت طول الوقت بخدع نفسي بطريقه غير مباشره اني مش عايزه كليه طبيبه أو مش هتفرق يعني لو مدخلتهاش بس في الحقيقه انا كان حلمي طب من وانا طفله اصلا لدرجة اني كنت بتعلم عن الطب من وانا في ثانوي جيت في تالته ومع الضغط بدأت اقنع نفسي اني بحب التصميم وفعلا انا بحب التصميم وتعلمت في تالته ثانوي واخدت كورسات لاكن دا مكنش حل بعد ظهور النتيجه دخلت قانون وعمري ما كنت اتخيل اني ادخله كليه زي دي وحاليا بس استوعبت اللعبه الي عملها عقلي علشان اهرب من الواقع الحمدلله دخلت الكليه وطلعت الترم الاول بامتيازات كمان وحبيت المجال بس لسه عايزه طب وفعلا عايزه طب ومش مستوعبه اني تخليت عن حلمي بالسهوله دي ولما بشوف حد في طب أو صيدله ببقى بنهار داخلياً وبندم اني مطحنتش نفسي في تالته ثانوي حرفيا ولو في فرصه قدامي اني اعيد السنه هعمل كدا بالرغم اني طورت نفسي في التصميم والتصوير وبدأت اتعلم برمجه كمان واخد كورسات إلا أن حلم الطب معرفتش احققه الخلاصه اركن المهارات كلها دلوقتي ركز علي دراستك اهم شي صدقني هتندم لو مجبتش مجموع عالي المهارات هتقدر تتعلمها في اي وقت لاكن تالته ثانوي لا اقعد مع نفسك وشوف عايزه اي هل فعلا مش عايز طب أو كليه عليا زي ما بيقولوا ولا دي مجرد خداعات علشان تهرب أو علي الاقل لازم تطلع من السنه دي بأعلى مجموع يتيح ليك كل الكليات الي عايزها وانت تختار بأهوائك
تم النشر الأربعاء، ٤ مارس ٢٠٢٦
ربنا يوفقك حاول تنزل شغل تدبر فلوس للاجهزه احسن قبل متعمل اي حاجه
تم النشر الاثنين، ٢ مارس ٢٠٢٦
اهتماماتك بتدل انك المفروض تحط حاسابات ومعلومات هدف قدامك ، وعامة مش شرط تعرف انت عاوز ايه دلوقتي انت لسه صغير خلي هدفك مجموع عالي وادعي دايما يا رب اختر لي ولا تخيرني واللهم اني استودعتك اموري كلها وخير باذن الله
تم النشر الاثنين، ٢ مارس ٢٠٢٦
ربنا يوفقك
تم النشر الاثنين، ٢ مارس ٢٠٢٦
طيب حضرتك بلاش تشتت نفسك ركز دلوقتي على مذاكرتك اهم حاجة وانك تجيب مجموع عالي عشن تدخل كليه حلوه في المجال اللي انت عاوزه. العمل الحر حلو بس مش مضمون. +انك تقدر بعد اما تدخل الكليه تشتغل بالمهارات اللي عندك وفي نفس الوقت تدرس الحاجة اللي بتحبها. بس حاليا انت تركز على المذاكره فقط
تم النشر الأحد، ١ مارس ٢٠٢٦
أشكركم جميعا على تعليقاتكم الجميله وأسأل الله لي ولكم خير جزائه وتوفيقه إن شاء الله ❤️
تم النشر الاثنين، ٩ مارس ٢٠٢٦
ركز ف دراستك دلوقتي و ف الكليه خد كورس مونتاج او حسابات و معلومات و اشتغل ف المجال اللى يعجبك بس ركز ف دراستك دلوقتي
تم النشر الأحد، ٨ مارس ٢٠٢٦
فعلا كلامك صح وانا فعلا كنت بفكر في الكليه دي وبشكرك جدا على نصيحتك ووقتك
تم النشر الأربعاء، ٤ مارس ٢٠٢٦
لعرض السؤال في فدني اضغط هنا