السلام عليكم، ربنا يوفقك إن شاء الله في مذاكرتك وامتحاناتك. أولًا، اهدي خالص... الموضوع مش محتاج غير هدوء ويقين إن ربنا أكيد كاتب لك الخير. أنتِ ذاكرتِ فخليكِ واثقة إنك تقدري إن شاء الله تراجعي وتحلي كويس. إحساس النسيان ده طبيعي وكل ما تقرب الامتحانات كل ما بيزيد الإحساس ده. أنا كنت حرفيًا بروح الامتحان وأنا حاسة إن عقلي صفحة بيضاء لكن لما كنت بستلم الورقة وأبدأ حل كنت ببدأ أفتكر... فإحساس النسيان ده نفسي مش أكتر. الحل في الهدوء والثقة بالنفس والمراجعة المنتظمة على المعلومات، وطبعًا النوم لعدد ساعات كافي. بلاش خالص تاخدي من ساعات نومك عشان تقدري تركزي وتفتكري اللي بتذاكريه. ثانيًا، اهتمي بأسئلة الامتحانات السابقة. متقعديش تذاكري من أول وجديد اللي هو بالتفصيل الممل بقى وآخد تلات أربع ساعات في الدرس... لأ، ببساطة اقرأي الدرس مرة بتركيز، لو عرفتِ تسمعي الشرح بتاعه من مدرس على يوتيوب بتفهمي منه يكون جميل جدًا، بعدها تقرأي الدرس تاني وتجيبي أسئلة الامتحانات السابقة وتشوفي الأسئلة اللي جت على الدرس اللي ذاكرتيه وتحليها. ثالثًا، أنا مش عارفة الوقت الباقي على امتحاناتك إيه بس كل دقيقة بتفرق... فامنعي خالص تفكير إنك مش هتلحقي والوقت مش هيقضي. رابعًا، والأهم من كل اللي فات الاستعانة بالله سبحانه وتعالى. متقصريش في صلاتك خالص عشان تلحقي تذاكري، بالعكس قسمي جدول مذاكرتك تبعًا لأوقات الصلاة وده عن تجربة هيفرق كتير. بالتوفيق إن شاء الله.
شكرا علي وقتك♥︎
تم النشر الاثنين، ٢٦ مايو ٢٠٢٥
تمام جزاكِ الله كل خير
تم النشر الاثنين، ٢٦ مايو ٢٠٢٥
كويس جدًا، حاولي بس تلاحظي نفسك أثناء المذاكرة، هل بتمر لحظات بتتشتتي فيها أو بتسرحي؟ كمان مش شرط لو الدرس طويل تاخديه في جلسة واحدة ممكن هو محتاج يتقسم... متفكريش أبدًا إن المشكلة فيكِ... عقلك بيصدق أي كلمة تقوليها له.. هتوصلي له رسالة إنك مش بتفهمي ولا بتفتكري هو مهمته يصدقك وينجحك في كلامك فهيصدق الكلام ويثبته لك فهتلاقي نفسك تلقائيًا مش فاهمة ولا فاكرة، خليكِ واثقة في نفسك وموقنة بربنا ومستعينة به بصدق وكل حاجة هتكون كويسة.
تم النشر الاثنين، ٢٦ مايو ٢٠٢٥
لا والله سايبه كل دا قافله كل حاجه حرفيا ، انا بكون عامله وقت للمذاكره وبلاقي الوقت خلص وانا مخلصتش + اني بتفاجئ ان عدا كل دا في الجزئيه دي بعد ما اخلصها بجد بتصدم ومش عارفه والله العيب في مين هي الدروس اللي طويله ولا انا اللي مش بفهم ولا ايه
تم النشر الاثنين، ٢٦ مايو ٢٠٢٥
يا ريت كمان لو بتتفرجي على فيديوهات شورتس كتير أو بتتصحفي السوشيال ميديا توقفي ده عشان ده من ضمن أسباب التشتت وعدم التذكر. لو أنتِ مسلمة الزمي أذكار الصباح والمساء وأكثري من (لا حول ولا قوة إلا بالله) ردديها بإيمان ويقين فيها وهيفيدك جدًا لو فصلتِ بين فترات المذاكرة بقراءة آيات من القرآن... ذاكري مثلا 25 - 50 دقيقة وافصلي بـ5-10 دقائق تحركي جسمك وبعدين تقرأي كم آية. وربنا يوفقك إن شاء الله.
تم النشر الاثنين، ٢٦ مايو ٢٠٢٥
خيرًا إن شاء الله، استعيني بالله وابدئي من غير تضييع وقت في القلق والأفكار... قسمي وقتك وحددي الأولويات.. فيه قانون اسمه باركنسون بيقول (العمل يتمدد ليملأ الوقت المتاح له) بمعنى إن مهما كانت المهمة أو مثلا الموضوع اللي محتاج تذاكريه سهل أو صعب هيمد معك حسب الوقت اللي أعطيتِه لنفسك... ممكن درس تقولي هذاكره في نص ساعة وتقدري تخلصيه ولو قلتِ هديه ساعتين هيمد معك لساعتين ببطء بقى وتشتت وغيره.. حددي لكل درس وقت متتجاوزيش عنه... مثلا هسمع المحاضرة وأنا مسرعة الفيديو ومركزة جامد لكل كلمة.. هقرأ الدرس بتركيز في مدة كذا.. هحل الأسئلة في مدة كذا. وعادي لو معرفتيش تجاوبي سؤال، متفكريش إن ده معناه إنك فشلتِ في التذكر.. عادي جدًا، روحي ودوري على الإجابة... مجرد بحثك عن الإجابة هيثبت المعلومة زائد طبعًا المراجعة كذا مرة. إحساس النسيان زي ما قلت لك نفسي... أنتِ خايفة وواهمة نفسك إنك مش قادرة تفتكري... أنا عارفة الإحساس ده.. إحساس إن الوقت بيطير ومش لاحقة بيزود من الضغط والخوف وبالتالي من مخاوف عقلك فبتحسي كده... لو توكلتِ على الله وسألتِه يعينك ووثقت في نفسك إن شاء الله هتقدري تذاكري بتركيز.
تم النشر الاثنين، ٢٦ مايو ٢٠٢٥
والله جربت اقرأ الدرس قبل كدا حسيت اني فعلا مش فاكره حاجه والمشكله ان مراجعات المدرسين بتاخد اكتر من ٥ سعات ومع كل دا بردو باخد وقت اذاكرها دا غير ييجي ٣ سعات حل حرفيا اليوم بيخلص في محاضره واحده بس والامر دا تاعب نفسيتي انا كدا مش هعرف اعمل حاجه وهاجي علي المواد كلها والله
تم النشر الاثنين، ٢٦ مايو ٢٠٢٥
اتبقى اقل من ٢٠ يوم علي الامتحانات
تم النشر الاثنين، ٢٦ مايو ٢٠٢٥
لعرض الإجابة في فدني اضغط هنا