السلام عليكم، سواء كانت ترجمة أو أي مجال آخر في العمل الحر فلازم تعرفي إنك هتحتاجي تبذلي وقت ومجهود قبل ما تقدري تشتغلي ويبقى لك مصدر دخل، ده مش تثبيط، ده توضيح لواقع عشان متتصدميش أو تحبطي لو أنتِ مستعجلة على الشغل والربح منه. أنا مريت بالفترة دي قبل منك وتهت حبة حلوين وطبعا تشتت أكتر بسبب كتر المحتوى عن العمل الحر والمجالات والحيرة اللي بتقعي فيها بين أي طريق من كل دول أختار واي طريق أسرع وأقصر. فهقول لك كم نصيحة من خبرتي المتواضعة. لازم أولًا، تحددي مهارة واحدة تشتغلي عليها وتطوريها ويبقى لك نماذج عمل. اعرفي الأول عندك مهارة إيه أو إيه ميولك واللي تقدري تتعلميه وتنافسي فيه، متهتميش بفيديوهات الربح السريع عن طريق الشغل في كذا... لأ، شوفي ميولك الأول وهتلاقي مجموعة مهارات تقدري تحددي ما بينها وتختاري واحدة بس منهم في النهاية تبدئي بها. طوري المهارة واشتغلي فيها واستقري وممكن بعد كده تفكري تدخلي مهارة تانية معها. مواقع upwork و freelancer صعب قوي كمبتدئ تفكري تشتغلي عليها، مواقع خمسات ومستقل نفسها محتاجة تشتغلي على نفسك وتعرفي تسوقي لخدمتك أو تقنعي العميل (على مستقل) بقدرتك على القيام بالمشروع المطلوب، ده غير إن موافقة المواقع ومراجعتها لحسابك بقت أصعب وممكن يترفض حسابك أو خدمتك لو مش قد المستوى. لازم حساب لينكدن، ومتخافيش منه أو تحسي بإحباط لو اشتركتِ فيه ولقيتِ الناس كلها لها إنجازات وشغل. أنا مريت بكده أول ما سجلت عليه وده خلاني تركته كذا سنة لحد ما عرفت إزاي أتعامل معه وأستخدمه صح. اعملي حساب وتفاعلي عليه واعملي شبكة علاقات وانشري وعلقي عند الناس واظهري، طبعًا بالمهارات اللي عندك. وإن شاء الله تلاقي شغل عليه، سواء عن طريق نشاطك وشبكة العلاقات أو عن طريق الوظائف اللي بتعرض عليه وممكن تقدمي عليها. السؤال ده فيه إجابة تخص لينكدن وشرحه https://www.fedni.net/q/55713510/هل-يوجد-وظائف-من-المنزل اهتمي جدًا يكون عندك نماذج عمل، لو بتاخدي كورس طبقي المشاريع واعمليها نماذج عمل لكِ، اعرفي إزاي تكتبي سيرة ذاتية بالمواصفات الحديثة. *** هرشح لك مبادرة مجانية كانت أكاديمية ابن سينا عاملاها للعمل عبر المنزل للسيدات، اسمعي المحاضرات وطبقي واحدة واحدة، المحاضرات بتخليكِ تحددي شخصيتك الأول وميولك وبعدها أنسب المهارات لكِ وبعدين إزاي تلاقي العملاء وتنافسي في سوق العمل. ده رابط المحاضرات على تليجرام، يا رب تنفعك. https://t.me/workremotelyfreelance/61 ** الأهم من كل اللي فات، استعيني بالله ولا تعجزي وجددي نيتك من الدراسة والعمل وبإذن الله ربنا يوفقك.
لو مهتمة بالترجمة فعلا ممكن تفيدك قناة الأستاذ أشرف عامر على اليوتيوب... ابدئي خطوة خطوة وطوري لغتك وتدربي على نماذج كتير للترجمة ده اللي هيطورك.. ممكن تشوفي برضه إجابتي على السؤال ده https://www.fedni.net/q/87120955/كيف-أطور-اللغة-لإتقان-الترجمة
تم النشر الخميس، ١١ سبتمبر ٢٠٢٥
لعرض الإجابة في فدني اضغط هنا