السلام عليكم، متفهمة حالتك جدًا لأنك تقريبًا بتوصفيني... ومش انت لوحدك كده، فيه ناس كتير جدا في العالم بنفس الحالة. تعدد الشغف أو الميول أو الاهتمامات وإحساس إنك مش قادرة تحددي مجال واحد تتخصصي فيه أو إنك تفضلي في نفس المجال طول العمر. وفيه ناس تانية دي طبيعتها، مهتمين بحاجة أساسية واحدة ومفيش مشكلة بالنسبة لهم يشتغلوا فيها طول عمرهم. وبما إن الحياة مش كفاية إنك تتعلمي كل حاجة وتشتغلي كل حاجة فالفكرة كلها تعتمد على تحديد أولوياتك. أنتِ بالصف العاشر وأعتقد ده معناه بأولى أو ثانية ثانوي؟ عندك 15 أو 16 سنة تقريبًا؟ فكرة إنك تحددي اختيار واحد بس من كل اهتماماتك هيكون مشكلة بالنسبة لك، لسه صغيرة وأنتِ مع كل سنة تفكيرك بيتغير ويتشكل وممكن جدًا من بين كل الاهتمامات دي تقدري تحددي حاجة أو اثنين تبرعي فيهم وفي نفس الوقت الاهتمامات التانية ممكن تكون أدوات مساعدة أو هوايات تفصلي بها في أوقات فراغك. *** كل الاهتمامات دي هتلاقيها متفاوتة بالنسبة لك ولو قعدتِ مع نفسك وكتبتِ قائمة بكل حاجة وأعدتِ ترتيبها من الأهم فالمهم هتقدري في النهاية تحددي أكثر 5 حاجات أنتِ مائلة لهم وحابة تبدأي في تعلمهم. من بين الخمسة اختاري 3 وبعد جلسة تانية اختاري واحدة بس.. اسألي نفسك لو أنتِ مجبرة على اختيار واحد منهم، ومفيش أي خيار تاني، والاختيار الوحيد ده هو أكتر حاجة هتفيدك ومحتاجة تتعلميها فعلا هتختاري إيه؟ ** تحديد الأولويات مهم عشان تتغلبي على سلبيات تعدد الشغف، لأن من سلبياته التشتت بين كل المجالات والشعور السريع بالملل... هتلاقي نفسك بتتنقلي بين مجال والتاني كل فترة. فإذا موضعتيش خطة وانتظمتِ هتلاقي نفسك تايهة ومشتتة ووقتك بيضيع وأنتِ فعليًا مش بتنجزي حاجة في كل المجالات دي. *** فيه حاجة ممكن تنفعك تتعرفي على المجالات اللي بتهمك سريعًا عشان تقدري تحددي هل فعلًا هتفيدك وهتقدري تكملي فيها ولا مجرد ميل وممكن تحذفيها من قائمتك أو تحوليها لهواية لها وقت ولو بسيط في جدولك. شوفي فيديوهات تلخيص كتاب (أول 20 ساعة) أو لو عرفتِ تشتري الكتاب أو تستعيريه من مكتبة هيكون أفضل. ده بيشرح إزاي تتعلمي أي مهارة في 20 ساعة... بعدها تقدري تحددي هل هتتعمقي فيها ولا لأ. ده ملخص للكتاب https://www.youtube.com/watch?v=JVk2M-nGY6w فيه ملخصات تانية على يوتيوب لو شرح ده مش ناسبك. *** كل اللي قلته فوق ده، خصصي له وقت محدد في يومك بحيث لا يطغى على دراستك حاليًأ، ولا تتعجلي في تحديد وظيفتك أو تخصصك، الدنيا مش هتطير يعني.😅 يعني متخليش تعدد الاهتمامات وسيلة للتسويف ومهرب من مذاكرتك. ** طولت عليكِ، بس أرجو إني أكون أفدتك شوية. بالتوفيق إن شاء الله.
متشكرة اوي بجد🥰
تم النشر الاثنين، ٢٧ أكتوبر ٢٠٢٥
العفو، ربنا يوفقك في طريقك. هو موضوع اختيار الأهداف والتحفيز كبير شوية وممكن تحتاجي تشوفي فيديوهات تساعدك، بس ممكن أقترح عليكِ تبدئي بنموذج (عجلة الحياة المتوازنة) ده بيقسم جوانب حياتك عشان تشوفي النقص اللي في كل جانب منها وتبدئي تشتغلي عليه خطوة خطوة لحد ما توصلي للحياة المتوازنة بإذن الله. هتلاقي فيديوهات كتير شارحاه على يوتيوب... ممكن تشوفي الكورسين دول مثلا وإن شاء الله يساعدوكِ. https://www.youtube.com/playlist?list=PL9qj2CGqAHHH2OZCzkiKTLzd2YQQe6pEm https://www.youtube.com/watch?v=eFLyTB9GC8Q&list=PLCnYSnTcuIm8GFg9ONsOZZPv0oUeoy7BD&index=1 *** عشان تحفزي نفسك فيه طرق كتير منها إنك ترسمي صورة ذهنية للحالة اللي عاوزة تكوني عليها وتخليها قُصاد عينيك دائما.. أو تكتبي هدفك على ورقة وتعلقيها قُدامك... تكتبي أسباب رغبتك في النجاح في الهدف الفلاني وتكون متعلقة قُدامك عشان كل ما تحسي بملل أو رغبة في التوقف تفكري نفسك ليه بدأتي وليه لازم تكملي. المهم، تستعيني بالله وتعرفي إن التغيير بيحتاج وقت وصبر.
تم النشر الأحد، ٢٦ أكتوبر ٢٠٢٥
وعليكم السلام متشكرة لكلام حضرتك، فادني اوي وان لم اكن ارتحت تماما بس خفف عني حمل رهيب وقلق غير طبيعي، بس عندي سوال اعمل ايه او اخلي ايه هدف ليا عشان يحفزني ابذل اواذاكر وكده؟
تم النشر الأحد، ٢٦ أكتوبر ٢٠٢٥
لعرض الإجابة في فدني اضغط هنا