السلام عليكم
أنا ولد عندي 17 سنة وبعاني نفسيا بقالي سنتين لأسباب كتير
أول سبب هو إني ماعنديش صحاب خالص, أه أنا أعرف ولاد في سني بس للأسف علاقتنا سطحية جدا وكل ماشتكي لحد يقارن معاناتي بأهل غزة أو يقول عليا فافي
ثانيا حتى أهلي مش أحسن ناس ممكن أشتكيلهم, كل ماشتكي لماما تقولي مازودش الأعباء عليها وإني مش هانجح لو فضلت كدة, وأختي الصغيرة بتعيط لما بقولها, أما أي حد تاني في العيلة فأصلا أنا ماينفعش أقوله لأسباب خاصة
ثالثا أنا ماقدرش أروح لأي أخصائي لإن ماما شايفة إنهم مالهمش لازمة, وحاولت أشوف حلول تانية بس مش نافعة
رابعا أنا مش قادر أحدد هل أنا عندي إكتئاب ولا ثنائي قطب ولا مجرد مشاعر سلبية لإن مشاعري ساعات بتكون متقلبة بين الأعراض الاكتئابية والسعادة(بدون هوس) وساعات الاكتئاب بيطول
أنا بقيت خايف جدا من أي مضاعفات صحية بسبب حالتي النفسية ومابقتش بذاكر كويس ومحتاج مساعدة بس مش لاقي
طيب خلينا الاول واحدة واحدة نحلل الموقف وهوا انك مفتقد الاهتمام وشايف ان محدش فاهم معاناتك وبرضو حاسس بالوحده وانك تايه... انا شايفه انك ممكن تبدا تتعلم حجات جديدة وتطور من نفسك وتكتشفها اكتر وتشتت انتباهك وتبص لبكره بنظره امل وصدقني الصداقات مهمه بس لما تكون صح ودي حاجة مش بتيجي غير بالصبر زي الحب ف مينفعش تدور عليها لما تكون حابب نفسك وحياتك وعندك تفاؤل وقتها هتلاقي اللي شبهك واللي تصاحبهم بجد... انت مش محتاج دكتور نفسي انت محتاج تحب نفسك وتجدد شغفك ف الحياة ونا واثقه فيك انك تقدر تعمل دا لانك حكيت مشاعرك بسلاسه وواجهت مخاوفك ودي حاجة كويسه جدا انك مدرك اللي بتمر بي وفاهم معاناتك بس انت مدايق انك لوحدك اللي شايفها... زي مقلتلك ركز علي نفسك وحياتك هتلاقي معندكش وقت تفتقد اهتمام حد ولا تدور علي حد وفي الوقت المناسب هتلاقي اللي بتدور عليه ربنا يوفقك ي جميل
تم النشر الأحد، ٦ سبتمبر ٢٠٢٦
هحاول اساعدك ، انا اخويا كان في سنك كدا وانا اخته الصغيره فا هقولك انا اخويا كان ازاي ودلوقتي بقا ازاي اخويا لما كان عنده ١٧ تقريبا او ١٥ بابايا توفي فا الناس في العزا كانو بيقولو لماما ان ربنا يباركلك فيه وكدا وهو الي هيشيلكم في الوقت دا اخويا كان مش بيعيط ولا اي حاجه وكان بينام بس فا هو حس انه شايل مسؤليه اكبر منه لأنه كان مدلل شويتين لأنه الولد الوحيد بس دي برضو كانت مسؤليه صعبه عليه فا محمد كان عايز ينزل يشتغل فا ماما رفضت وهي الي بتدير أحوال البيت وكل حاجه بس مش بتشتغل فا محمد اتشال الحمل من عليه بس كان حاسس بالذنب وكدا وأعتقد انه كان اسوء من انه يتحمل المسؤليه وطبعا كان بيخبي علينا عشان هو شايف ان كل واحد حرفيا علي تكه او ممكن مكانش عنده شجاعه فا انا حبيت انك حكيت وكنت شجاع ، المهم اخويا فضل كدا لحد ماهو دلوقتي اعتقد نفسيته متحسنه كتير عن الاول لأنه شال مسؤليه وكمان بقا عنده اراء. وكبر وكدا انا مش عارفه انا حكيتلك دا ليه بس انا بس عايزه اقولك ان دا سن معظم الشباب فيه بيكون كدا ، ودا مش تقليل من الي انت بتحس بيه او بتعانيه خالص والله بس انت حاول تحس دايما بالأمل ومتحاولش دايما تبص لأوحش حاجه زي المرض النفسي لقدر الله . مامتك مش بتبقي عايزه تسمعك او حاجه هي بس مش مستحمله تشوفك بتتألم وصعيف قدامها بس دا الي هما اتربو عليه في التعبير فا متلومهاش وحسن علاقتك بيها لو مش كويسه انا اسفه لو دايقتك في حاجه 🤍
تم النشر السبت، ٥ سبتمبر ٢٠٢٦
وعليكم السلام ورحمة الله. أولاً، أقدر تماماً الشجاعة اللي بتظهرها وأنت بتشارك معاناتك دي، خاصة في سن 17 سنة وبعد سنتين من الضغط النفسي المستمر. مشاعرك طبيعية ومبررة، ومش ضعف أو "فافي" زي ما بعض الناس بيقولوا، لأن الإنسان بيحتاج دعم حقيقي مش مقارنات. التقلبات اللي بتصفها بين أعراض اكتئابية وسعادة عادية (بدون هوس) شائعة في المراهقة، ومش بالضرورة تشخيص معين زي الاكتئاب أو ثنائي القطب، لكن المهم إنك بتلاحظ التأثير على دراستك وصحتك، وده يستدعي اهتمام فوري. من منظور إسلامي، الله سبحانه وتعالى يقول "ولا تيأسوا من روح الله"، والبحث عن راحة نفسية جزء من التوكل والعمل. جرب تبدأ بخطوات عملية صغيرة تقدر تسيطر عليها لوحدك: حدد وقت يومي ثابت للدراسة حتى لو 30 دقيقة فقط، وركز على إنجاز بسيط كل يوم عشان تبني ثقة تدريجية. كمان، حاول تكتب يومياتك في مذكرة خاصة بك، تسجل فيها المشاعر والأسباب اللي بتثيرها، ده هيساعدك تفهم الأنماط وتقلل من حدة التقلبات بدون ما تحتاج مشاركة مع الآخرين. لو الأهل مش داعمين، ركز على بناء علاقات سطحية أكثر إيجابية مع زملاء الدراسة من خلال أنشطة مشتركة زي المذاكرة الجماعية أو الرياضة الخفيفة، عشان تقلل الشعور بالعزلة تدريجياً. أنت مش لوحدك في ده، وكتير من الشباب بيمر بنفس التحديات. ابحث عن أسئلة مشابهة على فدني عشان تشوف تجارب ووجهات نظر إضافية. لو قدرت تقنع والدتك تدريجياً بأهمية الدعم المهني من خلال مناقشة هادئة تركز على تأثير الحالة على مستقبلك الدراسي، هيكون خطوة قوية. أنت قادر تتجاوز ده بخطوات مدروسة، وأنا هنا أساعدك في أي تفاصيل إضافية.
تم النشر الجمعة، ٤ سبتمبر ٢٠٢٦
فلو عايز تبدأ تغيّر، ابدأ من الصلاة. حتى لو لسه مش منتظم فيها، خليك مصر إنك تصلح النقطة دي وتخليها أولوية. وبعدها أتمنى بجد تقرأ سورة البقرة، ومش لازم من أول يوم تكون ملتزم بيها يوميًا لو دا هيخليك تحس إن الموضوع تقيل عليك. ابدأ بالتدريج، وهتلاقيها مع الوقت بقت جزء طبيعي من يومك ومش واخدة الوقت اللي كنت متخيله. وكمان يبقى ليك ورد من القرآن، حتى لو صفحة واحدة بس. القرآن مش حاجة نعملها عشان ننجزها وخلاص، دي حاجة نرجعلها كل يوم عشان تفضل جوانا السكينة اللي بنفتقدها وسط كل اللي حوالينا، وربنا قال فيه شفاء لما في الصدور. وممكن كمان يبقى ليك ورد ذكر بسيط. وهتقول وأنا مش هلاقي وقت لكل دا؟ صدقني القرآن هيجيبلك البركة، بس جرب. والذكر مش لازم ياخد وقت مخصوص؛ إنت ماشي، رايح مكان، مستني حاجة، أو حتى قاعد لوحدك، خلي لسانك يذكر ربنا. أنا شخصيًا بعمل كدا كتير الحمد لله، ومع إني مش بعملها من فترة طويلة جدًا، لقيت لساني اتعود عليها لدرجة إني لما أبقى ساكتة ومش بعمل حاجة ألاقي نفسي بستغفر من غير ما أخد بالي. وطبعًا عارفة إن الأفضل إن الذكر يكون بحضور قلب وخشوع، وأنا بحاول دايمًا، بس حتى إن الإنسان يبدأ بحاجة بسيطة أحسن من إنه يسيبها خالص.
تم النشر الأحد، ٦ سبتمبر ٢٠٢٦
طيب مش قصدي حاجة، بس حقيقي والله أغلبنا في السن دا بنبقى متضايقين من حاجات كتير، وحتى علاقتنا بأهلنا اللي كانت حلوة ممكن تبدأ تتغير شوية، ودا لوحده بيأثر علينا، غير بقى العوامل الكتيييير التانية اللي بنمر بيها في الفترة دي. عشان كدا أنا شايفة إن جزء كبير من الحل إننا نبدأ نهتم بنفسيتنا أكتر، ونفكر إزاي نقدر ما نخليش كل حاجة تضايقنا تاخد مننا أكبر من حجمها، ونقوى نفسيًا شوية في التعامل معاها. وصدقني الشكوى للناس أوقات بتكون من أوحش الحاجات، ودا عن تجربة. لما كنت بجي أشتكي، كان فيه اللي بيتجاهل، واللي مش عايز يسمع، واللي يرد رد مستفز، مع إني كنت بعمل معاهم العكس تمامًا. وساعتها فهمت إن كل واحد عنده اللي مكفيه، وكل شخص شايف تعبه وابتلاءاته من أكتر الحاجات اللي شايلها، فمش دايمًا هنلاقي عند الناس المساحة اللي إحنا محتاجينها. وعشان كدا فعلًا الشكوى لغير الله مذلة، أما ربنا فإنت تقدر تحكيله كل اللي جواك من غير ما تخاف إنك هتكون عبء أو إن حد هيمل من كلامك. وطبعًا ممكن تقول طب لو ما اشتكيناش لحد، هنكتم كل حاجة جوانا ودا برضه ممكن يضرنا. وهنا بقى أنا شايفة إن علاقتنا بربنا لازم تكون الأساس، خصوصًا في زمن بقى فيه الضغط حوالينا كتير جدًا، وكل واحد تقريبًا بيحارب حاجة محدش شايفها.
تم النشر الأحد، ٦ سبتمبر ٢٠٢٦
وأنا مش شايفة إن الكلام دا تقليدي لمجرد إنه بسيط او اغلبنا نعرفه (لكن مش كلنا بنعمله) بالعكس أنا مش شايفة حل أفضل من إن الإنسان يقرب من ربنا وياخد بالأسباب ويحاول يصلح نفسه واحدة واحدة..مش هقولك إن حياتك هتتغير فجأة بس هتلاقي إنك بقيت أقدر على الصبر والتحمل والمواجهة وأهدى في التعامل مع اللي بيحصلك. وكمان قربك من ربنا هيخليك تبص للي بتمر بيه بشكل مختلف، فبدل ما كل حاجة تحصل وتقول ليه أنا؟ يمكن تبدأ تشوفها اختبار وربنا بيرفعك بيه درجات وتبقى واثق إن حتى الحاجة اللي مش فاهم حكمتها دلوقتي، ربنا أعلم بيها منك... بذكر نفسي بالكلام دا قبل م اقوله لك لان فعلا احنا مقصرين جدا و بندور ع الحل و هوا ف ايدينا..او يمكن بنعمل دا بس مش بالطريقه الصح. معلش سؤالي الغبي شويه اللي كان عن مقدرتك تروح لطبيب نفسي لأني لما قريت كلامك الأول مكنتش واخدة بالي إنك كنت موضح أصلًا إن مفيش مقدرة فالسؤال طلع مني من غير ما أنتبه للنقطة دي..معلش كمان على الإطالة الاوڤر دي ، أصلًا دا مجرد جزء من الكلام اللي كنت عايزة أقوله 🥲.. وربنا يخفف عنك و يوفقك لما يحب ويرضي.
تم النشر الأحد، ٦ سبتمبر ٢٠٢٦
وادعي ربنا كمان، بس ادعيه بصدق. احكي له اللي جواك زي ما هو من غير ترتيب ولا تفكير في الكلام. قله إيه اللي تعبك وإيه اللي خايف منه وإيه اللي نفسك يتغير واطلب منه يهون عليك ويقويك...هتحس براحة والله، لأنك لما تشكي لربنا بتحس كأنك شلت جزء من الحمل اللي على قلبك، وبتفتكر إنك مش لوحدك في كل دا..و برضه حاول تقلل السوشيال ميديا على قد ما تقدر لأنها فعلًا من أكتر الحاجات اللي ممكن تفرق مع نفسيتك. إحنا بقينا طول اليوم بنتعرض لمقارنات وأخبار وآراء وحاجات ملهاش لازمة وكل دا بيتراكم جوانا من غير ما نحس، فمش غريب إننا نكون أهدى لما نبعد عنها شوية.. ولو عملت كل دا ولسه حاسس إنك مش شايف نتيجة متستعجلش على نفسك..مش كل حاجة بتتحسن بسرعة ومش كل تعب نفسي (اذا كان في فعلا) سببه واحد أو علاجه واحد فلو قدرت ف يوم ما انك تاخد باسباب تانيه و تطلب مساعده من متخصص اعمل دا برضه (في حالة انك حسّيت الدنيا بتسوء اكتر) لكن حاليا اعمل اللي ف ايدك متقفش و تستسلم لاي حاجه زي كدا مهما كانت لانها كدا هتتمكن منك اكتر..
تم النشر الأحد، ٦ سبتمبر ٢٠٢٦
كنت كدا بس بدأت اتحكم في نفسي و مشاعري و اشغل نفسي ب اي حاجه
تم النشر السبت، ٥ سبتمبر ٢٠٢٦
شكراً أوي عل نصيحة, بس أنا فعلا بحب نفسي, أنا مش ببص لنفسي نظرة وحشة حتى لو كان فيا بعض العيوب لإن ماحدش مثالي في الدنيا دي, وكمان مش بقنع نفسي إني عمال بتدلع وإن نفسيتي التعبانة دي وهم
تم النشر السبت، ٥ سبتمبر ٢٠٢٦
جرب تحب نفسك
تم النشر السبت، ٥ سبتمبر ٢٠٢٦
إزاي؟
تم النشر السبت، ٥ سبتمبر ٢٠٢٦
للأسف لا
تم النشر الجمعة، ٤ سبتمبر ٢٠٢٦
ربنا يهون عليك..عندك امكانيه تروح لطبيب نفسي؟
تم النشر الجمعة، ٤ سبتمبر ٢٠٢٦
عايز تكون صداقات سطحيه وبعدين اختار الي يناسيبك بينهم 1 انزل صلي و حاول تتكلم مع الناس 2 انزل ساعد اي حد في منطقتكم سواء راجل كبير او امرأة مسنه و خليك دايما مبتسم حتى اذا سمعت كلمة تدايقك و زي ما قال الاخ الي قبلي حل المشكلة انك تعرف ان في مشكلة
تم النشر الثلاثاء، ٨ سبتمبر ٢٠٢٦
عادي مش لوحدك كده انا كمان فضلت طول حياتي احول اكون صدقات حقيقيه زي الي بنشوفها حولينا مع اني كنت عارفه العيال كلها بس كلهم سطحين زي ما بتقول عارف بقا انا لما كبرت ورحت الكليه او عامة كبرت من جوايا ونفستي فهمت ان الصدقات مش دايمة ولو في ناس صداقاتها دايما بيبقى رزق من ربنا وساعات ربنا بيختبر ناس فانو ميدهمش الصحبه دي او يأخرها عليهم فخليك عندك يقين انك فعلا مش محتاج صداقه انت محتاج تفهم انهم كلهم محطات في حياتك وانت هتكمل لوحدك في القطار وناس هتركب وتنزل وناس هتطول معك شويه وفي ناس ممكن ربنا يخليها تكمل معاك للآخر الطريق بس انت لسه مش لاقيهم خليك انت الصاحب الي بتدور عليه لحد متلاقي الصاحب الي بجد
تم النشر الثلاثاء، ٨ سبتمبر ٢٠٢٦
ده بيعتمد على تعريف الصداقة بالنسبة لحضرتك, لو إنتي شايفة إن الكام كلمة بيخلوا ال2 يتصاحبوا بجد فده غلط, أنا فضلت سنين أحاول أكون وفعلا كونت صداقات, بس كلها صداقات سطحية مافيهاش عمق
تم النشر الاثنين، ٧ سبتمبر ٢٠٢٦
اهتم بنفسك و ابني نفسك و اتعرف على صحاب جديده و كون صدقات جديده و انت معندكش أصحاب ولا حاجه كل ده اكيد بيتهيلك
تم النشر الاثنين، ٧ سبتمبر ٢٠٢٦
في الحاله دي عالج نفسك
تم النشر السبت، ٥ سبتمبر ٢٠٢٦
لعرض السؤال في فدني اضغط هنا