السلام عليكم ورحمه الله وبركاته
انا عارفه ان انا هطول في قصتي جدا علشان انا عايزه احكيها بالتفصيل بس فضلكم هو اللي هيخليكوا تقرأوا كل ده
اولا انا دلوقتي في اولى ثانوي وعندي 16 سنه الموضوع كله بدا لما انا كان عندي 13 سنه وجالي تليفون جديد وخط جديد المهم يعني انا تعرفت على واحد اسمه محمد عرفته في شهر 12 سنه 2023 هو كان من محافظه وانا من محافظه تانيه خالص
المهم يعني العلاقه دامت ست شهور واخر شهر ده كان عباره عن خناقات ومشاكل كان يكلمني يوم ويسيبني 10 وهكذا تقريبا كان بيمارس عليا الصمت العقابي او بيعاقبني على حاجه انا ما عملتهاش وما اعرفهاش بجد كان انسان مؤذي قوي
المهم انا ما كانش في سبب اصلا لقطع العلاقه هو مبقاش يبعت فانا كمان علشان كرامتي مبقتش ابعت بس وبعد كده عدى 10 ايام بعدها انا بلكته من كل حته ومسحت الشات وكل حاجه حرفيا متعلقه بيه وكنت مفكره ان انا كده خلاص هنسى والموضوع هيخلص بقى
لحد دلوقتي عدى سنتين وانا مش قادره اشيله من ذاكرتي في كل لحظه في كل ثانيه في كل وقت دايما على بالي دايما طول السنتين ومن ساعه ما سيبنا بعض
وانا محافظه على صلاتي جدا علشان ادعي عليه في كل صلاه وفي كل سجده ان ربنا ما يدخلوش كليه الهندسه اللي هو كان بيحلم يدخلها وربنا ينتقم منه في اخواته البنات ودايما مقربه من ربنا وبدعي دايما ان ربنا يشيله من دماغي خالص ويروح عن بالي بس لحد اللحظه دي وبعده مرور الوقت ده كله ما قدرتش اشيله من بالي لحظه حتى لو انا في تجمع او وسط ناس دايما على بالي
طبعا دول السنتين دول انا لا بعثت له ولا هو بعث لي بس بالرغم من كل ده وبالرغم من ان انا بدعي عليه انا لسه بحبه وساعات اقول لا انا مش بحبه وساعات بقول انا لسه صغيره وساعات اقول انا مجنونه ولا انا ايه اللي بيحصل لي ولا انا عندي انفصام ولا ايه بالضبط
بجد انا ما بقتش فهماني انا حاولت اعمل حاجات كتير قوي علشان انسى بس انا مش عارفه
كنت بسمع بودكاستات عن الثقه بالنفس والتخطي وكنت دايما بحول اطور من ذاتي في السنتين دول ودايما بتعلم حاجات كتيره وجديده لدرجه ان انا بقيت اتعلم الحاجات اللي انا ما بحبهاش زي الرسم مثلا ودايما بحاول اشغل وقتي وبقول اكيد لما انا هبقى في تجمعات او وسط العيله او وسط اصحابي اكيد مش هتفكري فيه بس ده ما بيحصلش وبيجي على بالي برده
فهل ربنا بيجيبه في بالي علشان حاجه معينه وساعات يجي لي في الحلم مثلا مره يجي لي في الحلم وهو بيعيط فاصحى من نومي بعيط انا ما بقيتش عارفه اعمل ايه تاني علشان احاول انسى واتخطى بقى
تطوير وبحاول اطور من نفسي ومن ذاتي وبحاول اشغل وقتي وابقى دايما في تجمعات ووسط ناس ومحافظه على صلاتي جدا والورد اليومي كمان
فهل مثلا ربنا ليه حكمه في كده ان هو ما يخلينيش انساه علشان هو هيرجع في يوم من الايام مثلا او ربنا مثلا بيبعدنا عن بعض دلوقتي علشان نبقى مع بعض في الحلال
دماغي اتجننت من كتر التفكير من كتر ما انا عايزه انساه ومش عارفه انا محدش يعرف حاجه عن العلاقه دي ابدا وعلى فكره هو شكله عادي جدا شخصيته نرجسيه قوي وفي كبر وتعالي وثقه بالنفس زايده عن اللزوم
وساعات بحس ان هو مريض نفسي وكان بيطلع مرضه ده عليا
انا ما بقيتش فهماني انا بحبه ولا ما بحبوش انا عايزاه ولا مش عايزاه انا بكرهه ولا مش بكرهه بجد انا ندمت جدا على علاقتي بيه لانها دخلتني في متاهات ويعلم ربنا ان انا ندمت جدا اني عملت حاجه زي دي
وانا تبت جدا من بعدها وعمري ما كلمت ولد لا بعده ولا قبله ودايما مع ربنا تعبت جدا عايزه امسحه من حياتي كأنه ما كانش موجود انا بدعي في ليله النصف من شعبان وليله القدر وفي كل آذان وفي كل ايام رمضان وبدعي دايما في الايام المستحبه واللي مستجاب فيها الدعاء يمكن ربنا يستجيب لدعائي في يوم من الايام واقدر انساه
وساعات ارجع اقول ده لعب عيال وانه مكانش بيحبني اصلا وان ده كان حب مؤقت علشان احنا مراهقين لسه وكده يعني بس ارجع واقول انا لحد دلوقتي مش قادره انسى انا ساعات افضل كويسه شهر واثنين ومره واحده آجي واقعد افتكر كل حاجه وارجع اعيط تاني وساعات تانيه ادخل على حسابه على انستا علشان اشوف دعواتي عليه استجابت ولا لا بس بلاقي دعواتي ما استجابتش
وان هو عايش حياته وانه زي الفل هو كمان بيسافر لايطاليا مع والده وكده يعني عشان بيشتغلوا بره فبلاقيه خارج ومتفسح ودنيته تمام وارجع واقول طب اشمعنى هو عايش حياته وانا لا انا بدخل حساب الانستا مش علشان اراقبه ولا عشان اشوفه انا بدخل اشوف بس ارجع لي ولا لا بس بدخل الاقي كل حاجه زي ما هي وان الدنيا فل واحسن من الاول كمان
انا الحمد لله لحد دلوقتي بقى لي شهرين تقريبا ما دخلتش حساب و عاهدت نفسي اني مش هدخل حسابه تاني خالص وعملت بلوك للحساب كمان بس انا عايزه اعرف امتى حقي هيرجع لي وامتى هنساه وهل هو بيحبني ولا لا وانا ليه دخلت في كل المتاهات دي انا مش عارفه اخرج منها
يا رب اكون ما طولتش انا عارفه ان انا طولت والله واتمنى يعني ان حد يكون بيقرا كلامي ده دلوقتي ولو حد يعني عارف اي طريقه تخليني اعرف انسى او مثلا يقول لي حكمه ربنا في كده يا ريت يفيدني يا جماعه عشان انا عملت كله الطرق الممكنه في سبيل اني انسى وفي الاخر حابه اقول يا رب ينتقم منه يا رب ويتعمل فيه نفس اللي اتعمل فيه بس انا بحبه والله ومش عايزه ادعي عليه يا لهوي تعبت يا ناس مني
في مجموعة نقاط أنت محتاجه فهمها • ما فعلتي إنك قبلت تكلمني ولد كان خطأ كبير، لكن إنك قدرت تسيبي ده أنجاز أعظم دل إنك كنتي قوية جدا قدام نفسك ودل على مدى قدرتك في المواجهه لأن اللي عملتي ما كان سهل لأي حد في قطع العلاقه الغير شرعية لأن أقوى رابط فيها هو التعلق رغم كل الإهانات والأذي النفسي من الطرفين • كل اللي بيحصل معاكي ده طبيعي جدا جدا جدا عايز أقولك التعلق بيعمل أكتر من كده وخدي بالك « أنا قلت تعلق وليس حب» لأن العلاقات من النوع ده بتبني مشاعر مزيفه لأن كل طرف بيتجمل وبيقضوا لحظات فيها هرمونات السعادة بترتفع فبتخليك تحسي انه حب إنما الحب أرقى من كده بكتير لأنه يشمل الاحترام والاحتواء والموده والرحمة فالمواقف بتخلق الحب الحقيقي إنما التعلق ده طبيعي يحصل بين اي شاب وبنت لأنهم اتخلقوا ينجذبوا لبعض وهو اللي كنت تعرفي دخل حياتك عوضك عن جزء دماغي حسسك انه كان ناقص من غيره فبالتالي ممكن دماغك يفهمك انه حب لأنها مشاعر كانت أول مرة تجربيها وكلام أول مره تسمعي فبالتالي طبيعي يبقى معاكي لفتره خصوصا إنك ارتبط بيه سنتين فحابب اقولك ابشري كدا كدا هتنسي مع الوقت وهتكبري وتعرفي انها مجرد شيء تافه، بس ده محتاج وقت تخيلي في ناس ممكن تنجذب لحد معين من اللي شافوهم ولا حتى يتكلموا في حب ولا ارتباط الناس دي تكتم الحب داخلها ومع الزمن يقعد كتير عشان ينسى •لأن عشان تنسي محتاجه تعرفي إنك كنت في علاقة سامة أولا واحد كان بيحاول يمارس رجولته عليك بدون أي أساس ولا اعتبار واحد انت الحاله الوحيده اللي تسمعي الكلام منه هي إنك تكوني مراته لأنه قوام عليكي لكن انت قبلتي انك تسمعي كلامه وتخلي يمارس ما يسمى رجوله ونرجسيه بدون اي اعتبار هو حتى مش خطيبك وبيعدل في شخصيتك عشان تتوافقوا لا هو بس داخل البيت من الروتر.... تعرفي هو ما يستاهل لأن لو أخته ما قبل عليها فكونه يقبل عليكي يدل انه معندوش مسئوليه لو كنتي قولتيله لي قريب او اخ عايز يرتبط باختك او قريبتك وانا وسيط كان وقتها ممكن يرفض وده يؤكد كلامي ولو وافق هيبقى ديوث فكون ربنا نجاكي منه دي حاجه كبيره جدا وانجاز عظيم تحمدي ربنا عليه وتتعلمي منه الدرس إنك بعد كدا اغلى من ان مجرد حد يدخل حياتك من غير باب البيت مجرد بس انه يوصلك محتاج يعدي على كذا راجل ويتوافق عليه عشان بس يتكلم معاكي لو استفدتي حاجه من التجربه دي فهي من حكمة ربنا واكتر حاجه كويسه طلعتي بيها انك هتعرفي تقدري نفسك انك غاليه خلاص اللي فات مات وانت توبتي والتوبه شالت اللي قبلها • وعايز اقولك اخر حاجه بتطلي تدعي بطلي تفكري فيه اياك تدخلي اياك تدخلي اياك تدخلي تاني لاي شيء يوصلك ليه كل اللي بيحصل معاك ده لعبة من الشيطان هو من مصلحته انك تفضلي متعلقه بيه فيوسوس ليك تشوفي صفحته وتفتكري ايامكم الحلوه وكل ده هيخليك متعلقه اكتر وكدا كدا لازم تكوني واعيه ان اصلا مفيش انسان هينزل لحظاته الوحشه لحد مش منطقي انه يخلي حد يشوفه ضعيف او يشمت فيه هو الشيطان عايزك تدخلي لهدف فيحطك الشيطان قدام خيارين اصل هو هيئك خلاص انك ما تسيطري على نفسك فهيخليك يأما تكلمي وتسألي عليه يأما لو جالك حد تاني هترتبطي بيه بسهوله من اجل انك تنسي العلاقه دي وتجربي واحد تاني فهو بالضبط كدا اللي عايزه منك • أخيرا لازم تفهمي إن " من لم يشغل نفسه بالحق شغلته بالباطل " اللي انت محتاجه تعرفي ان الموضوع انتهى ومستقبلك اهم من مجرد وقت عيشتيه فمش كل حياتك تقف عند الوقت ده خصوصا انك فهمتي انه كان كله توكسيك وغلط ودعائك عليه مش هيفيدك بحاجه حتى ممكن يكون حيله من الشيطان لا اكثر عايزك تفهمي ان كدا كدا طالما اذاكي هتترد ليه اطمني ربنا يمهل ولا يهمل بس مش لازم تترد بالطريقه اللي بتفكري بيها هو كدا كدا هيتأذي لأنه ما استسمحك عشان يقدر يتوب فلازم تترد ليه لانه دين عليه بس ربنا هيختار الوقت المناسب وخلي بالك ربنا يمهل ولا يهمل
تم النشر السبت، ٢٥ يناير ٢٠٢٥
هوني علي نفسك يا جميلتي أنا أكتر واحده فاهماكِ يعتبر أنا بس عايزة اقولك ان هتاخدي فتره ف مشاعر الغضب اللي بتحسيها تجاهه وفتره ف مشاعر الحنين وهتيجي عليكِ فتره هتحسي باللاشيء ساعتها هتبقي فعلا عملتي فموڤ اون صح زي ما بيقولو حاولي متزيديش مشاعر الغضب دي (حقك طبعا انتِ متعصبه تجاه اللي حصل) بس دي مش احسن حاجه صحيه بالنسبالك متبقيش اجريسيڤ ناحية الموضوع اوي كده الدعاء عليه مش هيفيد بأي نتيجة غير انه حرام طبعا عايزه اقولك ان السلام الحقيقي اللي هو تقولي يارب يبقى كويس بس بعيد عني انهي الموضوع من جواكِ الاول عشان تقتنعي انه انتهى لو واجعك اوي كده مترجعيش خلاص كفايا السنتين دول استمري فالبعد وكده كده لو ربتا كاتبهولك هتتجعموا تاني سوا رغم كل حاجه صعبه لو محتاجه متخصص وحاسه انك مش قادره تساعدي نفسك عمرك ما تتردي فالخطوه دي وعمرها ما كانت بالسن صدقيني ومش لازم تعرفي حد من صحابك لو خايفه من نظرتهم ليكِ رغم انها حاجه طبيعيه جدا جدا بس انا متفهمه السبب عامةً، ولا يا روحي انتِ متطولتيش ولا حاجه كفايا أنك بتصارحي نفسك باللي حصل دي لوحدها شجاعه اتمنى تبقى كويسه وبخير ف اقرب وقت 🩷
تم النشر الجمعة، ٢٤ يناير ٢٠٢٥
السلام عليكم، هو الحقيقة عمركِ ما هتنسي طول ما انتِ شاغلة نفسكِ بالأسئلة دي وطول ما أنتِ بتدعي عليه أو بتذكريه في دعائك عامة. خلاص دعيتِ مرة إن ربنا يغفر لكِ وإنك تبتِ ودعيتِ يساعدك تنسيه يبقى نعتبر إن ربنا استجاب الدعاء ونركز في حياتنا. أنتِ باللي بتعمليه ده مش بتدعي ربنا تنسي، أنتِ باللي بتعمليه حولتِ الشخص ده لهاجس ملازمك طول الوقت ووسواس هيفضل معلق في دماغك. المفروض تقعدي مع نفسك وتفكري بهدوء، إيه اللي تعلمتِه أصلا من التجربة دي؟ عرفتِ ليه حرام العلاقات دي وتبتِ منها.. عرفتِ إن لمفروض نحافظ على مشاعرنا بعد كده ومنرميهاش لأي شخص يتسلى بنا شوية وبعدين يروح يدور على حد تاني يتسلى به... عرفتِ تقدري قيمة نفسك ووقتك؟ زي ما قلت لك، طول ما أنتِ بتدخلي تشوفي هو دفع التمن ولا لأ... مش هتنسيه. طول ما بتدعي عليه أو بتذكريه في صلاتك... مش هتنسيه. طول ما أنتِ شاغلة نفسكِ بفكرة هو ليه عايش حياته وليه مندمش وامتى ربنا هينتقم لك منه وأسئلة ملهاش لازمة زي هل كان بيحبني فعلا وهل وهل ووو. ** صفحة واتقلت واتعلمتِ منها وخلاص. ركزي في حياتك زي ما هو عايش حياته ومتفكريش لا في انتقام ولا إنه يدفع الثمن. افهمي إنك انتِ كمان غلطتِ لما دخلتِه حياتك... مش هو بس اللي غلطان. افهمي إنك ظلمتِ نفسك ولحد الآن بتظلميها لما تفضلي عايش في الدوامة دي. ** ربنا مش بيجيبه في بالك ومفيش حكمة عشان تدوري عليها وربنا مش بيجيبه في أحلامك وده دليل يعني إن فيه أمل بقى أو إنه هيرجع والكلام ده كله.. أنتِ من كتر ما شغلتِ نفسكِ بالتفكير فيه خليتِ عقلك الباطن يظهره لك في الأحلام. أحلامك دي مشاعرك نفسها وتمنياتك الباطنة.. مش يعني رؤية إنه بيبكي فعلا وندمان وأي تبرير تاني الشيطان بيحاول يضحك عليكِ به. ** استعيني بالله وابدئي ركزي في حياتك ومستقبلك وبطلي دعاء عليه وإن شاء مع الوقت هتنسيه فعلا. بالتوفيق.
تم النشر الأحد، ٢٦ يناير ٢٠٢٥
أما دعائك عليه حرام ده أولا ، ربنا ليه حكمة أكيد تخيلي معايا لو أن طيش المراهقة دفعك لأنك تتعرفي على واحد غيره بس ممكن يكون شخص مش كويس فيأذيك بصورة أسوأ ، ويجب أن تكوني على علم بما يحدث من مصائب هذا العصر الذي نعايشه . لذا فهذا الشخص كان رسالة من الله لك ومفاد الرسالة العفة والتمسك بالأخلاق. إن شاء الله الشخص المقدر لك سيأتي يطرق باب والدك ويطلبك منه. اضمني مستقبلك الأول تدخلى كلية محترمة وإن شاء الله هتلاقي اللي يستهلك 🙂
تم النشر الجمعة، ٢٤ يناير ٢٠٢٥
لعرض السؤال في فدني اضغط هنا