حبيبتي للأسف أي حد بيفهم هيقولك نفس الكلام حتى لو سألتي السؤال أكتر من مرة ، انتي لازم تدي لنفسك وقت وتتقبلي مشاعرك وماتستنيش إن الوضع ده يخلص بيوم وليلة وصبرك ينفذ ، رفضك لمشاعر حزنك على والدك مع إن كان ليه تأثير كبير جداً في حياتك ده شيء مش صحي إطلاقاً ومُهلك لروحك وطاقتك ، فيها ايه لما نحس بالضعف والحزن وفيها ايه لما نعجز عن النسيان والتجاوز يكون صعب ومحتاج لوقت هو إحنا عايزين ننسى أعز الناس ف حياتنا بسهولة كده؟ ، مش بقولك استسلمي للحزن وخليه يوقف حياتك بس رفضك لمشاعر الحزن بجد بيخلي الموضوع مُعقد أكتر يعني تخيلي حزينة وكمان متضايقة وغضبانة من نفسك عشان حزينة!! يعني بتزودي فوق الحزن كمان غضب ، محتاجة تفهمي مشاعرك أكتر وتسمحيلها تخرج بالصورة الطبيعية وبعد كل مرة ترجعي تمارسي حياتك طبيعي عادي وزي مابتعملي كل مرة دايماً ادعي لوالدك وتصدقي عنه وبريه ف وفاته كمان لأن ده كل اللي بإيدك تعمليه بس مش مطلوب منك تقسي ع نفسك وتتجاوزي ف ظرف يوم بليلة أو حتى كام يوم أو كام شهر ماينفعش أصلاً تحددي الوقت اللي ممكن تحتاجيه عشان تتجاوزي صدمة وفاته كإنها تاسك هتعمليها ! ، خدي وقتك وحاولي تتجاوزي الموضوع واحدة واحدة صدقيني مجرد ما تاخدي القرار ده الدنيا هتختلف جداا ولو لسة حاسة بصعوبة كبيرة أوي في التجاوز ساعتها مش عيب تلجأي لمختص يساعدك او حتى يديكي مهدئات لو حالتك محتاجة لكن اوعي تفكري ان العيب فيكي ولازم تلاقي حل ضروري عشان شكلك ضعيفة وأوفر قدام اللي حواليكي! مفيش الكلام ده
بالنسبة لموضوع العياط طبعاً كل ما حسيتي بالرغبة فيه وانتي لوحدك عيطي ولكن أنا ليه بقولك ماتتكسفيش تعيطي قدام حد لما تتكلمي عن باباكي الله يرحمه لأن دي حاجة لا خجل فيها... بالنسبة لرد فعل مامتك ماتزعليش منها انها خالفت توقعاتك كان ممكن بدل ما تاخدي موقف منها إنك مش هتكلميها تاني عن اللي مضايقك _ عشان رد فعلها كان مش مُرضي ليكي كفاية _ إنك تطلبي منها إنها تحضنك وتطمنك وتعبريلها عن احتياجك ده أكيد ماكانتش هترفض ويمكن هي مش عارفة وفاته مأثرة فيكي لأي مدى لأن البني آدمين حساسيتهم للمواقف مش واحدة في ناس بتزعل وبتتأثر من أقل حاجة وناس بتقدر تستحمل أكتر ومش عيب اننا نكون من النوع الأول وحساسين لين القلب ده حاجة كويسة وربنا بيحبها ... وبعدين مش يمكن مامتك بتحاول تكون قوية قدامكم بردو وتقويكم بس مش عارفة إن انتي محتاجة طبطبة اكتر من الكلام لأني ده أصعب موقف مر عليكم ف حياتكم وهي ماختبرتش مشاعر حزنك بالطريقة دي قبل كده ف يمكن معذورة ... أما بالنسبة بقا لتصرف صحابك لما كنتي متأثرة بمرض والدك وبتعيطي وهما مش حاسين بيكي وبيمارسوا حياتهم طبيعي وبيهزروا ويضحكوا أنا معاكي إن ده تصرف غير لائق ف موقف زي ده وقلة ذوق منهم بس فعلاً ماحدش هيحس بيكي وهو مش مُبتلى وخلي ده يعلمك ان الحياة بتمشي والناس كل واحد ملهي ف اللي هو فيه وبس مانستناش من حد وجوده الدائم في كل المواقف ... أما مامتك واخواتك واهلك بجد حاولي ماتاخديش جنب منهم هما اللي ممكن يساعدوكي تخرجي من حالتك السيئة وتتجاوزي الفترة دي لأن أكيد لو احتاجتي لحضنهم هتلاقيه ولو احتاجتي تتكلمي عن باباكي معاهم هيفتكروا معاكي الذكريات الجميلة دي وهيترحموا عليه وهيدعوله مش هيحسوا إن الموضوع لا يعنيهم زي الصحاب او الأغراب.... إن شاءالله انتي قد المحنة والإبتلاء ده وافتكري إن كل ما شق على نفس المؤمن بيُؤجر عليه حتى الشوكة لو أصابتك بتاخدي بيها أجر عند ربنا ف الحمدلله إن لينا رب رحيم بينا وسميع لدعائنا وقادر يبدل حالنا لأحسن حال ♥️
تم النشر الأحد، ١٢ يناير ٢٠٢٥
طيب ينفع اعيط و اخرج اللى جوايا لوحدى مش قدام حد؟ لأن بصراحة معنديش حد اقدر اتكلم و اعيط قدامه لأنى للأسف ماما اقرب شخص ليا لما حاولت فى مرة اتكلم و عيط قدامها تخيلت أنها هتحضنى و تحتوينى لكن رد فعلها أنها قالت كلمتين كده و خلاص ندمت أنى حكيت و مرة أثناء مرض بابا الشديد فى آخر أيامه عيط قدامه صحابى و من ضمنهم القريبين قعدوا يهدوا فيا و بعدها بدقائق قاموا يفطروا و يشغلوا اغانى و يعملوا فيديوهات تيك توك و انا قاعدة بتقطع قدامهم رغم انى دى كانت أول مرة اعيط قدامهم و هما عارفين انى مش بعيط ابدا و دى حاجة كبيرة و بسبب الحاجات اللى زى كده انا مقدرش اعيط قدام حد علشان بندم
تم النشر الأحد، ١٢ يناير ٢٠٢٥
ربنا يرحم والدك ويغفر له ويجعل مأواه الجنة اللهم آمين ♥️ اللي أنا قصدته برفضك للحُزن هو رفضك لفكرة التعبير عنه بتلقائية وبالطريقة اللي تريحك ،انتي بنفسك قولتي إنك بتكتمي ومابتحبيش تعيطي قدام حد ومابتحبيش تباني ضعيفه ، ده معنى الرفض وعدم التقبل ، ماتتكسفيش تعبري عن مشاعرك وماتحاوليش تنكريها عشان هي كده بتتضخم أكتر وبتتعقد أكتر وبتحاول تخرج بصور تانية وبتأثر ع نفسيتك فيما بعد وممكن تدخلك ف اكتئاب بعد الشر ، أكيد في شخص واحد ع الأقل من اللي حواليكي مش هيشوفك ضعيفة لما تتكلمي معاه وتشاركي معاه مشاعرك ، لأن التنفيس عن المشاعر دي أول خطوة في رحلة التجاوز والتعافي ، وماتتكسفيش إنك تعيطي ده رد فعل طبيعي وسبحان الله بييجي بعده راحة كبيرة انتي بس اللي بقالك كتير ماجربتيش ، ولو سبتي نفسك واتكلمتي عن اللي جواكي وعيطتي هتلاقي نوبات الحزن اللي بتجيلك دي بتقل واحدة واحدة وبتيجي ع فترات متباعدة أكتر لكن دلوقتي انتي مراكمة كتير اوي وكل ده محتاج تخرجيه لأن كتمانه عبء كبير ع نفسك
تم النشر الأحد، ١٢ يناير ٢٠٢٥
انا فهماكى انتى عندك حق لكن انا مش رافضة الحزن الفكرة أنى بقالى اكتر من ٧ شهور و انا من النوع اللى مش ببين و كتومة قدام الناس مش بحب اشيل حد همى قدام الكل بتعامل عادى و بضحك و بهزر و بساعد الناس لو عندها مشاكل كمان نادر أوى لما اقول حاجة لحد من اهلى و مش بطول فى الكلام لأنى بتوجع لما بحكى و ببقى عايزة اعيط و انا مش بعرف ولا بحب اعيط قدام حد بابا الوحيد اللى كنت اقدر اعيط قدامه و يفهمنى و محسش بالضعف قدامه زى ما اكون كل ما ازعل و اعوز حد يفهمني اروح ادور عليه هو علشان يفهمنى
تم النشر الأحد، ١٢ يناير ٢٠٢٥
لعرض الإجابة في فدني اضغط هنا