السلام عليكم انا عندي 17سنة وعندي اختين 15سنةو11سنة واخ واخت تانى صغيرين المهم انا من صغرى وانا الوحيدة ما بينهم اللي بتضرب من اهلى كتير اووى على اتفه حاجه والله عمرهم ما قعدو يتكلمو معايا او يقولولى مالك او اى حاجه دايما زعيق وضرب ولما بتخانق مع حد من اخواتى بسبب انهم اخدو حجاتى منغير استأذان او ضيعو حاجه بتاعتى يقفو معاهم ويجيبو الغلط عليا وبرضو يضربونى وانا اه سعات مش بسمع كلامهم وكده بس برجع اعمل الللي عاوزينه وبرضو بطلع غلطانة ف كل حاجه بعملها ودايما بيكسفونى قدام صحابى وبيضيعو صحابى منى لحد ما بقاش عندى صحاب ولو خرجت بيبقى مرة كل شهر او شهرين او ف المناسبات وبالعافية كمان ولو رجعت متأخرة عشر دقايق عشان الطريق مثلا بتقلب خناقة كبيرة وبرضو اضرب فيها لاكن اخواتى دايما بيسبوهم مع صحابهم عادي وبيخرجوهم وبيعملوهم حلو ودايما بيقولولى انى بكرهم ومبحبهمش لاكن انا والله مش بكرهم خالص وانا عندى مرض كده معين دايما بيعيرونى بيه قدام اى حد والمرض ده جالى اصلا بسببهم من كتر ضغطهم عليا والتوتر الانا عايشة فيه ومن كتر ما بنام معيطة كل يوم وانا من النوع المبعرفش ابين مشاعرى اوى لحد ومبعرفش احكى حاجه جوايا او اقول لحد انا مضايقة حتى لو اهلى وعشان انا الكبيرة المفروض عليا استحمل كل ده ومتكلمش وكمان اشكرهم على كل حاجه بيعملوها عشان ميقولوش انى بكرهم بس انا فعلا مبعرفش اقول حتا شكرا لحد فيهم او اى حد عمتآ وعندى رهاب اجتماعى لدرجة انى بخاف امشى لوحدى فالشارع و على طول طول ما انا قاعده يبعتو اختى الصغيرة تراقبنى عشان يعرفو بعمل اى وغير كده كتير لسه انا بجد تعبت من الحياة دى وكنت بفكر اهرب بس خوفت
احنا عرفنا مشكلة اهلك وافعالهم ممكن تقولى الحاجات اللى بتضربى عليها هى ايه ...ايه الغلطات اللى قبل ولادة اخواتك الصغيرين اتضربتى عليها ؟ وايه سبب عدم الثقه وانتى خارجة والرهاب الاجتماعى عندك من امتى ؟ لانك ذكرتى انك بتخرجى وترجعى عادى
تم النشر الجمعة، ١٩ أبريل ٢٠٢٤
اشكرك على شجاعتك انك سالتي وطلبتي المساعدة ومهتمة تلاقي حل حبيبتي انصحك متفكريش في الهرب تاني، اطردي الفكرة دي من دماغك ، لان قسوة الشارع اصعب بكتير من اي حاجة بتحصل جوة البيت، القسوة اللى انتي بتفكري تهربي بسببها من البيت دي هتلاقي منها اضعاف اضعاف من ناس مبترحمش لو سيبتي البيت، كمية استغلال وشر اكبر مما تتخيلي واكبر من اي حاجة بتشوفيها في فيلم ولا مسلسل في التليفيزيون. انتي بنوتة جميلة لازم تحافظي على نفسك، وعلى سمعتك واخلاقك و تحمي نفسك من اي ضرر او موقف ممكن يسببلك مشاكل كبيرة جدا، وكمان لو دورنا في الدين، مينفعش وحرام تخرجي من البيت بدون اذن بابا ، وحرام تسافري في اي حتة بدون وجود محرم معاكي اللى هو بابا، عشان يحافظ عيلكي ويحميكي من اي اذى. الهروب مش حل ، الهروب مشكلة وشر اكبر هتوقعي نفسك فيه، والله اعلم تكون نهايته ايه. انا متاكدة انك فكرتي ازاي هتعيشي؟ هتصرفي منين؟ هتعيشي فين؟ مين هيوافق تسكني او تشتغلي في اي مكان لوحدك وانتي صغيرة لسه اقل من السن القانوني؟ هتكملي تعليمك ازاي؟ فكرتي بابا وماما ممكن يحصلهم ايه لو ملقوكيش في البيت؟ هما اكيد بيحبوكي وخايفين عليكي وبيحاولو يربوكو انتي واخواتك صح، بس طريقة تفكيرهم واسلوب تربيتهم هو اللى محتاجين يغيروه. انا فاهمة انك مضغوطة وزعلانة وحاسة بيكي، والمشكلة او المرض اللى عندك هو فعلا حاجة بسبب الضرب والضغط اللى بتتعرضيله في البيت، ملكيش ذنب فيه، بس يمكن بابا وماما مش فاهمين دا، يمكن فاهمين ان الضرب والشدة هي طريقة التربية المناسبة، على قد فهمهم وادراكهم بيتصرفو ، فلو حد فيهم اتكلم عن المرض او المشكلة دي تاني قوليلهم انه بسبب الضرب والزعيق اللى بيحصل طول الوقت، وانك محتاجة تروحي لطبيب او طبيبة باطنة مثلا عشان يلاقي حل للمشكلة او المرض دا، والطبيبة ممكن هي اللى تفهم بابا وماما سبب المشكلة وتقولهم انك محتاجة تتكلمي مع اخصائية نفسية تساعدك وتتكلم معاهم بردو وتفهمهم اكتر عن سبب المشكلة وازاي يساعدوكي على حلها ويساعدوكي كمان انك تتكلمي اكتر وتقولي شكرا وتقولي اللى انتي حاسة بيه. انتي واضح انك بتقدري تكتبي كويس وتوصفي مشكلتك، ممكن تبدأي تساعدي نفسك بانك تكتبي اللى انتي بتفكري فيه على الورق، لو مريتي باي موقف ومعرفتيش تردي، اكتبي الموقف على الورق واكتبي كنتي عايزة تردي تقولي ايه في الموقف دا؟ واقري الكلام دا وانتي لوحدك بصوت عالي شوية ، وكرريه مرة واتنين وتلاتة، عشان يبقى سهل عليكي المرة الجاية تتكلمي وتقوليه للي قدامك بصوت عالي. (ممكن بعدها تقطعي وترمي الورق دا عشان محدش يشوفه ويضايقك). المفروض في مدرستك في اخصائية نفسية، تقدري تتكلمي معاها وتساعدك هي تتكلم مع بابا او ماما وهي بردو تقدر تفهمهم وتقولهم ازاي يتعاملو معاكي ومع اخواتك، او لو في مدرسة بتحبيها تقدر تتكلم مع ماما وتساعدك على الاقل تروحي لطبيبة او اخصائية نفسية تساعدك على حل المشكلة او المرض اللى بتعاني منه.
تم النشر الأربعاء، ١٧ أبريل ٢٠٢٤
لعرض السؤال في فدني اضغط هنا