انا حد طموح جدا الحمدلله بس دخلت ثانوية عامة و مجتليش الكلية الي نفسي فيها بدأت اتعايش مع كليتي و اخد كورسات خلصت سنة اولي و الاجازة جت بدأت انزل الجيم و اخد كورسات علشان لما بقعد في بيت بكتئب جدا و بقول يارب مصحاش من النوم و بعيط كتير اوي كمان علشان بعاني من اضطراب ما بعد الصدمة والدي توفي من سنتين و لسه لحد دلوقتي مش عارفه اتخطي الموضوع ف بحاول دايما اشغل يومي علي قد ما اقدر علشان مسيبش نفسي للاكتئاب انا دلوقتي احسن من حالي قبل سنتين بكتير قبل سنتين و لما بابا توفي كنت مدمرة حرفيا مكنتش حتي بقدر اقوم امارس يومي بشكل الطبيعي و نوم فوق ال ١٢ ساعة و قلة أكل و فقدان اي متعة في الحياة كنت ميته يعتبر مش عايشة الاجازة دي اول مرة احس اني فعلا عايشة و ان ليا حياة و يوم و كده اول مرة احس ان بعيش يوم اصلا بدأت اعمل خطوات صغيرة اوي في يومي تخليني احس ان ليا روتين و ليا حياة بدأت اخد كورسات و انزل الجيم و لسه بفكر ابدأ في كذا حاجة تاني حسيت اني رجعت تاني زي زمان لما كنت طفلة صغيرة ليها احلام كتير اوي و اني اقدر احققها بحمد ربنا كل يوم انه اديني طاقة دي و اديني الحياة دي، حياتي مش مثالية خالص و فيها مشاكل كتير خصوصاً بعد وفاة بابا وجتهنا مشاكل كتير اوي محفور جوايا ذكريات مؤلمة جدا بعد وفاة بابا كل ما بفتكرها بعيط و بتصعب عليا نفسي انها مرت بكل ده بس الحمدلله انا دلوقتي احسن الحمدلله و بدعي و اقول يارب يارب عوضني علي كل الألم الي في قلبي ده، بعد ثانوية عامة حسيت بفشل كبير اوي و انا من اكبر مخاوفي في الحياة ان اكون فاشلة او العمر يعدي بيا و معملش اي حاجه في حياتي، بدعي دايما يارب انا عايزه يكون ليا مستقبل اخلي ماما تكون فخورة بيا بي يارب خلي يكون ليا اثر صالح في دنيا، دلوقتي مشكلة ان انا بنت وحيدة علي ٣ ولاد في بيت، و انا دلوقتي في الاجازة ممكن انزل الجيم يومين في الاسبوع مثلا و خلاص و باخد كورس اونلاين في بيت و خلاص كده كنت بتناقش مع ماما اني عايزه اخد كورس ما اخويا اتعصب عليا و قالي ان مفروض بقا مين يساعد ماما مادام انا هروح جيم و اخد كورس و مش عارفه ايه علشان ماما كبرت في سن و بتعمل شغل بيت بالعافية ف لما انا مبكنش موجودة هو بيساعد سواء كنت في جامعتي او نزلت حتة معينة ، كمان وضع ده جديد علينا بابا هو الي كان بيساعد ماما في كل حاجة و انا طول عمري مهتمية بدراستي و بابا و ماما هما الي مشجعني علي ده بعد ما بابا توفي كنت انا داخلة تالتة ثانوي حرفياً انا كنت مدمرة كان مدرسي بيبقا برا و انا استأذن و اقوم افتح الباب للاوردارات يجي ضيف مثلا مكنتش ببقا عارفة اقعده فين مدرس كان بيبقا برا في صالة و مش عارفه اقعد مع مدرس ولا اقعد مع ضيف الي جه و مكنش بيبقا في غيري انا و ماما في شقة كنت بنهار تقريبا كل يوم بسبب كده كمان مدرس كان بيدايق و يقعد يقول اوف و مش عارفه ايه و كده اتكلمت معاهم في بيت كتير بسبب حوار ده و قولت لازم حد من اخواتي ولاد يكون متواجد و مدرس هنا كمان ماما كانت بتتعب فجاءة و كنت انا الي بفضل جنبها طول اليوم بليل و كان بيبقا ورايا درس الصبح ماما تعبت في اول امتحان ليا في ثانوية و كان فاضل علي امتحان تقريباً ٣ ايام وكانت محتاجة رعاية كل ده سبب ضغط علي اعصابي كبير جدا مع ضغط ثانوية عامة و المجموع و الامتحانات حرفيا كنت سنة بتمني الموت فيها بعد سنة دي قعدت كتير اوي تعبانة نفسياً و من ساعة ما بدأت الاجازة دي الي هي بعد ما خلصت اولي جامعة و انا بحمد ربنا كل يوم اني بقيت احسن من الاول بكتير علي اقل بقيت بعرف اعيش يومي اخويا الصراحة شال عني كتير اوي و كان بيساعد ماما كتير سواء في الاكل او شغل البيت يعتبر انا و هو بس الي بنساعد ماما لو هو مش موجود انا بساعدها و هكذا العكس ، دلوقتي هو قالي كلام حسسني اني مقصرة أو اني أنانية علشان قولت اني عايزه انزل اخد كورس و ده هيخلي هو يساعد ماما في وقت انا مش موجودة في انا قولتله ان الوقت الي هو مش موجود فيه انا هكون موجودة ساعتها بس هو سمعني كلام كتير اوي كسر خاطري و نفسي الصراحة و فكرني بكل حاجات القديمة و عمالة اعيط انا مبعرفش اشوف لنفسي قيمة غير لما بكون بتعلم حاجة جديدة حتي لو الحاجة دي بسيطة كمان انا كل الي حواليا نصحوني اني مسبش نفسي لدماغي ابدا علشان مرجعش تاني زي الاول و لازم اشغل وقتي دايما علشان املي الفراغ الي في حياتي و اقلل من شعور الوحدة الي ملازمني الي حسيت بيهم جامد اوي بعد وفاة بابا انا عايزه اعرف دلوقتي هو انا انانية فعلا علشان ممكن اكون اوقات مبساعدش ماما؟ خصوصا اني دايما حاسه بتقصير من ناحيتها و نفسي اقدملها كل حاجة بس الحقيقة ان انا اوقات كتير ببقا مدمرة نفسياً لدرجة مش قادرة اقوم من علي سرير او اقول كلمة لحد حتي كمان اجواء البيت مش هاديه خالص دايما بيبقا في مشاكل و دايما اخواتي بيتخانقوا و ماما دايما بتعيط بسبب ان في مشاكل كل ده بيأثر علي نفسيتي اكتر كنت بتابع مع دكتورة نفسية و قالتلي ان انا شخصية حساسة جدا و اي حاجه بتأثر في نفسيتي و ان عندي اضطراب ما بعد الصدمة و لازم ابعد عن دوشة البيت شوية و اول ما احس بضغط نفسي اخش اوضتي باختصار انا اواقات كتبر اوي ببقا مش قادرة اساعد نفسي علشان ادعم ماما نفسياً و بحس دايما ان ده واجب عليا ان اعمل كده و اخلي بالي منها بحس كتير اوي ان هي الي بنتي مش العكس
انا عارفه ان مفروض ان الي اساعد ماما و مخلهاش تعمل اي حاجه في بيت و شايلة ذنب ده دايما و تأنيب ضمير و اخويا دلوقتي بكلامه حسسني اني مقصرة فعلاً او أنانية
بس بجد شغل بيت كله صعب عليا اوي لوحدي يعني اخواتي اول ما بيلاقوني بقوم بشغل بيت كله مبيساعدوش في حاجة خالص ولا حتي حاجتهم الشخصية مفروض انا الي اعملها كل واحد يصحي يلبس و ينزل و يرجع ياكل و ينام و خلاص ولا حد يقعد مثلا علشان يفتح باب للاوردارات الي بتيجي او يبقا في حد معانا في بيت لأي ظرف و اغلب وقتهم بيبقا تحت مع صحابهم مش شغل شغلهم بيبقا عدد ساعات قليلة بس
ممكن حد يقولي هو انا غلط و أنانية و مفروض منزلش كورس ده و افضل قاعدة ولا مش طبيعي ان كلنا نساعد بعض علشان كلنا في بيت واحد؟ انا دايما بؤمن ان مصلحتنا واحدة مادام احنا في بيت واحد و لازم يبقا في مشاركة بس ياريت تقولوا لي رأيكم و ايه تقصير و ايه غلطي
كمان انا كنت بفكر انزل تدريب علشان دراستي و تدريب ده طبعا بيبقا كل يوم و يومين اجازة فكرت قولت مش هعرف بالوضع ده و كده تقريباً كل حاجة بحلم بيها ممكن تقف
اولا : الله يرحم بابا وربنا يقويكي باذن الله .. ثانيا : كويس اوي انك طموحة وبرافو انك قدرتي ترجعي تاني وتشوفي اللي وراكي .. وفعلا فكرة انك تعملي حاجات وتشغلي وقتك بيها ده مفيد ليكي خاصةً في الوقت ده. نيجي بقى للمهم .. اخواتك المفروض برضه يشاركوا معاكي في مساعدة ماما .. حاولي تتكلمي معاهم بهدوء .. ع الاقل فقط يعملوا حاجتهم الشخصية .. غرفهم وهكذا .. علشان حاجات تخف من عليكي ومن على والدتك .. اتفقي معاهم على كده وكلميهم بهدوء .. وعقل الموضوع بالاتفاق يعني متحاوليش تتعصبي او تضايقي نفسك. تاني حاجه والاجابة على سؤالك لا انتي مش انانية خالص .. وفاهمة ومقدرة انك عايزة تبقى حاجه كبيرة ف المستقبل ونفسك تحققي طموحك .. وفي نفس الوقت برضه حاسه بالذنب من ناحية والدتك وده ف حد ذاته مش انانية بالعكس .. بس ع الاقل حاولي توازني ما بين شغل البيت وحياتك الشخصية .. يعني حاولي متجيش ع حاجة فيهم .. النص بالنص .. بمساعدة اخواتك برضه.
تم النشر الخميس، ٣ أغسطس ٢٠٢٣
اولا ربنا يرحم بابا و يجعلنا و اياه من اهل الفردوس الاعلى ثانيا انتي مش انانيه ولا حاجه و كونك طموحه دي حاجه جميله بس مش لدرجة تبقى ضغط و تسببلك مخاوف انتي بنت و لسه صغيره كمان و مش ملزمه بأي حاجه حتى لما تكبري جوزك هو اللي هايكون مسؤول عنك و اي انجاز هاتحققيه هايكون حريه شخصيه من غير ضغوط و لازم متضغطيش ع نفسك عشان تعرفي تحققي و حاولي توازني ما بين حياتك الشخصيه و طموحاتك و بين البيت مراعاة لظروف ماما و كده وانتي قدها بإذن الله و متضايقيش من الماضي و ركزي ف دلوقتي و اللي جاي بس زي ما اتفقنا اسعي لتحقيق طموحاتك من غير اي ضغوط و خليكي عارفه كويس انك مش ملزمه بحاجه اصلا و ربنا يوفقك و يحققلك كل اللي بتتمنيه بإذن الله
تم النشر الخميس، ٣ أغسطس ٢٠٢٣
شوفي أنا عارفه انتي بتمري بايه كويس أنا امي ماتت وكنت أنا الكبيره واخويا اكبر مني كنا متعودين علي ماما جامد لان بابا كان بيبقي مسافر بره مصر فكنا متعودين وامي كانت تعبانه بسبب عمليه فتعبت من بعديها يعني عملت ياجي 13عمليه فما فوق كنت انا الي يشيل البيت مع اني صغيره يعني رابعه ابتدائي اختي الصغيره انا الي ربيتها عشان ماما كان عندها مرض انتشر كانت بتروح المنصوره عشان تروح تتعالج والمنصوره بعيده عننا خالص انا الي ربيت اختي كانت بتسيب معايا اخواتي احنا خمسه اختي الصغيره كانت بتقولي يا ماما تعبت كثير بس كان عادي عمري ما توقعت أن امي تموت مع انها كانت كل أما بتدخل عمليه توصيني بخواتي بس بجد عمري ما توقعت انها تموت ماتت ومريت باأيام ما يعلم بيها الا ربنا بابا رجع وبعدين سابنا عند بيت عمي كانت اي حاجه بتقالي كنت بزعل بس بصراحه بابا عمره مأصرش فجاحه خلاصه الكلام انك تقدري تظبطي مواعيدك وتعرفي تعملي حاجات كثيره فيومك يعني ساعدي مامتك ف حاجات انتي عارفه انها صعبه عليها روقي البيت بليل قولي لخوانك أن كل واحد فيهم لازم يعمل حاجته ومحدش يرمي ف الارض وكده بس لازم تساعدي امك انتي بتقولي أنها ست كبيره ربنا يطولك فعمرها لازم تساعديها ممكن تخلي الكورس اونلاين او زي ما قلت ممكن تظبطي مواعيدك وتعرفي الي هتعمليه قبل الكورس تعملي أكل وامك تسخنه عايزه اقولك حاجه بجد والله لو انتي خدتي أن الموضوع صعب هيبقي صعب وتبقي مدايقه ومش طايقه نفسك لكن لو خدتيه عادي وان باذن الله الأمور هاتمشي الأمور هاتمشي اهم حاجه متزعليش امك حاولي تقربي من ربنا ومتخليش اي حاجه تزعلك لازم تعدي عليكي ايام وحشه وهتعدي عليكي ايام حلوه
تم النشر الخميس، ٣ أغسطس ٢٠٢٣
يارب ويسعدك ويقدملك الي فيه الخير
تم النشر الخميس، ٣ أغسطس ٢٠٢٣
ربنا يرحم مامتك يارب و يعوضك خير عن كل الي مريتي بي
تم النشر الخميس، ٣ أغسطس ٢٠٢٣
شكرا جداً ليكِ🤍
تم النشر الخميس، ٣ أغسطس ٢٠٢٣
الي حضرتك بتكلمي فيه ده ملهوش اي علاقة بسؤالي تقريبا بتجاوبي علي سؤال حد تاني
تم النشر الخميس، ٣ أغسطس ٢٠٢٣
أطلع بر وشم هوا
تم النشر الأربعاء، ٢ أغسطس ٢٠٢٣
لعرض السؤال في فدني اضغط هنا